ورتالىق كوممۋنيكاتسيالار قىزمەتىندە ەنەرگەتيكا ءمينيسترى قانات بوزىمباەۆ, ۆيتسە-مينيستر بولات اقشولاقوۆ, مينيسترلىكتىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ توراعاسى سۇڭعات ەسىمحانوۆتىڭ قاتىسۋىمەن «جىلىتۋ ماۋسىمىنا دايىندىق بارىسىنا ارنالعان ءباسپاسوز ءماسليحاتى ءوتتى.
ءباسپاسوز ءماسليحاتىن وتكىزۋشىلەردىڭ مالىمدەۋىنشە, جىل باسىنان بەرى رەسپۋبليكادا ەلەكتر ەنەرگياسىن ءوندىرۋ كولەمى 74 ملرد كۆت/ساع قۇرادى, ال تۇتىنۋ كولەمى 70 ملرد كۆت/ساعات بولدى. بۇل – وتكەن جىلدىڭ وسى مەرزىمىندەگىدەن 6%-كە جوعارى.
الداعى جىلىتۋ ماۋسىمىنا دايىندىق بارىسى تۋرالى اڭگىمە قوزعاعان ق. بوزىمباەۆ بۇل ماسەلەنىڭ مينيسترلىكتىڭ تۇراقتى باقىلاۋىندا بولاتىندىعىن اتاپ كورسەتتى. بۇل ىسكە ۇكىمەت تاراپىنان دا ءجىتى كوڭىل بولىنۋدە. 22 تامىزدا ۇكىمەت وتىرىسىندا جانە 27 تامىزدا پرەمەر-ءمينيستردىڭ ءبىرىنشى ورىنباسارى ا.ءماميننىڭ توراعالىق ەتۋىمەن وتكەن كەڭەستە وسى ماسەلە ارنايى قارالعان.
ەنەرگەتيكا مەن ينۆەستيتسيالار جانە دامۋ مينيسترلەرىنىڭ بىرلەسكەن بۇيرىعىمەن 2018-2019 جىلدارداعى جىلۋ بەرۋ ماۋسىمىنىڭ تۇراقتى ءوتۋىن قامتاماسىز ەتۋ ءۇشىن دايىندىقتى باقىلاۋ, جىلۋ ماۋسىمىن وتكىزۋ, ەلەكتر ستانسالارىن, كوممۋنالدىق سەكتوردى جانە حالىقتى كومىرمەن قامتاماسىز ەتۋدى قاداعالاپ, ءىستى ۇيلەستىرۋ شتابى قۇرىلدى. شتاب قۇرامىنا مينيسترلىكتەر مەن اكىمدىكتەردىڭ جاۋاپتى تۇلعالارى ەنگىزىلدى. بۇيرىق شەڭبەرىندە ەنەرگەتيكا مينيسترلىگىنە كۇزگى-قىسقى كەزەڭگە دايىندالۋ مەن ءوتۋ مونيتورينگىن جۇرگىزۋ جانە ەلدىڭ ەلەكتر ستانسالارىندا وتىننىڭ نورماتيۆتىك قورىن جيناقتاۋدى كۇندەلىكتى قامتاماسىز ەتۋ بەكىتىلگەن. ينۆەستيتسيالار جانە دامۋ مينيسترلىگى اپتالىق نەگىزدە كومىر وندىرەتىن ۇيىمداردان كومىر ءوندىرۋ مەن تيەۋگە, كومىردى كوممۋنالدىق-تۇرمىستىق سەكتورعا جانە حالىققا تيەپ-جونەلتۋگە, ۇسىنىلعان وتىنىمدەرگە سايكەس كومىر تيەۋ ۆاگوندارىمەن قامتاماسىز ەتۋ بويىنشا جۇمىستار جۇرگىزۋى ءتيىس.
بۇدان باسقا ەنەرگەتيكا مينيسترلىگى ينۆەستيتسيالار جانە دامۋ مينيسترلىگىمەن, اكىمدىكتەرمەن جانە «KEGOC», «قازاقستان تەمىر جولى», «سامۇرىق-ەنەرگو», «قازترانسگاز» ۇلتتىق كومپانيالارىمەن بىرلەسە وتىرىپ اي سايىن بارلىق ەنەرگەتيكالىق كاسىپورىندارمەن سەلەكتورلىق كەڭەس وتكىزۋ جونىندە ۇيعارىم جاسالدى.
الداعى 2018-2019 جىلدارداعى كۇزگى-قىسقى كەزەڭدە ەلىمىزدىڭ تۇتىنۋشىلارىن تۇراقتى ەنەرگيامەن جابدىقتاۋ ءۇشىن 8 ەنەرگوبلوكتى, 56 ەنەرگەتيكالىق قازاندى جانە 45 تۋربينانى كۇردەلى جانە كەڭەيتىلگەن اعىمداعى جوندەۋ جوسپارلانعان بولاتىن. قازىر ەلەكتر ستانسالارىندا 4 ەنەرگوبلوك (جىلدىق كولەمنىڭ 50%-ءى), 32 قازاندىق (57%) جانە 24 تۋربينا (53%) جوندەلدى. بۇل رەتتە تۋربينالار مەن قازاندىقتار بويىنشا جۇمىس قارقىنى وتكەن جىلعى دەڭگەيدەن 10%-كە جوعارى ەكەندىگىن اتاپ وتكەن ءجون.
سونىمەن قاتار ەلىمىزدىڭ ءبىرتۇتاس ەلەكتر ەنەرگەتيكالىق جۇيەسىن 2018-2019 جىلدارداعى كۇزگى-قىسقى كەزەڭگە دايىنداۋ ءۇشىن جالپى ۇزىندىعى 28 477 شاقىرىم ەلەكتر جەلىلەرىن جوندەۋ جوسپارلانسا, سونىڭ 24 مىڭ شاقىرىم جەلىسى جوندەلدى. بۇل جىلدىق جوسپاردىڭ 85%-ءىن قۇرايدى. مۇنىڭ سىرتىندا 4,5 مىڭ قوسالقى ستانسا دا جوندەۋدەن وتكىزىلىپ وتىر. ورتالىقتاندىرىلعان جىلۋمەن جابدىقتاۋ ايماعىندا 500 قازاندىقتىڭ 439-ى (جىلدىق جوسپاردىڭ 88%-ءى) جوندەلدى. جالپى جوندەۋ جۇمىستارىن ورىنداۋ كەستە بويىنشا جۇزەگە اسىرىلۋدا.
ەلەكتر ستانسالارىنىڭ وتىن قويمالارىندا 3,3 ملن توننا كومىر مەن 78 مىڭ توننا مازۋت جينالعان, بۇل جالپى نورماتيۆتىك كولەمگە سايكەس كەلەدى. جىلىتۋ ماۋسىمى باستالعانعا دەيىن كومىر بويىنشا نورماتيۆ كوكشەتاۋ قالاسىنىڭ مكك «كوكشەتاۋ جىلۋ» №2 قازاندىعىندا (20 تاۋلىك نورما ىشىندە 7 تاۋلىك قالعان) جاسالاتىن بولدى.
ورتالىقتاندىرىلعان جىلۋمەن جابدىقتاۋ ايماعىنداعى قازاندىقتارىندا 1,1 ملن توننا كومىر جيناقتالدى. بۇل جوسپاردىڭ 84%-ءى. ال جيناقتالعان مازۋت كولەمى 25 مىڭ توننانى قۇرادى. بۇل جوسپاردىڭ 18%-ءى عانا. وسىعان وراي سولتۇستىك قازاقستان جانە پاۆلودار وبلىستارىندا كومىر, ال اقمولا جانە قاراعاندى وبلىستارىندا مازۋت دايىنداۋ قارقىنىن ارتتىرۋ قاجەتتىگى اتاپ كورسەتىلدى.
ءباسپاسوز ءماسليحاتىنا قاتىسۋشىلار قازاقستاندا 8 ايدا شامامەن 70 ملن توننا كومىر وندىرىلگەندىگىن, بۇل وتكەن جىلدىڭ وسى كەزەڭىمەن سالىستىرعاندا 4,6%-كە ارتىق ەكەندىگىن مالىمدەدى.
سۇڭعات ءالىپباي,
«ەگەمەن قازاقستان»