ءتىلسىز جاۋدىڭ ءبىرى – سۋ. جاز ايلارىندا سالقىندايمىن دەپ سۋعا ءتۇسىپ, ونىڭ قاۋپىن ەلەمەۋدىڭ سالدارى تالايلاردى وكىنىشكە قالدىرىپ جۇرگەنى بەلگىلى.
وسىنداي وقىس وقيعانىڭ ءبىرى جۋىردا شيەلى اۋدانىندا دا قايتالانا جازدادى. بايگەقۇم كولىنە قىزىلوردا قالاسىنان كەلگەن ءبىر توپ دەمالۋشىلاردىڭ اراسىنداعى ك. ەسىمدى 22 جاسار جىگىت كول ورتاسىندا قايىقتان سەكىرىپ ءتۇسىپ, جاعاعا دەيىن ءجۇزىپ بارماقشى بولادى. جاس ادام كول سۋىنىڭ اقپايتىن, اۋىر بولاتىندىعىن ەسكەرمەگەن سەكىلدى.
باستاپقىدا مالتىعانىمەن سالدەن سوڭ-اق قۇلاشى جازىلماي سۋعا باتا باستايدى. ونى جاعاعا شىعارعانشا, جىگىتتىڭ اياق-قولىنىڭ تامىرلارى تارتىلىپ, جۇرەك سوعىسى دا باسەڭسىگەن. ابىروي بولعاندا وسى ماڭدا سەرۋەندەپ جۇرگەن ەرلى-زايىپتى دارىگەرلەر قوشقارباەۆتار وقيعا ورنىنان تابىلىپ, العاشقى جەدەل كومەكتى وتە ساۋاتتى اتقارىپ شىعادى. قىزىلوردا وبلىستىق ورتالىق اۋرۋحاناسىندا حيرۋرگ قىزمەتىن اتقاراتىن نۇربول مەن وبلىستىق بالالار اۋرۋحاناسىنىڭ ءۋزيستى ايجان وسىلايشا ادام دەنساۋلىعىنا تونگەن قاۋىپتىڭ بۇلتىن سەيىلتتى. ىلە-شالا توتەنشە جاعداي ورگانى قۇتقارۋشىلارىنىڭ كومەگىمەن شيەلى اۋداندىق اۋرۋحاناسىنا جەتكىزىلدى.
شيەلى اۋدانى اۋرۋحاناسىنىڭ تەراپيا ءبولىمىنىڭ مەڭگەرۋشىسى باقىت يسماگۋلوۆانىڭ ايتۋىنشا, جىگىت اۋرۋحاناعا ءتۇس مەزگىلىندە, وتە اۋىر جاعدايدا كەلىپ تۇسكەن. جالعاس ابدۋحوجاەۆ پەن ەرلان سارتباەۆ ەسىمدى دارىگەرلەر اۋىر جاعدايدا جاتقان جىگىتتى رەانيماتسيا بولىمىنە قابىلداپ الىپ, شۇعىل ارەكەت جاساعان. جىگىتتىڭ تىنىس الۋ جولدارىنا زاقىم كەلىپ, وزدىگىنەن دەم الا الماعاندىقتان يۆل اپپاراتى قوسىلعان. ەرتەسىنە عانا ارنايى اپپارات الىنىپ, جىگىت ءوزى دەمالاتىن جاعدايعا جەتتى. ەسىن دە جينادى. رەانيماتسيا بولىمىندە 4 كۇن بويى جاتىپ, بەسىنشى كۇنى تەراپيا بولىمىنە اۋىستىرىلدى.
جىگىتتىڭ جاعدايى جاقسارۋى ءۇشىن شيەلى اۋدانى اۋرۋحاناسىنىڭ قىزمەتكەرلەرى بارىنشا تەر توكتى. ناۋقاس وتە كوپ مولشەردە سۋ جۇتىپ قويعاندىقتان ەم-شارا قابىلداۋ بارىسىندا اقتىلەك دانياروۆا فيزيكالىق كابينەتتە ارنايى جاتتىعۋلار جاساتىپ, تىنىس الۋ جولدارىن رەتكە كەلتىردى. ەم-شارانىڭ بارلىعى ناتيجەلى اياقتالىپ, 15 شىلدە كۇنى ول اۋرۋحانادان شىعارىلدى.
بالانىڭ اتا-اناسى قۇتقارعان ادامدارعا جانە شيەلى اۋداندىق اۋرۋحاناسىنىڭ دارىگەرلەرىنە ۇلكەن ريزاشىلىعىن ءبىلدىرىپ وتىر. قاشاندا «ادام-ادامعا دوس, باۋىر» دەگەن قاعيدانىڭ سالتانات قۇرۋى ءبىر-بىرىمىزگە دەگەن مەيىرىمىمىزدى وياتا تۇسەدى. «ساقتانساڭ – ساقتايمىن» دەمەكشى, جاماندىق ايتىپ كەلمەيدى. سول سەبەپتى بارىنشا اباي بولىپ, قانداي جاعداي بولماسىن ساقتىق شارالارىنا قامدانىپ جۇرگەنىمىز ابزال.
نۇرماحان نازىمحان ۇلى
قىزىلوردا وبلىسى, شيەلى اۋدانى