عىلىم ورداسىندا حالىقارالىق ايەلدەر كۇنىنە وراي پرەزيدەنت جانىنداعى ۇلتتىق عىلىم اكادەمياسىنىڭ ۇيىمداستىرۋىمەن عالىم ايەلدەرگە ارنالعان اكادەميك ءنايلا بازانوۆا اتىنداعى ماراپات تابىس ەتىلدى.
بيىل ەكىنشى رەت ءوتىپ وتىرعان مازمۇندى ءىس-شاراعا وڭىرلەردەن وتاندىق عىلىمدى دامىتۋعا ايرىقشا ۇلەس قوسىپ جۇرگەن عالىمدار قاتىستى.
كورنەكتى عالىم, فيزيولوگ ءنايلا بازانوۆانىڭ ەسىمى ورتالىق ازيا ەلدەرىنە العاشقى ايەل-اكادەميك, قازاق ايەلدەرى اراسىنان شىققان تۇڭعىش بيولوگيا عىلىمدارىنىڭ دوكتورى, پروفەسسور رەتىندە بەلگىلى. اكادەميك ن.بازانوۆا اتىنداعى ماراپات – ەل عىلىمىنىڭ دامۋىنا ەلەۋلى ۇلەس قوسىپ جۇرگەن عالىم ايەلدەردى ماراپاتتاۋعا ارنالعان قۇرمەت بەلگىسى. ماراپات عىلىم مەن تەحنولوگيانىڭ ۇزدىكسىز دامۋىن, اكادەميك زەرتتەۋلەرىندەگى جاڭاشىلدىقتى بەينەلەيدى.
سالتاناتتى جيىندا پرەزيدەنت جانىنداعى ۇعا پرەزيدەنتى اقىلبەك كۇرىشباەۆ عىلىم سالاسىندا تاباندىلىقپەن ەڭبەك ەتىپ جۇرگەن ايەلدەردى كوكتەممەن بىرگە كەلگەن سۇلۋلىق مەرەكەسىمەن قۇتتىقتادى.
«ەلىمىزدىڭ ەكونوميكالىق دامۋىن عىلىمنىڭ قاتىسۋىنسىز دامىتۋ مۇمكىن ەمەس. وسى ورايدا مەملەكەت باسشىسى عىلىم سالاسىنا وراسان زور مىندەت جۇكتەپ وتىر. بۇل زەرتتەۋ قىزمەتىن ۇيىمداستىرۋعا دەگەن كوزقاراستى وزگەرتىپ, عالىمدى ءوزىنىڭ زياتكەرلىك الەۋەتىن تولىق اشۋعا ىنتالاندىراتىن جاڭا تەتىكتەر جاساۋعا مىندەتتەيدى. جاۋاپكەرشىلىگى جوعارى مىندەتتى ىسكە اسىرۋدا عىلىمي قوعامداستىقتىڭ ايەلدەر قاۋىمىنا ەرەكشە سەنىم ارتامىز. نازىك جاندىلار ءبىلىم مەن عىلىمنىڭ دامۋىنا, قوعامنىڭ زياتكەرلىك الەۋەتىن ارتتىرۋعا سۇبەلى ۇلەس قوسىپ, ۇرپاق تاربيەلەپ ءجۇر. جىل سايىن عىلىمداعى ايەلدەر ۇلەسى ارتىپ, بۇگىندە كورسەتكىش 12 مىڭنان اسادى. ولاردىڭ قاتارىندا عىلىم دوكتورلارىنىڭ سانى – 898, عىلىم كانديداتتارى – 2 859, PhD – 2 229, بەيىنى بويىنشا دوكتورلار – 185. عىلىمدى دامىتۋعا باعىتتالعان كەشەندى جوسپاردا عالىم ايەلدەرگە تۇسەتىن سالماق تا, جاۋاپكەرشىلىك تە جوعارى. بىراق وسىنداي كۇردەلى مىندەتتى ىسكە اسىرۋدا ايەلدەر ءوز ىسىنە دەگەن ادالدىقپەن ەل دامۋىنا كەلەلى ۇلەس قوسىپ جاتىر», دەدى ۇعا پرەزيدەنتى.
القالى جيىن بارىسىندا الماتى قالاسى اكىمى دارحان ساتىبالدىنىڭ قۇتتىقتاۋىن جاستار ساياساتى باسقارماسىنىڭ باسشىسى ءازيز قاجدەنبەك جەتكىزىپ, عىلىمدى قولداۋعا باعىتتالعان جوبالار تۋرالى ايتىپ ءوتتى. ال ىزگى لەبىزىن ارناعان ۇعا اكادەميگى ديليارا قايداروۆا, قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى بەيبىتگۇل كارىموۆا قوعامداعى عالىم ايەلدەردىڭ رولىنە, جەتىستىگىنە توقتالدى.
سالتاناتتى جيىندا اباي اتىنداعى قازۇپۋ پروفەسسورى فاۋزيا ورازباەۆا, ر. سۇلەيمەنوۆ اتىنداعى شىعىستانۋ ينستيتۋتى جانىنداعى رەسپۋبليكالىق اقپاراتتىق ورتالىق ديرەكتورى, پروفەسسور مەرۋەرت ابۋسەيىتوۆا, الماتى تەحنولوگيالىق ۋنيۆەرسيتەتىنىڭ پروفەسسورى ماريام اليماردانوۆا, ءال-فارابي اتىنداعى قازۇۋ پروفەسسورى تامارا شالاحمەتوۆا سىندى 60-تان استام عالىم ماراپاتتالدى.
الماتى