ناسساۋدا دزيۋدودان جاستار اراسىندا وتكەن الەم چەمپيوناتىندا قازاقستان قۇراماسى ارالاس كوماندالىق سايىستا قولا مەدال جەڭىپ الدى. قازاقستاندىق دزيۋدوشىلار جۇبانىش فينالىندا فرانتسيا قۇراماسىن 5:3 ەسەبىمەن ۇتىپ, جارىستىڭ قولا جۇلدەگەرى اتاندى, دەپ حابارلايدى قازاقستان دزيۋدو فەدەراتسياسى.
الەم چەمپيوناتىنىڭ شيرەك فينالىندا قازاقستان گەرمانيا قۇراماسىن 5:1 جەڭىپ, جارتىلاي فينالعا جولداما الدى. الايدا, جارتىلاي فينالدا برازياليا قۇراماسىنا 1:5 ەسەبىمەن جەڭىلىپ, جارىستىڭ قولا جۇلدەسى ءۇشىن كۇرەسۋگە مۇمكىندىك العان بولاتىن.
ارالاس كوماندالىق سايىستا قازاقستان جاستار قۇراما ساپىندا ارسلان ەسەنگەل, نارباەۆ باۋىرجان, اڭساربەك عاينۋللين, جانبولات باعتبەرگەنوۆ, ەراسىل بولات, دىناحمەت رىسسىمبەك, سانجار جابباروۆ, عاليا تىنباەۆا, اقمارال ناۋاتبەك, ايدا كارچاەۆا, ءمولدىر نارىنوۆا جانە كاميلا بەرلىقاش كۇرەستى.
ەستەرىڭىزگە سالا كەتسەك, 17-21 قازان كۇندەرى ناسساۋ قالاسىندا (باگاما ارالدارى) دزيۋدودان جاستار اراسىندا الەم چەمپيوناتى ءوتتى. الەمنىڭ 67 ەلىنەن 500-گە جۋىق جاس تاتامي شەبەرى قاتىستى. جىلدىڭ ەڭ ماڭىزدى بايراقتى باسەكەسىندە قازاقستان قۇراماسىنىڭ قورجىنىنا ەكى قولا جۇلدە ءتۇستى. وسىعان دەيىن 73 كەلىنە دەيىنگى سالماقتا ەل نامىسىن قورعاعان جانبولات باعتبەرگەنوۆ قولا جۇلدەگەر اتانسا, بۇگىن ارالاس كوماندالىق سايىستا قازاقستان قۇراماسى تاعى ءبىر قولانى جەڭىپ الدى.