بابالار ءجۇرىپ وتكەن شەجىرەلى جولدى كەستەلى سوزبەن كوركەمدەپ, وقىرمان قاۋىمنان لايىقتى باعاسىن العان جازۋشى رەتىندە انەس سارايدىڭ ەسىمى قۇرمەتپەن اتالادى. رەسەيدىڭ استراحان ايماعىندا دۇنيەگە كەلگەنىمەن, ارعى اتالارى كاسپيدىڭ جاعالاۋىنداعى اتىراۋ توپىراعىنان تاراعان. «ەدىل-جايىق» تريلوگياسىنىڭ تۇساۋى اتىراۋدا كەسىلگەنى دە كەزدەيسوقتىق ەمەس.
قوس وزەن اراسىنداعى ارعى-بەرگى تاريحتى انەس سارايداي جەتەسىنە جەتكىزىپ جازعان قالامگەر از. اتىراۋ وبلىستىق اكىمدىگى, وبلىستىق مادەنيەت, ارحيۆتەر جانە قۇجاتتاما باسقارماسى جازۋشىنىڭ قۇرمەتىنە شىعارماشىلىق كەش ۇيىمداستىردى. «ەدىل-جايىق» تريلوگياسىنىڭ تۇساۋكەسەر ءراسىمىن مەملەكەتتىك سىيلىقتىڭ لاۋرەاتى, جازۋشى قاجىعالي مۇحانبەتقاليەۆ پەن قازاقستان جازۋشىلار وداعىنىڭ باسقارما توراعاسى, مەملەكەتتىك سىيلىقتىڭ لاۋرەاتى ۇلىقبەك ەسداۋلەت جاسادى.
– انەس سارايدىڭ قازاق تاريحى تۋرالى, كوك تۇركىلەردەن قوزعاپ, نوعايلى جۇرتىنىڭ شەجىرەسىن بايانداعان ەڭبەكتەرىنىڭ قۇندىلىعى كۇننەن-كۇنگە ارتا بەرمەك. بۇل كىسىنىڭ ەڭبەكقورلىعىنا ءبارىمىز ءتانتىمىز. قالام قۋاتىنىڭ ارقاسىندا تالاي روماندار مەن حيكاياتتاردى, اڭگىمەلەردى بەردى. ولاردىڭ بارىنەن دە ۇلتتىق رۋحتىڭ سامالى ەسىپ تۇرادى, – دەدى قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت.
ادەبي-سازدى كەشتە ماحامبەت اتىنداعى اكادەميالىق قازاق دراما تەاترىنىڭ ارتىستەرى جازۋشىنىڭ ءومىرى مەن شىعارماشىلىعى ارقاۋ بولعان قويىلىمدى ۇسىندى. جەرگىلىكتى ءانشى-كۇيشىلەردىڭ ونەرىمەن ءورىلىپ وتىرعان شارادا وبلىس اكىمىنىڭ ورىنباسارى نۇرساۋلە سايلاۋوۆا سويلەپ, «حالقىمىزدا «جاقسى – ورتاق, اي مەنەن كۇندەي, امبەگە بىردەي» دەگەن ءسوز بار. انەس اعانىڭ ەڭبەكتەرىن وقىعان جاننىڭ كوكىرەك كوزى اشىلادى, ءوز تاريحىنا سەرگەك كوزقاراسپەن قاراي باستايدى. وسىنىڭ ءوزى قالامگەر مۇراتىنىڭ اقتالعانى», دەپ اتاپ ءوتتى.
– بۇگىنگى تاڭدا قازاق ادەبيەتىندە انەس سارايدان بيىك, انەس سارايدان تەرەڭ, انەس سارايدان كەڭ ەشكىم جوق. مۇحتار اۋەزوۆ پەن ءابىش كەكىلباەۆتان كەيىنگى عۇلاما جازۋشى. بۇل كىسى شىعارمالارى ارقىلى ءوزىڭنىڭ قازاق ەكەنىڭدى ۇقتىرادى, وقىعاندا قازاق بولعانىڭا ارقالانىپ, جالدانىپ كەتەسىڭ, – دەيدى قازاقستان جازۋشىلار وداعى باسقارما توراعاسىنىڭ ورىنباسارى, پرەزيدەنت سىيلىعىنىڭ لاۋرەاتى مەرەكە قۇلكەنوۆ.
جاس قالامگەرلەردىڭ جازۋشى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, «بارىس», «پاراسات» وردەندەرىنىڭ يەگەرى انەس تولەندى ۇلىنان ۇلگى ەتەر تاعى ءبىر قاسيەتى – ەڭبەكقورلىعى. جازۋ ۇستەلىنە وتىرمايتىن كۇنى بولمايتىن قالامگەر بۇگىنگە دەيىن 25 توم كىتاپ جازعان. «سونىڭ 17 تومى جارىققا شىقتى. الدا ءالى دە يدەيالار بار. تاعدىرىما قانشا جىل جازىلعانىن بىلمەيمىن, بىراق مەنىڭ بار ءومىرىم ەڭبەكتەنۋدەن تۇرادى», دەدى كەش سوڭىندا ءسوز العان جازۋشىنىڭ ءوزى.
شاراعا قالامگەردىڭ جارى, بەلگىلى جۋرناليست, جازۋشى, قوعام قايراتكەرى التىنشاش جاعانوۆا, قازاقستاننىڭ ەڭبەك سىڭىرگەن قايراتكەرى, اقىن اقۇشتاپ باقتىگەرەەۆا, پارلامەنت سەناتىنىڭ دەپۋتاتى سارسەنباي ەڭسەگەنوۆ, اكادەميك عاريفوللا ەسىم قاتىسىپ, لەبىزدەرىن ءبىلدىردى.
باقىتگۇل باباش,
«ەگەمەن قازاقستان»
اتىراۋ