استانادا مادەنيەت جانە سپورت مينيسترلىگىنىڭ ۇيىمداستىرۋىمەن ءداستۇرلى رەسپۋبليكالىق پاتريوتتار فورۋمى ءوتتى. جيىن بارىسىندا ەلىمىزدىڭ ءار وڭىرىنەن كەلگەن ءتۇرلى سالانىڭ ۇلگىلى ازاماتتارى «جىل پاتريوتى» نوميناتسياسىمەن ماراپاتتالدى.
فورۋمنىڭ اشىلۋ سالتاناتىندا مادەنيەت جانە سپورت ءمينيسترى ارىستانبەك مۇحامەدي ۇلى ەڭ الدىمەن قاتىسۋشىلاردى قازاقستان رەسپۋبليكاسىنىڭ تاۋەلسىزدىك كۇنىمەن قۇتتىقتاپ, مەملەكەتتىك رامىزدەردىڭ ماڭىزىن اتاپ ءوتتى.
«مەملەكەتتىك رامىزدەر – ەلىمىزدىڭ ەڭ قادىرلى, ەڭ قاستەرلى سيمۆولدارى. اسپان تۇستەس بايراعىمىزدىڭ, ەلتاڭبامىز بەن ءانۇرانىمىزدىڭ ءاربىر ەلەمەنتىندە ەلباسىنىڭ, سونداي-اق وسى ىسكە اتسالىسقان ءاربىر ازاماتتىڭ وتانعا دەگەن ماحابباتى مەن ارمان-مۇراتى جاتىر. مادەنيەت جانە سپورت مينيسترلىگى مەملەكەتتىك رامىزدەردى ناسيحاتتاۋدى ۇيلەستىرەتىن نەگىزگى ورگان بولعاندىقتان, وتانداستارىمىزدىڭ وسى قاسيەتتى سيمۆولدارعا دەگەن قۇرمەتىن ارتتىرۋعا ارنالعان جيىننىڭ ماڭىزى زور», دەدى ا.مۇحامەدي ۇلى.
بۇدان ءارى مينيستر قازاقستان رەسپۋبليكاسىنىڭ مەملەكەتتىك ەلتاڭباسىنداعى قازاقستان جازۋىنىڭ لاتىن گرافيكاسىنا اۋىستىرىلۋى تۋرالى اڭگىمەلەدى.
«مەملەكەت باسشىسىنىڭ «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىعىنىڭ اياسىندا مينيسترلىك بيىل مەملەكەتتىك ەلتاڭباداعى «قازاقستان» ءسوزىن لاتىن گرافيكاسىندا جازۋ تۋرالى «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭىنا وزگەرىستەر ەنگىزىپ, ءتيىستى جۇمىستار جۇرگىزدى. وسىعان بايلانىستى ەلىمىزدىڭ ءار وڭىرىندە حالىقتىڭ بويىندا وتانشىلدىق رۋحتى قالىپتاستىرۋ, مەملەكەتتىك رامىزدەرگە دەگەن قۇرمەتتى نىعايتۋ مەن كەڭىنەن ناسيحاتتاۋعا ارنالعان اقپاراتتىق, تانىمدىق ءىس-شارالاردى وتكىزۋ اسا ماڭىزدى», دەدى ول.
2018 جىلدىڭ 12 قىركۇيەگىندە تەحنيكالىق رەتتەۋ جانە مەترولوگيا كوميتەتىنىڭ توراعاسى ا.شاققاليەۆ, مەملەكەتتىك ەلتاڭبانىڭ اۆتورى ج.مالىبەكوۆ جانە «قازاقستان ستاندارتتاۋ جانە سەرتيفيكاتتاۋ ينستيتۋتى» وكىلدەرى قاتىسقان جيىندا «قازاقستان رەسپۋبليكاسىنىڭ مەملەكەتتىك ەلتاڭباسى. تەحنيكالىق جاعدايلار» زاڭىنا وزگەرتۋلەر ەنگىزۋ قاجەتتىگى ايتىلىپ, كوپ ۇزاماي ەلتاڭبانىڭ جاڭارتىلعان ۇلگىسى شىعارىلا باستادى. جانداربەك مالىبەكوۆ ەلباسىنىڭ باستاماسىمەن جۇزەگە اسىپ جاتقان بۇل يگى ءىس قازاق ءالىپبيىنىڭ جاڭا بەلەسى ەكەنىن اتاپ ءوتتى.
«ەلتاڭبانىڭ جاڭارتىلعان ستاندارتتىق ۇلگىسىن جاساپ بەرۋ ىسىمەن شۇعىلدانىپ جاتىرمىز. لاتىن قارپىنىڭ ەلتاڭبادا ورنالاسۋى ءبىزدىڭ ءالىپبيىمىزدىڭ بوستاندىق العانى دەپ بىلەمىن. ونىڭ ەلتاڭباداعى كورىنىسى بۇكىل قازاق دالاسىنىڭ قازىرگى كەزدەگى بوستاندىعىن كورسەتەدى», دەدى ج.مالىبەكوۆ. بۇدان سوڭ جيىن بارىسىندا پارلامەنت ءماجىلىسىنىڭ دەپۋتاتتارى, ورتالىق مەملەكەتتىك ورگانداردىڭ وكىلدەرى, ۇكىمەتتىك ەمەس جانە جاستار ۇيىمدارىنىڭ جەتەكشىلەرى, ەڭبەك ارداگەرلەرى مەن زيالى قاۋىم وكىلدەرى مەملەكەتتىك رامىزدەر سالاسىندا اتقارىپ جاتقان قىزمەتتەرى تۋرالى ءوزارا پىكىر الماستى.
قالقامان جاقىپ,
«جىل پاتريوتى» نوميناتسياسىنىڭ يەگەرى, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورى:
– وسىدان ءبىر جارىم جىل بۇرىن ەلباسىنىڭ «بولاشاققا باعدار: رۋحاني جاڭعىرۋ» اتتى ەڭبەگى جارىق كورگەن بولاتىن. وسى ەڭبەكتىڭ نەگىزىندە قوعامدىق جانە ۇلتتىق سانانىڭ جاڭارۋىندا سىلكىنىس پايدا بولدى دەۋگە بولادى. سونىڭ جالعاسى رەتىندە بيىل جارىق كورگەن « ۇلى دالانىڭ جەتى قىرى» ماقالاسىندا پرەزيدەنت قازاق ۇلتىنىڭ ءتول تاريحى تەرەڭدە جاتقانىن كورسەتىپ بەردى. وسى ەڭبەك ۇلتتىق سانامىزدىڭ جوعارى ساتىعا كوتەرىلۋىنە اسەر ەتەتىنى بەلگىلى. مىنەكي, 27 جىلعا جۋىق تاۋەلسىز ەل بولىپ وتىرمىز. ەل بولۋ ءۇشىن ءبىرىنشى كەزەكتە ونىڭ رامىزدەرى بولۋى كەرەك. ونسىز ۇلتتىڭ ەلدىگى مەن مەملەكەتتىلىگى بولمايدى. سوندىقتان بۇگىنگى پاتريوتتار فورۋمىندا ەلدىڭ رامىزدەرىنە دەگەن قۇرمەت ەرەكشە. مۇندا جينالعانداردىڭ ىشىندە جاستار, ۇكىمەتتىك ەمەس ۇيىمدار, ەتنومادەني ورتالىقتاردىڭ جەتەكشىلەرى بار. سونداي-اق ءارتۇرلى سالانىڭ قىر-سىرىن مەڭگەرگەن ەڭبەكقور ازاماتتار كەلىپ وتىر. ءتىپتى مەن سەكىلدى زەينەتكەرلەر دە كورىنىپ قالادى. بۇل دەگەنىمىز – ۇرپاقتار اراسىنداعى جالعاستىقتى ۇزبەۋ, ۇرپاقتار ساباقتاستىعىن جالعاۋ. ەڭ باستىسى – وسىنداي شارالار ءوسىپ كەلە جاتقان جاستارعا وتانسۇيگىشتىكتى دارىپتەپ, ەلى مەن جەرىنە ادال قىزمەت ەتۋگە, قازاقستاننىڭ پاتريوتى بولىپ قالىپتاسۋىنا ۇلكەن اسەرىن تيگىزەدى.
ەلباسى – بۇگىندە تەك قازاقستاننىڭ عانا كوشباسشىسى ەمەس, تۇركى الەمىنىڭ, تۇركىتىلدەس ەلدەردىڭ كوشباسشىسى ەكەنىن ءوز ەڭبەگىمەن كورسەتە بىلگەن تۇلعا. سونىڭ كورىنىسى مەن ايعاعى رەتىندە كەلەسى جىلى بولاتىن تۇركىتىلدەس ەلدەردىڭ كونگرەسىن ايتا الامىز. وسى سەكىلدى كەزدەسۋلەر مەن باسقوسۋدا ءوزىمنىڭ دە كوڭىلىم ەرەكشە اسەرگە بولەنەدى. جاستاردىڭ ەلىنە دەگەن سۇيىسپەنشىلىك سوزدەرى مەن ىستەرىن كورگەندە كەلەشەككە دەگەن ۇلكەن سەنىم ۇيالايدى. شىنىن ايتۋ كەرەك, كەۋدەڭدى ماقتانىش كەرنەيدى. ءبىزدىڭ جاستار جاقسى, ءبىزدىڭ جاستار تاماشا. بىراق سولاردى تاربيەلەپ, ۇلگى كورسەتۋدە ءبىزدىڭ دە اتقارار ۇلەسىمىز كوپ.
الەنا كيم,
«B Tim Enterprises» جشس-نىڭ ديرەكتورى (اقتاۋ قالاسىنان):
– بۇگىن ءبىز وتە قىزىقتى فورۋمعا قاتىسىپ وتىرمىز. مۇندا ءارتۇرلى وڭىردەن كەلگەن دەلەگاتتارمەن ءوزارا پىكىر الماسىپ, زياتكەرلىك قابىلەتىمىزدى ارتتىرا تۇستىك. سونداي-اق ءۇش تىلگە دەگەن قىزىعۋشىلىق تۋرالى پىكىر الماسۋدى كوزدەپ وتىرمىز. مىسالى, مەن اعىلشىن جانە قازاق ءتىلىن ۇيرەنىپ ءجۇرمىن. جاڭاشىلدىقتى دا ەسكەرۋ كەرەكتىگىن بىلەمىن. ويتكەنى جاقىندا قازاق ءتىلى لاتىن الىپبيىنە تولىق كوشەدى. سوندىقتان وسىنداي وزگەرىستەن اينالامىزداعى دوستارىمىزدىڭ دا قالىس قالماعانى ءجون. ال بۇگىنگى فورۋمعا كەلگەن جاستارمەن وسىنىڭ توڭىرەگىندە سويلەسە الامىز. فورۋمعا كەلگەنىمە وتە قۋانىشتىمىن. مۇندا جينالعانداردىڭ جاسى بولسىن, ۇلكەنى بولسىن ەلىمىزدىڭ وركەندەۋىنە ەلەۋلى ۇلەس قوسىپ كەلە جاتقان ادامدار. ولار استانا قالاسىنىڭ 20 جىلدىعىنا تۇسپا-تۇس كەلىپ وتىرعان مەرەكەلىك شارانىڭ قوناعى مارتەبەسىنە يە بولىپ وتىر.
ەلميرا مىرزاعالي,
تاراز قالالىق ماسليحاتىنىڭ دەپۋتاتى:
– جامبىل وبلىسىنان 4 دەلەگات كەلىپ وتىرمىز. بۇل پاتريوتتار فورۋمى ءبىزدىڭ جۇمىسىمىزعا جاڭا سەرپىن بەرەدى دەپ ويلايمىن. ەلباسىمىزدىڭ سارابدال ساياساتىنا سايكەس تاراز قالاسىندا مەملەكەتتىك رامىزدەردى قاستەرلەۋ جۇمىستارى جولعا قويىلعان. مەملەكەتتىك رامىزدەردىڭ مارتەبەسىن كوتەرۋ جۇمىستارى تەك مەملەكەتتىك دەڭگەيدە قالىپ قويماۋى كەرەك. بۇل يگى ءىس ءار وتباسىنان باستالۋى كەرەك دەپ ويلايمىن. مەن انا رەتىندە دە بالالارىما مەملەكەتتىك تۋىمىزدى, ەلتاڭبامىزدى, ءانۇرانىمىزدى ۇلىقتاۋ كەرەك ەكەنىن ءاردايىم ايتىپ وتىرامىن. پاتريوتتىق تاربيەنى بالا ەڭ الدىمەن وتباسىنان كورۋ كەرەك.
فورۋم سوڭىندا ءتۇرلى سالادا قىزمەت ەتىپ جۇرگەن ۇلگىلى 20 ازاماتقا «جىل پاتريوتى» نوميناتسياسى بەرىلىپ, باعالى سىيلىقتار تابىستالدى. ءىس-شارا پاتريوتتىق اندەردەن تۇراتىن كونتسەرتپەن اياقتالدى.
مارجان تىلەۋبەك,
جانبولات كەنجەعۇل,
«ەگەمەن قازاقستان»