گازەتىمىزدىڭ بەتىندە ماڭعىستاۋداعى ستاديون ماسەلەسىن كوتەرگەنىمىز سول ەدى, وسى تاقىلەتتەس تاعى ءبىر وقيعا قىلاڭ بەردى. بۇل جولى تاقىرىپ اقتاۋعا كورشىلەس جاتقان اتىراۋدان شىقتى. «اتىراۋ» فۋتبول كلۋبىنىڭ جانكۇيەرلەرى قول جيناپ, وبلىس اكىمىنىڭ اتىنا حات جولدادى. باستى تالاپ – قالاداعى جالعىز ستاديون «مۇنايشىنىڭ» جوندەلۋى.
اقتاۋداعى «كاسپي» فۋتبول كلۋبى ونەر كورسەتەتىن ستاديوندا قازىر جوندەۋ جۇمىستارى باستالىپ, ءىس العا جىلجىدى. جاقىن ارادا جەرگىلىكتى جانكۇيەر ءبىر جارىم جىل ۋاقىت سالىپ سۇيىكتى كومانداسىمەن قايتا قاۋىشۋى ىقتيمال. ال «اتىراۋ» كومانداسى نەگىزگى مەكەنى «مۇنايشىدا» ءوز ويىندارىن وتكىزە الماي, قالا ماڭىنداعى «تومارلى» دەگەن ستاديوندى جاعالاپ ءجۇر. تالاي مارتە مىنبەلەردە ءسوز بولعان بۇل ماسەلە شەشىمىن تابا الار ەمەس. «اتىراۋ» كومانداسى ەلىمىزدىڭ 4 دۇركىن چەمپيونى – «استانامەن» بولاتىن ويىندى وسى «مۇنايشىدا» وتكىزۋى كەرەك بولعان. الايدا قازاقستان فۋتبول فەدەراتسياسىنىڭ تەحنيكالىق كوميتەتى مۇنداي ساپاسىز الاڭدا فۋتبول ويناۋعا رۇقسات بەرمەگەن. سودان بەرى جانكۇيەرلەر قاۋىمى دابىل قاقتى.
1950 جىلى پايدالانۋعا بەرىلگەن «مۇنايشى» ستاديونى قازاقستانداعى ەڭ «ارداگەر» سپورت كەشەنى دەسەك ارتىق ەمەس. مۇنايلى ولكە اتىراۋدا قانشاما سپورتتىق جارىستارعا پانا بولعان, قۇتتى مەكەن حالىققا ارمانسىز قىزمەت قىلدى. 1999 جىلى قايتا جوندەۋدەن ءوتىپ, ءسال دە بولسا رەڭى كىرىپ قالعان ەدى. ودان كەيىن 2014 جىلى تاعى ءبىر كوسمەتيكالىق جۇمىستار جۇرگىزىلىپتى. دەگەنمەن ستاديوننىڭ قازىرگى جاعدايىن كورسەڭىز, توزىعى جەتكەنىنە ەش ءشۇبا كەلتىرمەيسىز. «اتىراۋ» كومانداسى قازىر ءوزىنىڭ ەكىنشى ستاديونى «سۋدورەمونتنيكتە» دە ەمەس, قالا ماڭىنداعى «تومارلى» ستاديونىندا ويناپ ءجۇر. سەبەبى «سۋدورەمونتنيكتىڭ» ءوزى تالاپتارعا ساي ەمەس. بۇل جاعدايعا قاراپ اتىراۋ قالاسىنا جاڭادان سالىنعان جاقسى ءبىر ستاديون كەرەكتىگىن انىق ۇعاسىز. جانكۇيەرلەردىڭ دە تالابى وسى. قۇرمانعازى جارمۇحابەتوۆ, جانكۇيەر:
– «مۇنايشى» ستاديونىندا فۋتبول ويناۋ بىلاي تۇرسىن, ونى تاماشالاۋدىڭ ءوزى وتە قيىن. ەشقانداي جاعداي قاراستىرىلماعان. وتىراتىن ورىندىقتار سىنعان, سانيتارلىق تازالىق سىن كوتەرمەيدى. جاسىل الاڭ شۇرق تەسىك. فۋتبولشىلار كيىم شەشەتىن بولمە مەن دارەتحانا جايلى ءسوز قوزعاماي-اق تا قويايىن. ءبىر مىسال, وتكەندە سامات سماقوۆ «اتىراۋداعى ستاديون قازاقستانداعى ەڭ ناشار ستاديون» دەپ ايتتى. ءبىر جاعىنان نامىسىمىزعا دا تيەتىن ءسوز, الايدا اۋرۋىن جاسىرعان ولەدى. قالامىزدا نەشە ءتۇرلى ءىرى مۇناي كومپانيالارى بار. سولاردى دەمەۋشىلىككە تارتسا دا وبلىس اكىمدىگى ءبىر ستاديون قۇرىلىسىن باستاسا ەكەن دەپ تىلەپ وتىرمىز.
«اتىراۋدىڭ» مۇنداي وقيعاعا تاپ بولۋى ءبىرىنشى مارتە ەمەس. 2012 جىلى قازاقستان فۋتبول فەدەراتسياسىنىڭ شەشىمىمەن «مۇنايشى» ستاديونىندا فۋتبول ويىندارىن وتكىزۋگە تىيىم سالىندى. ودان كەيىن 2014 جىلى قايتا جوندەۋدەن ءوتىپتى. ەندى قۇرىلىس ءتارتىبى بويىنشا ارادا 5 جىل وتپەسە ستاديون جوندەلۋىنە قارجى بولىنبەيدى ەكەن. ياعني مۇڭى كوپ «مۇنايشى» 2019 جىلدى كۇتەدى. ازامات بەكەت, اتىراۋ وبلىسى سپورت باسقارماسىنىڭ باسشىسى:
– 2014 جىلى قايتا جوندەۋ جۇمىستارى جۇرگەن جوق. تەك جاسىل الاڭ عانا جاڭارتىلدى. بىراق قازىر الاڭنىڭ قوس قاقپاسىنىڭ الدى ويىلىپ قالعان. ءبىز سول جەرگە ءوزىمىز جاسىل ءشوپ ءوسىرىپ جاتىرمىز. ءبىر قاقپانىڭ الدى عانا دۇرىس كەلىڭكىرەمەي, ءشوبى جاتىق بولماي تۇر. بۇل ءسال ۋاقىتتى تالاپ ەتەتىن جاعداي. جاقىن ارادا «اتىراۋ» كلۋبى ءوز الاڭىنداعى ويىندارىن «مۇنايشى» ستاديونىندا وتكىزە باستايدى. ال ستاديوننىڭ تۇگەل جوندەۋ جۇمىستارى تەك كەلەر جىلى عانا ىسكە اسادى. ءبىز بۇل جاعدايدى جانكۇيەرلەرگە ءتۇسىندىرىپ ايتتىق.
وتكەن اپتا سوڭىندا جانكۇيەرلەر القاسى وبلىستاعى سپورت باسقارماسى مەن كلۋب باسشىلارىمەن كەزدەسۋ وتكىزىپتى. تالاپ قويعان جانكۇيەرلەر سۇراقتارىنا تولىققاندى جاۋاپ الا الماي كۇپتى كوڭىلمەن قايتقان. كوماندانىڭ دەنى – لەگيونەرلەر جىل باسىنان بەرى ماردىمدى ناتيجە كورسەتپەي ءجۇر ەكەن. مىسالى, سيكيميچ پەن باباتۋندە سەكىلدى شەتەلدىك شابۋىلشىلار ماۋسىم باستالعالى بەرى 1 گولدان عانا سوققان. وسىعان بايلانىستى كلۋب باسشىسى تيمۋر نەگيموۆكە حابارلاسىپ ءمان-جايدى بىلدىك. تيمۋر نەگيموۆ, فك «اتىراۋ» ديرەكتورى:
– لەگيونەرلەردى باپكەرلەر الادى. مەن تەك سولارعا قارجى تاۋىپ بەرۋمەن عانا اينالىسامىن. سيكيميچتى وتكەن جىلدان بەرى قالدىرىپ, كوماندادا ۇستاۋىمىزدىڭ سەبەبى بار. سونىڭ ارقاسىندا وتكەن جىلى 4 ويىندا جەڭىسكە جەتتىك. باباتۋندە كەشە عانا گول سوقتى. جاقىن ارادا اشىلىپ ويناپ كەتەدى دەپ وتىرمىز. ال ستاديونعا كەلەتىن بولساق, ءبىز «مۇنايشىدا» ويناۋعا رۇقسات الدىق. 17 ماۋسىم كۇنى «توبىلعا» قارسى ماتچىمىز سوندا وتەدى.
توقسان اۋىز ءسوزدىڭ توبىقتاي ءتۇيىنى اتىراۋدا جاڭا ستاديون سالىنۋ جايلى جوسپار جوق. تەك 3000 ادامعا ارنالعان جابىق مانەج سالىنادى. ودان بولەك «مۇنايشى» مەن «سۋدورەمونتنيك» ستاديوندارى كۇردەلى جوندەۋدەن وتەدى ەكەن. بۇل ەندى, ارينە بۇرىن دا ايتىلىپ كەلە جاتقان اڭگىمەلەر مەن جوسپارلار. جىل سايىن قايتالاناتىن جاعداي ءتۇبى شەشىمىن تاپسا ەكەن دەيمىز. قۇرعاق ۋادەمەن الدارقاتىپ وتىرعان باسشىلاردىڭ ءىسىن جانكۇيەرلەر بىلمەيدى ەمەس, ءبىلىپ وتىر. امال قانشا؟!
ايتپاقشى, «قايراتقا» قارسى وتكەن ويىندا 3:1 ەسەبىمەن جەڭىلگەن «اتىراۋ» جانكۇيەرلەردىڭ ەرەكشە «العىسىن» الدى. كورەرمەندەر جاسىل الاڭعا دارەتحانا قاعازىن لاقتىردى.
ەرمۇحامەد ماۋلەن, «ەگەمەن قازاقستان»