استانادا العاشقى مەديتسينالىق-سانيتارلىق كومەك كورسەتۋشىلەر سانى ۇلعايادى

وسى باعىتتا العا قويعان مىندەتتەردىڭ ءبىرى – ەمدەۋ مەكەمەلەرىندەگى مەديتسينالىق قىزمەتتىڭ قولجەتىمدىلىگىن قامتاماسىز ەتۋ, تۇرعىندارعا ۋاقىتىلى ساپالى مەديتسينالىق قىزمەت كورسەتۋ. بۇل, اسىرەسە, قىزمەت بابى نەمەسە وقۋ, ت.ب. ءتۇرلى سەبەپتەرمەن قازاقستاننىڭ كوپتەگەن ايماعىنان كەلۋشىلەرى كوپ استانا قالاسى ءۇشىن ماڭىزدى. ماسەلەن, 2018 جىلدىڭ سوڭعى ايلارىنداعى كورسەتكىشتى الىپ قاراساق, ەمحانالارداعى جالپى پراكتيكا دارىگەرلەرىنىڭ جۇكتەمەسى وتە كوپ, 1 ۋچاسكەگە 2000-نان اسا ادام تىركەلگەن. وسى جانە وزگە دە ماسەلەلەردى رەتتەۋ ماقساتىندا, الداعى ۋاقىتتا, ياعني 2019 جىلى ەلوردامىزدا العاشقى مەديتسينالىق-سانيتارلىق كومەك ۇيىمدارىندا قوسىمشا ۋچاسكەلەر اشۋ, سونداي-اق, العاشقى مەديتسينالىق-سانيتارلىق كومەك كورسەتەتىن قوسىمشا ورتالىقتار قۇرۋ جوسپارلانىپ جاتىر. سايكەسىنشە, ۋچاسكەلىك دارىگەرلەر مەن پەدياترلار, ماماندار بەكىتىلگەن كەستەگە ساي اۋرۋلاردى باسقارۋ باعدارلامالارى مەن بىلىكتىلىكتەرىن جەتىلدىرەدى. 

«بۇل شارالار جوسپارى قازاقستان رەسپۋبليكاسى پرەزيدەنتىنىڭ 2018 جىلعى 12 قازانداعى № 772 جارلىعىمەن بەكىتىلگەن, مەملەكەت باسشىسىنىڭ 2018 جىلعى 5 قازانداعى "قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ" اتتى قازاقستان حالقىنا جولداۋىن ىسكە اسىرۋ جونىندەگى شارالار تۋرالى جالپىۇلتتىق جوسپارىنىڭ 42-تارماعىنا سايكەس شىعارىلعان قر دەنساۋلىق ساقتاۋ ءمينيسترى ە.ءبىرتانوۆتىڭ «وڭىرلەر بولىنىسىندە العاشقى مەديتسينالىق-سانيتاريالىق كومەكتىڭ قولجەتىمدىلىگىن ارتتىرۋ بويىنشا شارالار كەشەنىن ىسكە اسىرۋ» تۋرالى 2018 جىلعى 14 جەلتوقسانداعى № 716 بۇيرىعى نەگىزىندە بەكىتىلەدى. استانا قالاسىندا 2019 جىلدىڭ سوڭىنا دەيىن العاشقى مەديتسينالىق-سانيتارلىق كومەك كورسەتەتىن 68 قوسىمشا ۋچاسكە اشۋ جانە 11 قوسىمشا ورتالىق قۇرۋ جوسپارلانۋدا. ناتيجەسىندە 1 جالپى پراكتيكا دارىگەرىنە تىركەلگەن تۇرعىندار سانى 1700 شاماسىندا بولادى. ال دارىگەرلەر, ياعني دارىگەر جۇكتەمەسى ازايىپ, مەديتسينالىق قىزمەت ساپاسى ارتادى دەپ كۇتىلۋدە. قور تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينالىق قىزمەتتەردىڭ اقىسىن تولەيتىن قارجى وپەراتورى مىندەتىن اتقارۋدى جالعاستىرا وتىرىپ, ەلوردا ەمحانالارى مەن اۋرۋحانالارىنىڭ قىزمەت ساپاسىن نازاردان تىس قالدىرمايدى», - دەيدى «الەۋمەتتىك مەديتسينالىق ساقتاندىرۋ قورى» كەاق استانا قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.

سونىمەن بىرگە, تۇرعىندار دا ەمدەۋ مەكەلەرىنىڭ قىزمەتىن باعالاي الادى. ول ءۇشىن «حالىقتىق باقىلاۋ» قوسىمشاسىن Android پلاتفورماسىنا نەگىزدەلگەن سمارتفوندارعا Playmarket ارقىلى, ال iOS پلاتفورماسى ءۇشىن AppStore ارقىلى جۇكتەپ الۋعا بولادى. وسى قوسىمشانىڭ كومەگىمەن پاتسيەنتتەر ەمحانالار مەن اۋرۋحانالاردى كورسەتىلگەن قىزمەت دەڭگەيىن, قابىلداۋعا كەتكەن ۋاقىت, ت.ب. ولشەمدەر بويىنشا باعالاپ, ءوز پىكىرىن ەركىن جازىپ قالدىرا الادى. ءوز كەزەگىندە قور پاتسيەنتتەر پىكىرىن مىندەتتى تۇردە ەسكەرەدى جانە تۇرعىن حالىقتى دا ءوز دەنساۋلىقتارىن كۇتۋگە شاقىرادى. ويتكەنى, الەۋمەتتىك مەديتسينالىق ساقتاندىرۋ قورى جۇمىسىنىڭ العىشارتى – دەنى ساۋ مىقتى ۇلت قالىپتاستىرۋ.

ەستەرىڭىزگە سالا كەتەيىك, 2019 جىلدىڭ 1 قاڭتارىنان باستاپ بىرىڭعاي جيىنتىق تولەم جۇيەسى ەنگىزىلەدى. ول ءوزىن ءوزى جۇمىسپەن قامتۋشىلارعا باعىتتالعان ءتورت ءتۇرلى تولەمدى – جەكە تابىس سالىعى, مىندەتتى زەينەتاقى جارناسى, مەديتسينالىق جانە الەۋمەتتىك ساقتاندىرۋ قورىنا جاسالاتىن جارنالاردى بىرىكتىرەدى. وسىلايشا, ازاماتتار ۋاقىتى مەن قارجىسىن ۇنەمدەپ قانا قويماي, بولاشاقتا جەكە باسىنا قاجەتتى تولەمدەردەن قول ۇزبەيدى.

جانارگۇل ۇمبەتوۆا,

"الەۋمەتتىك مەديتسينالىق ساقتاندىرۋ قورى" كەاق

استانا قالاسى بويىنشا فيليالىنىڭ

حالىقتى اقپاراتتاندىرۋ جانە ولاردىڭ وتىنىشتەرىن

قاراۋ ءبولىمىنىڭ باس ساراپشىسى