الەكسەي لودوچنيكوۆ – ەرتىس بويىنداعى قالىڭ قازاقتىڭ اراسىندا وسكەن جىگىت. بالا كەزىنەن جۇرەگى قازاعىم دەپ سوعادى. دومبىرامەن حالقىمىزدىڭ ءان-كۇيىن قۇيقىلجىتىپ ويناۋى ءبىر بولەك, ول – بۇگىندە مەملەكەتتىك ءتىل مەن ۇلت مادەنيەتىنە ولجا سالىپ, كوسەگەسىن كوگەرتسەم دەيتىن ساناسى سەرگەك ازاماتتىڭ ءبىرى.
الەكسەي بالالار ۇيىندە تاربيەلەنگەن. بالالىق شاعىن پاۆلودار وبلىسى تەرەڭكول اۋدانىنداعى بالالار ۇيىندە وتكەردى. ونەرلى جەتكىنشەك 6 جاسقا تولعاندا ۇستازدارىنىڭ كەڭەسىمەن دارىندى بالالارعا ارنالعان مۋزىكالىق مەكتەپكە وقۋعا ءتۇسىپ, ء«داستۇرلى ءان جانە دومبىرادا ويناۋ» ماماندىعىن يگەرگەن. قازىرگى كۇنى ول Instagram مەن TikTok جەلىلەرىندە تانىمال بلوگەرگە اينالعان. بۇگىندە استانا قالاسىندا تۇرادى.
– قازاق رۋحانياتىنا, مەنتاليتەتىنە جاقىن بولۋىمنىڭ سەبەبى – بالالار ۇيىندە قازاق توبىندا تاربيەلەندىم. قازاقى تاربيەنىڭ ناتيجەسى بولار, ەسەيە كەلە ارالاساتىن جولداستارىمنىڭ بارلىعى قازاق. دومبىرا ۇيرەتكەن العاشقى ۇستازىم اسحات ەركەبۇلانوۆ, ودان كەيىن جول كورسەتكەن مەدعات ماناپوۆ, امانگەلدى قوجانوۆ, جانبولات بايسولتان سياقتى اعالارىما العىسىم شەكسىز. مەنى شەتسىز-شەكسىز قازاق ءان-كۇي ونەرىنە جەتەلەدى. ماعان دومبىرامەن ءان ايتۋ بالا شاعىمنان ەرەكشە ۇنايتىن, بۇل ونەرىمدى ءالى كۇنگە جەتىلدىرۋمەن كەلەمىن, – دەدى بەلسەندى جاس.
ول بۇگىندە ۋاقىتىنىڭ كوپ بولىگىن ەلىمىزدەگى بالالار ۇيلەرىندە تاربيەلەنىپ جاتقان جەتكىنشەكتەردىڭ شىعارماشىلىقتارىن دامىتۋعا ارناپ كەلەدى. بىلتىر «جۇلدىز بولعىم كەلەدى» اتتى رەسپۋبليكالىق جوبانى قولعا الدى. بۇل بالالار ۇيلەرىندەگى جاس تالانتتارعا ارنالعان. وتكەن جىلى العاش رەت ۆوكال ونەرى بويىنشا بايقاۋ ءوتىپ, استاناداعى فينالدىق كەزەڭگە ەلىمىزدىڭ ءار تۇكپىرىنەن 40 بالا جينالدى. جەڭىمپازدار مەن جۇلدەگەرلەرگە دۋباي قالاسىنا جولداما, قىمبات ۇيالى تەلەفوندار مەن ماكبۋكتەر سىيعا تارتىلدى. جەتكىنشەكتەردىڭ قانداي اسەرلى سەزىمدە بولعانىن تىلمەن ايتىپ جەتكىزۋ قيىن. العاشقى سايىس ناتيجەلى وتكەنىن بايقاعان الەكسەي بيىل حورەوگرافيا باعىتىنداعى جاس ورەندەردى سىناپ كورمەككە بەل بۋىپ وتىر. ونىڭ فينالىندا ەلورداعا 100-دەن اسا بالا جينالادى دەپ كۇتىلەدى.
– ءبىزدىڭ قوعام ءازىلدى جەڭىل قابىلداپ, كەز كەلگەن الەمدىك وزگەرىستەرگە باتىل تۇردە كىرىسىپ كەتەتىنى ۇنايدى. مەملەكەت باسشىسىنىڭ ءوزى دە جاستار قوزعاۋشى كۇش ەكەنىن ايتتى. پاتريوت بولۋ جالاڭ ۇران ەمەس. قازاق ءتىلىن جەتىك مەڭگەرگەنىم ءوزىم ءۇشىن عانا, بىراق ونى جەلەۋ ەتىپ قىزمەت سۇراپ كورگەن ەمەسپىن. وتانىمىزعا پايدامىز ءتيسىن دەسەك, ونى ىسپەن دالەلدەۋىمىز كەرەك. كەيدە كەيبىر قازاق ازاماتتارىنىڭ ءوز انا ءتىلىن بىلمەيتىنىن كورگەندە جانىم اشيدى. بۇل كەمشىلىك ەمەس, وسكەن ورتاسى سونداي. بىراق ىنتا بولسا, بارلىعىن لەزدە ۇيرەنۋگە بولادى. ال ءوزىڭ ءوسىپ-ءونىپ وتىرعان مەملەكەتتىڭ انا تىلىنە قۇرمەت كورسەتۋ – ورتاق مىندەتىمىز. شەتتەن كەلىپ, ەلىمىزدىڭ كەرەگەسىن كەڭەيتىپ جاتقاندارعا قاتىستى دا سولاي ايتار ەدىم. مەملەكەتتىك ءتىلدى ءبىلۋ – ءاربىر ازاماتتىڭ پارىزى, دەپ جالعادى ءسوزىن.
قازىرگى ۋاقىتتا الەكسەي الەۋمەتتىك جەلىدەگى بلوگىن كۇندەلىكتى جۇرگىزەدى. ءبىر عانا Instagram-دا 366 مىڭنان اسا وقىرمانى بار. كۇندەلىكتى تۇسىرەتىن روليكتەرىنىڭ دەنى ءازىل-وسپاققا ارنالعانىمەن, قوعامداعى كەيبىر وتكىر ماسەلەلەردى كورسەتۋگە تىرىسادى.
– اباي اتامىزدىڭ «وزىڭە سەن, ءوزىڭدى الىپ شىعار, اقىلىڭ مەن قايراتىڭ ەكى جاقتاپ» دەگەن دانا ءسوزى بار. بۇل مەنىڭ ومىردەگى باستى ۇرانىما اينالدى. كۇندەلىكتى ومىردە دە, جەلىدە دە قاراپايىم بولۋعا تىرىسامىن. كەيبىر ادامدار مەنىڭ روليكتەرىمدى اتا-اجەلەر ءجيى كورەتىنىن ايتادى. مەن ءۇشىن بۇل – ماقتانىش. سەبەبى ولار ارقىلى نەمەرەلەرى دە تاماشالايدى دەگەن ءسوز, دەپ كەيىپكەرىمىز ءسوزىن ءتامامدادى.
وسىلايشا, ەرتىس بويىندا جەتىلگەن سارى بالا بۇگىندە استانا قالاسىندا جەمىستى ەڭبەك ەتىپ ءجۇر. الەكسەيدىڭ ويعا العان باستامالارى ساتىمەن ورىلە بەرسىن دەپ تىلەيمىز.
پاۆلودار وبلىسى