اقوردا, بايتەرەك, حان شاتىر, بەيبىتشىلىك جانە كەلىسىم سارايى, مينيسترلىكتەر ءۇيى, زاماناۋي تۇرعىن ءۇي كەشەنى سەكىلدى ساۋلەتتى عيماراتتار اتىراۋدا دا بار. ارينە استاناداعىداي اسپانمەن تالاسقان عاجايىپ نىساندار ەمەس, بار بولعانى قاعازدان جاسالعان كوشىرمە. بىراق سول قاعاز ۇيلەردە قانشا بالانىڭ ارمانى مەن ماحابباتى جاتىر.
اتىراۋداعى نازارباەۆ زياتكەرلىك مەكتەبىنىڭ وقۋشىلارى استانانىڭ 20 جىلدىعىنا ارنالعان مەرەكەلىك ونكۇندىكتە ەلوردا تورىندە تۇرعان ءزاۋلىم عيماراتتاردى قولدان جاساپ شىقتى. «ماكەتتەردى دايىنداۋعا قالقان مەن جەلىم عانا قاجەت بولدى, – دەيدى ونەر ءپانىنىڭ مۇعالىمى دانيار ولجاعاليەۆ. – الدىمەن ءار نىساننىڭ سىزباسىن جاساپ الدىق. سودان سوڭ كەرەك ماتەريالداردىڭ كولەمىن انىقتادىق. توپتىق جۇمىستىڭ ناتيجەسىندە وسىنداي بۇيىمدار شىقتى. بۇل تۋىندىلار بالالاردى قولونەرگە ماشىقتاندىرۋمەن قاتار, ماتەماتيكا مەن بەينەلەۋ پاندەرىندە العان بىلىمدەرىن تاجىريبەدە پىسىقتاۋعا مۇمكىندىك بەرەدى».
عيماراتتاردىڭ ىشىندە ەرەكشە كوزگە تۇسەتىنى – «اقوردا» رەزيدەنتسياسى. اقوردانى «تۇرعىزۋعا» وقۋشىلاردىڭ ون كۇندەي ۋاقىتى كەتكەن. كوشىرمەنىڭ تۇپنۇسقاعا ۇقساۋى ءۇشىن ءتۇرلى-ءتۇستى بوياۋلار مەن 12 ۆولتتىق ديود شامدار قولدانىلىپتى. ماكەتتىڭ سالماعى 5 كيلو. ۇزىندىعى 1,5 مەتر, ال ەنى 1 مەتر.
زياتكەرلىك مەكتەپتە استانانىڭ 20 جىلدىعىنا وراي كورمە اشىلدى, ول جىل اياعىنا دەيىن بالالار جاساعان بۇيىمدارمەن تولىعادى.
باقىتگۇل باباش,
«ەگەمەن قازاقستان»
اتىراۋ