شۇعىلا ومىربەك – قازاق سپورتىنىڭ جارقىن جۇلدىزى. ايەلدەر كۇرەسىنەن جاستار مەن ەرەسەكتەر اراسىندا الەم چەمپيوناتىنىڭ التىن مەدالى بۇيىرماي كەلگەن ەدى. ولقى سوققان تۇسىمىزدى بىلتىر وسى قىزىمىز بۇتىندەپ, تۇڭعىش الەم چەمپيونى اتاندى.
سەربيانىڭ نوۆي-ساد قالاسىندا 23 جاسقا دەيىنگى جاستار اراسىندا وتكەن جاھاندىق دودادا شۇعىلا قارسىلاستارىنىڭ ءبارىن ايقىن جەڭىپ, الەمنىڭ ۇزدىگى بولىپ تانىلدى. 55 كگ سالماق دارەجەسىندە بەلدەسۋگە تۇسكەن جەرلەسىمىز الدىمەن مولدوۆالىق ميحاەلا سامويلوۆانى داۋسىز ۇتتى. شيرەك فينالدا رۋمىن قىزى الەكساندرا ۆولكۋلەسكۋدى دە ەركىن ەڭسەرىپ, گەرمانيا بالۋانى اموري وليۆيا ءاندريچتى بەلدەسۋدىڭ العاشقى مينۋتىندا-اق كىلەمگە الىپ ۇردى. فينالدىق سىندا تۇرىك قىزى, جاستار اراسىندا ەۋروپانىڭ تەڭدەسسىز بالۋانى اتانعان تۋبا دەميردى 12:8 ەسەبىمەن جەڭدى. شۇعىلا ونىڭ الدىندا, 2024 جىلى جاستار اراسىنداعى ازيا چەمپيوناتىنىڭ كۇمىس مەدالىن يەلەنگەن ەدى.
بىرىككەن كۇرەس الەمى (UWW) 23 جاسقا دەيىنگى جاستار اراسىنداعى الەم چەمپيوناتىن 2017 جىلدان بەرى تۇراقتى وتكىزىپ كەلەدى. بۇعان دەيىن ارۋلارىمىز الەم چەمپيوناتىنىڭ فينالىنا شىققان ەمەس.
– بىلتىر تۋرا رەسپۋبليكا كۇنى قارساڭىندا الەم چەمپيونى اتانىپ, كوك تۋىمىزدى جەلبىرەتكەنىمە قۋانىشىم شەكسىز. بۇل جەتىستىك – جەكە باپكەرىم نۇرجىگىت سارسەنبەك ۇلى اعايىم ەكەۋمىزدىڭ بىرنەشە جىلدان بەرگى ەسەپسىز ەڭبەگىمىزدىڭ جەمىسى. ەندىگى مەجەمىز – 2028 جىلى وتەتىن لوس-اندجەلەس وليمپياداسى. سول اسۋعا ات بايلاۋ جولىندا تىنىمسىز تەر توگۋ قاجەت, – دەيدى بالۋان قىز.
شۇعىلا وتباسىندا جەتى اعايىندى. الدىندا اپكەسى, ءۇش ءسىڭلىسى, ەكى ءىنىسى بار. كۇرەسى ۇيىرمەسىنە كۇتپەگەن جەردەن قابىلدانىپتى. 4-سىنىپتا وقىپ جۇرگەنىندە مەكتەپتە كۇرەسكە باۋليتىن باپكەرى تالانتتى بالالاردى ىزدەپ كەلەدى.
– سايكەستىكتى قاراڭىز, ءدال سول ساتتە مەن ءبىر وقۋشىمەن شەكىسىپ قالدىم. ءبىزدى بايقاپ قالعان نۇرجىگىت ەرىمبەتوۆ «قايسار مىنەزدى ەكەنسىڭ, كۇرەسپەن شۇعىلدانعىڭ كەلە مە؟» دەدى. بىردەن كەلىسىم بەردىم دە, ەرتەڭىنە كىلەم ۇستىندە جاقتتىعۋدى باستادىم, – دەيدى كەيىپكەرىمىز.
شۇعىلا الداعى ءساۋىر ايىندا قىرعىزستاندا ەرەسەكتەر اراسىندا وتەتىن ازيا چەمپيوناتىندا باق سىنايدى.