ءبىلىم جانە عىلىم مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ ۇيىمداستىرۋىمەن مەكتەپ جانە كوللەدج وقۋشىلارى اراسىندا وتكەن قازاقستان رەسپۋبليكاسىنىڭ IX جازعى سپارتاكياداسى ءوز مارەسىنە جەتتى.
ءتورت ايدان اسا ۋاقىتقا سوزىلعان سپارتاكيادادا 47 سپورت تۇرىنەن 54 جارىس وتكىزىلىپ, بارلىعى 3386 مەدال ساراپقا سالىندى. وسى باسەكەلەر بارىسىندا 520 كوماندا ساپىندا 6448 سپورتشى ونەر كورسەتتى. سولاردىڭ اراسىنان تۇركىستان وبلىسى وكىلدەرىنىڭ شوقتىعى بيىك بولىپ, كوماندالىق ەسەپتىڭ وڭتۇستىكتىڭ وعلاندارى باس جۇلدەنى ولجالادى. الماتى قالاسى مەن قىزىلوردا وبلىسى ەكىنشى جانە ءۇشىنشى ورىنداردى يەلەنسە, ودان كەيىنگى ساتىلارعا مىنا ءوڭىردىڭ ورەندەرى جايعاستى:
4. الماتى وبلىسى,
5. جامبىل وبلىسى,
6. سولتۇستىك قازاقستان وبلىسى,
7. استانا قالاسى,
8. شىعىس قازاقستان وبلىسى,
9. پاۆلودار وبلىسى,
10. اقتوبە وبلىسى,
11. قاراعاندى وبلىسى,
12. ماڭعىستاۋ وبلىسى,
13. باتىس قازاقستان وبلىسى,
14. اتىراۋ وبلىسى,
15. اقمولا وبلىسى
16. قوستاناي وبلىسى.
سپارتاكيادانىڭ جابىلۋ سالتاناتى قىزىلوردا قالاسىنداعى «ەۆرازيا» سپورت كەشەنىندە ءوتتى. بۇل شاراعا قىزىلوردا وبلىسى اكىمىنىڭ ورىنباسارى رۋسلان رۇستەموۆ, ۇلتتىق عىلىمي-پراكتيكالىق دەنە تاربيەسى ورتالىعىنىڭ باس ديرەكتورى, «قر قۇرمەتتى سپورت قايراتكەرى» سادىق مۇستافاەۆ, مەكتەپ سپورت فەدەراتسياسىنىڭ پرەزيدەنتى نۇرجان نۇراحمەتوۆ جانە تاعى دا باسقا رەسمي تۇلعالار قاتىستى. ولار جارىس جەڭىمپازدارى مەن جۇلدەگەرلەرىن قۇتتىقتاپ, وسى باسەكەلەردىڭ ويداعىداي وتۋىنە اتسالىسقان ۇيىمداستىرۋشىلارعا, مەكتەپ جانە كوللەدج باسشىلارىنا, وقىتۋشىلار مەن جاتتىقتىرۋشىلارعا ءبىلىم جانە عىلىم ءمينيسترى ەرلان ساعاديەۆتىڭ گراموتاسىن تابىس ەتتى.
عالىم سۇلەيمەن,
«ەگەمەن قازاقستان»