كوكتەمنىڭ شۋاقتى مەرەكەسى قارساڭىندا جەتىسۋلىق كوپبالالى انالار كوپتەن كۇتكەن باسپانالارىنا يە بولدى. جەكە ۇيلەر مەن پاتەرلەردىڭ كىلتى تالدىقورعان قالاسى مەن كوكسۋ اۋدانىنىڭ تۇرعىن ءۇي كەزەگىندە تۇرعان انالارعا بەرىلدى. وسىلايشا, 35 وتباسى قونىس تويىن تويلادى.
ەل ىشىندە الەۋمەتتىك قولداۋدى كۇشەيتۋ باعىتىنداعى ماڭىزدى قادامداردىڭ ءبىرى – كوپبالالى انالاردى باسپانامەن قامتۋ. وسى باعىتتا وبلىس ورتالىعىندا الەۋمەتتىك وسال ساناتتاعى 28 وتباسى ءۇيلى بولدى. ولارعا ءبىر, ەكى جانە ءۇش بولمەلى باسپانا كىلتتەرى تابىستالدى. بەرىلگەن تۇرعىن ۇيلەر قالانىڭ «جاستار-3» تۇرعىن ءۇي الابىنان, «شىعىس» شاعىن اۋدانىنان جانە قادىرعالي جالايىري داڭعىلىندا ورنالاسقان. جاڭا پاتەرگە قول جەتكىزىپ, قۋانىشى ەسەلەنگەن جانداردىڭ قاتارىندا كوپ بالالى انا باقىت بوزتاەۆا دا بار.
– وسى كۇندى ۇزاق كۇتتىم, تۇرعىن ءۇي كەزەگىندە 10 جىلعا جۋىق ۋاقىت تۇردىم. ءۇش بولمەلى پاتەردىڭ كىلتىن الدىم. التى بالانىڭ اناسىمىن, «كۇمىس القا» يەگەرىمىن. بالالارىمنىڭ ءوز شاڭىراعى, جىلى ءارى جايلى باسپاناسى بولعانىنا شەكسىز قۋانىشتىمىن, – دەدى ول.
كەيىنگى جىلدارى وڭىردە الەۋمەتتىك وسال توپتارعا ارنالعان تۇرعىن ۇيلەردىڭ قۇرىلىسى قارقىن العان. مەملەكەتتىك باعدارلامالار اياسىندا كوپبالالى, تولىق ەمەس جانە ەرەكشە قاجەتتىلىگى بار بالالارى بار وتباسىلارعا باسىمدىق بەرىلىپ كەلەدى.
– ون ءبىر جىلدان بەرى كەزەكتە تۇردىق, بۇگىن باسپانالى بولۋ تۋرالى ارمانىمىز ورىندالدى. بىزبەن بىرگە قۋانىشقا كەنەلىپ جاتقان كورشىلەرىمىزدىڭ دە جاڭا پاتەرلەرىنىڭ ءىشى قۇت-بەرەكەگە تولى بولسىن, – دەيدى ەلەونورا حاريتونوۆا.
كوكسۋ اۋدانىنىڭ بالپىق بي, جامبىل, زىليحا تامشىباي اۋىلدارىندا جالپى سانى 7 ءۇي قولدانىسقا بەرىلدى. جەكە تۇرعىن ءۇي كىلتتەرىنە كەزەكتە تۇرعان الەۋمەتتىك وسال توپتاعىلار, اتاپ ايتقاندا, تولىق ەمەس جانە كوپبالالى وتباسىلار, جەتىم بالالار مەن اتا-انالارىنىڭ قامقورلىعىنسىز قالعان بالالار ساناتىنداعى ازاماتتار يە بولدى. كوپ جىلدان بەرى كەزەكتە تۇرعان وتباسىلارعا بۇل كۇن – ءۇمىتتىڭ اقتالعان, ارماننىڭ ورىندالعان ءساتى.
– 2016 جىلى تۇرعىن ءۇي كەزەگىنە تۇرعانمىن. تولىق ەمەس وتباسى ساناتى بويىنشا باسپانا الىپ وتىرمىن. بالالارىمنىڭ ءوز شاڭىراعى بار بولعانىنا قۋانىشتىمىن. وسىنداي قولداۋ مەن قامقورلىق كورسەتكەنى ءۇشىن مەملەكەتىمىزگە ريزامىز, – دەيدى ۆەسنيانا بەلوۆا.
وبلىس اكىمى ءباسپاسوز قىزمەتىنىڭ مالىمەتىنشە, تالدىقورعان قالاسىندا وتكەن جىلى 600-دەن استام تۇرعىن باسپانالى بولسا, وسى جىلدىڭ باسىنان بەرى 120-عا جۋىق ازامات ءوز پاتەرلەرىنە قول جەتكىزدى. ال كوكسۋ اۋدانىندا 2022–2024 جىلدار ارالىعىندا 188 وتباسى باسپاناعا يە بولدى. وعان قوسا الەۋمەتتىك وسال ساناتىنداعى وتباسىلار ءۇشىن 90 جەكە تۇرعىن ءۇيدىڭ قۇرىلىسى اياقتالدى. جىل سوڭىنا دەيىن كەزەكتە تۇرعان ازاماتتارعا بۇل ۇيلەر كەزەڭ-كەزەڭىمەن تابىستالادى.
جەتىسۋ وبلىسى