قازىر جەدەل جاردەم ستانسالارىندا مامانداردىڭ جەتىسە بەرمەيتىنى بەلگىلى جايت. ودان رۋدنىي ستانساسى دا قۇرالاقان ەمەس. سوندىقتان يرينا يۋرەۆنا عۇمىر بويى جاس ماماندارعا ۇستازدىق ەتۋمەن كەلەدى.
– ءيا, ءبىز اجالمەن كۇن سايىن بەتپە-بەت كەزدەسەمىز دەسەم بولادى, راسىندا سولاي. ادامداردى اۋرۋحاناعا جەتكىزىپ, امان الىپ قالعانىمدى بىلسەم, سول كۇنى قاناعاتتانعاندىق سەزىممەن جانىم دا, جۇرەگىم دە جاي تابادى. جالعىز مەن عانا ەمەس, ارىپتەستەرىمنىڭ بارلىعى دا سونداي كوڭىل-كۇيدە ەكەنىن بىلەمىن. جەدەل جاردەمدى شاقىرعاننان كەيىن ايتىلعان مەكەنجايعا قاراي قۇستاي ۇشاسىڭ. اسىرەسە جاعدايدىڭ اۋىر ەكەنىن كورگەندە ساناۋلى مينۋتتار ساناڭدا تىرسىلداپ ۇرىپ تۇرادى عوي, – دەپ باستادى اڭگىمەسىن رۋدنىي قالالىق جەدەل جاردەم ستانساسىنىڭ جوعارى ساناتتى دارىگەرى يرينا كليۋچنيكوۆا. ول ءبىز كەزدەسكەن كۇنى دە ءبىر قاريانى جۇرەك تالماسىنان امان الىپ قالعان ەكەن. قازىر ساياباقتا جۇمىس قىزعان كەز. جۇرت جەر قارايعاننان-اق قالا سىرتىنداعى ساياباعىن رەتكە كەلتىرە باستايدى. اجەي ستانساعا جان داۋسى شىعىپ, ۇرەيلى كەيىپپەن تەلەفون شالادى. «ساياباقتا مەنىڭ شالىما ءبىر نارسە بولدى, تەلەفون شالىپ ەدى, بىراق سويلەي المايدى», دەيدى جانۇشىرىپ. تاپسىرمانى يرينا يۋرەۆنانىڭ بريگاداسى الدى دا, اجەيدىڭ ايتقان مەكەنجايىمەن قالا سىرتىنداعى ساياباقتاردىڭ بىرىنە زۋىلداپ الا جونەلدى. جۇرگىزۋشىلەر دە كەنشىلەر قالاسىن بەس ساۋساقتاي بىلەدى, كولىكتىڭ قۇلاعىندا وينايدى عوي. ساياباققا جەتكەنشە يرينا يۋرەۆنا دا, جۇرگىزۋشى دە ءۇن قاتىسقان جوق. قانشا دەگەنمەن انا, ايەل عوي, يرينا يۋرەۆنا جول اماندىعىن تىلەپ كەلەدى, «جاي ءجۇر, بايقا» دەپ جۇرگىزۋشىنى الاڭداتۋدان دا سەسكەنەدى. ولار كەلگەندە قاريانىڭ ءتۇرى بۇزىلىپ كەتكەن ەكەن. ول كوكىرەك تۇسىن كورسەتكەننەن-اق ينفاركت ەكەنىن ءبىلدى. ناۋقاستىڭ كوكىرەگىنىڭ كۇيىپبارا جاتقانىن جانىمەن سەزىنگەندەي بولدى, ەندى ءار مينۋت ەسەپتە. كارديوگرامماسىن تۇسىرگەننەن كەيىن, ناۋقاستى «جەدەل جاردەم» ماشيناسىنا سالدى دا, جاتقىزعان كۇيى اۋرۋحاناعا اكەلىپ, دارىگەرلەرگە تابىس ەتتى.
– بۇگىنگى كۇنىم ولجاسىز ەمەس. ءبىز شامالى كەشىككەندە ساياباقتاعى اتايدىڭ جاعدايى قالاي بولارىن كىم ءبىلسىن, ونى امان الىپ قالۋ وڭاي بولماس ەدى, – دەيدى يرينا يۋرەۆنا.
جول ءۇستى زۋلاعان كولىك, ەكى كۇننىڭ بىرىندە جول اپاتى بولىپ جاتادى. دەر ۋاقىتىندا جەتكەنمەن دە يرينا يۋرەۆنانىڭ اجال الدىندا دارمەنسىز كۇي كەشكەن كەزدەرى دە از بولعان جوق. كەيدە جانۇشىرىپ جەتكەندە قانجوسا بولىپ جاتقان اتپالداي ازاماتتىڭ, قىرشىن جاستىڭ تامىرى سوقپايدى...
– جول-كولىك وقيعاسىنا بارۋ قاي دارىگەر ءۇشىن دە وڭاي ەمەس. ءبىز دە ەت پەن سۇيەكتەن جارالعان ادامبىز, جايراپ جاتقان جەرگە كەلگەندە پسيحولوگيالىق كوڭىل-كۇي دارىگەرلىك بىلىكتىلىكتەن باسىم ءتۇسىپ كەتەتىن كەزدەر بولادى. وتىز ەكى جىلدىڭ ىشىندە تالاي اۋىر جاعدايدى كوردىك قوي, – دەيدى دارىگەر.
يرينا كليۋچنيكوۆا قاراعاندى مەديتسينا ينستيتۋتىن بىتىرگەن سوڭ, ءبىر ورىندا – رۋدنىي قالالىق جەدەل جاردەم ستانساسىندا عانا قىزمەت ەتىپ كەلەدى. ءۇزىلىسسىز!
– وسى جىلدار ىشىندە قازاقستان مەديتسيناسىنىڭ ءوسۋى كەرەمەت بايقالدى. وتىز جىل بۇرىن ينفاركت, ينسۋلت, تاعى باسقا قاتەرلى اۋرۋلاردى امان الىپ قالۋ وتە كۇردەلى ەدى. قازىر وڭايلىقپەن اجالعا ادام بەرمەيمىز. شۇكىرلىك ەتەمىن وسىعان, – دەيدى ول.
الايدا ونىڭ ايتۋىنشا, ادام اعزاسىنىڭ عىلىمعا دا بەلگىسىز, توسىن جايلارى جەتەرلىك. كەيدە ينفاركت اۋرۋىنا بىردەن دياگنوز قويادى, ويتكەنى ونىڭ بەلگىلەرى دارىگەر ءۇشىن بادىرايىپ ءبىلىنىپ تۇرادى. ال كەيدە كارديوگراممانىڭ ءوزى ەشتەڭە كورسەتپەيدى, سوندا دا بىلىكتى دارىگەر ينفاركت دەپ جوبالاپ, اۋرۋدى تاستاپ كەتپەي, اۋرۋحاناعا جەتكىزەدى.
– اۋرۋحاناداعى ارىپتەستەرىمنىڭ ءوزى العاشىندا كارديوگرامما ەشنارسە كورسەتپەگەنىن كورىپ, «ناۋقاستى نەگە اكەلدىڭىز؟» دەپ قالاتىنى بار. بىراق ولار زەرتتەي كەلگەندە ناۋقاستىڭ دياگنوزى ءبارىبىر ينفاركت ەكەنى دالەلدەنگەن كەزدەر دە بولعان. جۇمىستىڭ قيىندىعى دا وسىندا, ناۋقاسپەن دە, دياگنوزبەن دە العاش ءبىز كەزدەسەمىز, ال قيىن جاعدايلاردا اجالمەن دە بەتپە-بەت كەلىپ وتىرامىز. ءار مينۋت ەسەپتە بولاتىن ارپالىستىڭ ارقاسىندا اجالدى وڭمەنىنەن يتەرۋمەن كەلەمىز, – دەيدى يرينا يۋرەۆنا.
قازىر جەدەل جاردەم ستانسالارىندا مامانداردىڭ جەتىسە بەرمەيتىنى بەلگىلى جايت. ودان رۋدنىي ستانساسى دا قۇرالاقان ەمەس. سوندىقتان يرينا يۋرەۆنا عۇمىر بويى جاس ماماندارعا ۇستازدىق ەتۋمەن كەلەدى.
– جاستار قازىر تەوريانى جاقسى بىلەدى. بىزدە تاجىريبە بار. كۇندەلىكتى اۋىر جاعدايدا جەتكىزىلگەن ناۋقاستاردىڭ دياگنوزىن, بەلگىلەرىن تالقىلاپ وتىرامىز. ەرتىپ ءجۇرىپ ۇيرەتەمىز. بىراق بۇل جۇمىستىڭ قيىندىعىنا شىداس بەرمەگەن جاستار كەتىپ قالادى. كاسىپتىك بىلىكتىلىكتى جەتىلدىرۋ وتە كۇردەلى دەپ ويلامايمىن, ءبىزدىڭ جۇمىستىڭ پسيحولوگيالىق كوڭىل كۇيگە سالماق سالاتىن ەرەكشەلىگى بار, قيىندىعى دا وسىندا, – دەيدى يرينا يۋرەۆنا.
رۋدنىي قالاسىنداعى جەدەل جاردەم ستانساسى وبلىستاعى وسى سالا ۇزدىكتەرىنىڭ ءبىرى.
– يرينا يۋرەۆنا دارىگەرلىك ءىسىنىڭ ناعىز مامانى. ادامدارعا جەدەل جاردەم كورسەتەتىن سالاقيىندىقتارى جەتەرلىك. سونىڭ بارلىعىنا ءتوزىپ, وعان عۇمىرىن ارناعان كىسى. وسىنداي دارىگەرلەردىڭ ارقاسىندا ناۋقاستارعا قىزمەت كورسەتۋ جوعارى دارەجەدە. يرينا يۋرەۆنا ناۋقاستارمەن دە ءتىل تابىسا بىلەدى, ۇجىمدا دا اقىل سۇرار ارداگەرىمىز. ايتپاقشى, ول «جەدەل جاردەم قىزمەتىندە دارىگەر بىلىكتىلىگىمەن قاتار, وسى سالانىڭ مادەنيەتىن كوتەرۋگە ۇلەس قوسقان دارىگەر, – دەيدى رۋدنىي جەدەل جاردەم ستانساسىنىڭ باس دارىگەرى ناتاليا بوتۆينوۆا.
ءبىزدىڭ جۇمىس اراسىنداعى ءسال عانا ءۇزىلىستى پايدالانىپ ايتقان اڭگىمەمىز كىلت ءۇزىلدى. ديسپەتچەرگە بەزىلدەپ قوڭىراۋ ءتۇستى, يرينا يۋرەۆنا ءدارى-دارمەك سالعان سومكەسىن الدى دا, ماشيناعا جىلدام باسىپ بارا جاتتى. ونىڭ ەندىگى نازارى ناۋقاستىڭ جاعدايىندا.
ءنازيرا جارىمبەت,
«ەگەمەن قازاقستان»
رۋدنىي