كەيىنگى جىلدارى قاشىقتان ءبىلىم الۋ قالىپتى ۇردىسكە اينالدى. ال وسىدان بەس-التى جىل بۇرىن ونلاين وقۋدى كوپشىلىك اسا مويىنداي قويماعان ەدى. سول ۋاقىتتا باتىل قادامعا بارىپ, ءبىلىم سالاسىنا بىلەك سىبانا كىرىسكەن جاستىڭ ءبىرى – جۇلدىزاي مۇساەۆا. قازىر ول نەگىزىن قالاعان «JUZ40» كومپانياسى بۇگىندە ەلىمىزدەگى ەڭ ءىرى «EdTech» جوبالاردىڭ بىرىنە اينالدى. اتالعان كومپانيا جىل سايىن مىڭداعان تالاپكەردىڭ ۇلتتىق بىرىڭعاي تەستىلەۋدەن جوعارى بالل جيناپ, قالاعان وقۋ ورنىنا گرانتقا تۇسۋىنە جول اشىپ كەلەدى.
ء«بىزدىڭ وسى جولداعى باستى مۇراتىمىز – ءبىلىم مەن تاربيەنى قاتار بەرىپ, سانالى ۇرپاق قالىپتاستىرۋ», دەيدى جۇلدىزاي مۇساەۆا. بالكىم, سودان دا شىعار جىل سايىن ۇلتتىق بىرىڭعاي تەستىلەۋدەن ەڭ جوعارى 140, 139 بالل الاتىن وقۋشىلاردىڭ دەنى – وسى كومپانيانىڭ تۇلەكتەرى.
ءبىر قىزىعى, كەيىپكەرىمىزدىڭ ءوزى 2015 جىلى تەستىلەۋ تاپسىرعاندا ناتيجەسى جامان بولماعان. بىراق گرانتقا ءبىر بالى جەتپەي قالىپتى. ۋنيۆەرسيتەتتىڭ العاشقى كۋرستارىن اقىلى نەگىزدە وقىعانىمەن, 3-كۋرستا گرانتقا اۋىسقان. ارينە, ونىڭ قادىرىن گرانتقا ءبىر بالى جەتپەگەن تالاپكەر عانا شىن تۇسىنەدى. بۇل سەزىم وليمپيادادا ءتورتىنشى ورىن العان سپورتشىنىڭ كۇيىندەي شىعار, بالكىم. مۇنى جاقسى بىلەتىن جۇلدىزاي وقۋعا تۇسۋگە ءبىر بالى جەتپەگەن وقۋشىلارعا جىل سايىن ءوز اتىنان گرانت تاعايىنداپ كەلەدى. وسى كۇنگە دەيىن ول بەرگەن 34 گرانت 34 وقۋشىنىڭ سونگەلى تۇرعان ءۇمىتىن قايتا جاقتى.
جۇلدىزايدىڭ جاس تا بولسا ەكى جارىم مىڭنان استام ماماندى جۇمىسپەن قامتىپ, ءدال قازىر قىرىق مىڭعا جۋىق وقۋشىنى تەستىلەۋگە دايىنداپ وتىرعان اۋقىمدى جوبانىڭ تەتىگىن ۇستاۋى – ۇلكەن جاۋاپكەرشىلىك. بۇل – قۇر ستاتيستيكا ەمەس, ءار ساننىڭ ارتىندا مىڭداعان وتباسىنىڭ ءۇمىتى تۇرعانىن كورسەتەتىن ناقتى فاكت. ەل دامۋىنا ەشقانداي دابىراسىز, ءۇنسىز عانا ۇلەس قوسىپ جۇرگەن جۇلدىزاي سەكىلدى جىگەرلى ءھام جاسامپاز جاستار قاشاندا ۇلگى.
پايداسى كوپكە تيگەن جوبانىڭ جۇيەسى دە مىقتى بولسا كەرەك. ۇجىمنىڭ باسىم بولىگى جاستاردان قۇرالعان. كوپشىلىگى ءبىر كەزدەرى وسى جوبادا ءوزى دە وقىپ, كەيىن سول ورتاعا قىزمەت ەتۋدى تاڭداعان. سوندىقتان ولار تالاپكەردىڭ كوڭىل كۇيىن, قارقىنىن, قاي تاقىرىپتا قينالاتىنىن جاقسى بىلەدى.
«دارىنسىز شاكىرت بولمايدى, دارىندى اشا المايتىن مۇعالىم بولادى. بالاعا سەنىم ارتىپ, شىراعىن جاعا ءبىلۋىمىز كەرەك. ءبىزدىڭ ونلاين جۇيەدە قىزمەت ەتۋىمىز دە وقۋشىنىڭ الەۋەتىن تولىق اشۋعا باعىتتالعان. بىرىنشىدەن, بۇل تالاپكەردىڭ ۋاقىتىن ۇنەمدەيدى. جولعا كەتەتىن ۋاقىت قىسقارعان سوڭ, وقۋشى اپتا سايىن قوسىمشا 3-6 ساعاتتى دايىندىققا ارناي الادى. ەكىنشىدەن, ناتيجە كوزدەن تاسا قالمايدى. ءار تەستىلەۋدەن كەيىن جۇيە قاي جەردە قاتە كەتكەنىن, قانشا ۋاقىت جۇمساعانىن, قاي تاقىرىپتىڭ ءالسىز ەكەنىن وزدىگىنەن شىعارىپ بەرەدى. ۇشىنشىدەن, وقۋ ماتەريالى ءاردايىم قولجەتىمدى. بەينەجازبا, تەوريا, تاپسىرما تاۋلىك بويى اشىق تۇرادى, بالا قاجەت بولسا ءبىر ءبولىمدى قايتا-قايتا قاراپ, بەكىتە بەرەدى. ەڭ قۇندى ارتىقشىلىقتىڭ ءبىرى – گەوگرافيالىق شەكتەۋ دە جويىلادى. ماعان بۇل وتە ماڭىزدى, ويتكەنى مىقتى مۇعالىمنىڭ ساباعىنا تەك قالاداعى بالا عانا ەمەس, ەلدىڭ كەز كەلگەن وڭىرىندەگى تالاپكەر دە قول جەتكىزە الۋعا ءتيىس. بۇل اۋىل مەن قالا اراسىنداعى ءبىلىم الشاقتىعىن ازايتۋعا قىزمەت ەتەدى», دەيدى ول.
كومپانيانىڭ الداعى كوپ جوسپارىنىڭ ءبىرى – 9-10 سىنىپ وقۋشىلارىنا ارنالعان JUZ40 وليمپياداسىن وتكىزۋ. مۇنداعى ماقسات ۇبت-عا جاقىنداعاندا عانا قامشى باسپاي, بالانىڭ قابىلەتىن ەرتەرەك بايقاپ, ولاردىڭ باعىتىن دەر كەزىندە ايقىنداۋعا كومەكتەسۋ.
«ەگەر ءبىلىم بەرۋ تەك باعدارلاما مەن تاپسىرمادان تۇرسا, ول جاي عانا ءپان بولىپ قالار ەدى. ال بالاعا ەڭ الدىمەن قولداۋ قاجەت. بىزگە وقۋشىلار كوبىنە مەكتەپتە نەمەسە ۇيدە تابا الماعان قولداۋ ءۇشىن كەلەدى. ولار كۋراتورلارمەن اشىق سويلەسىپ, ءوز قيىندىقتارىن جاسىرماي جەتكىزە الادى. سوندىقتان ءبىز ءۇشىن ەڭ ماڭىزدىسى – تەك ءبىلىم بەرۋ ەمەس, وقۋشىنىڭ جانىندا بولىپ, ونى تۇسىنە ءبىلۋ», دەيدى جۇلدىزاي مۇساەۆا.