ميلليونداعان ادامدى ءبىر مەزەت سان ءتۇرلى اسەرگە بولەيتىن فۋتبولدىڭ قاسيەتىن ايتىپ جەتكىزۋ مۇمكىن ەمەس شىعار, ءسىرا. اسىرەسە دۇبىرلەتىپ الەم چەمپيوناتى كەلگەندە. بۇگىن ءبىز رەسەيدە وتەتىن الەم دوداسىنا قاتىسۋشى يسپانيا قۇراماسى جايلى ءسوز قوزعايمىز. ال «ا» توبىنداعى رەسەي قۇراماسى تۋرالى ءسوز الاڭ يەلەرى رەتىندە ەڭ سوڭىنان ايتىلاتىن بولادى.
ىرىكتەۋدەن ىركىلمەگەن «قىزىل فۋريا»
يسپانيا قۇراماسى ءۇشىن 2018 جىلعى الەم چەمپيوناتىنىڭ ىرىكتەۋ كەزەڭى ءساتتى ءوتتى. حۋلەن لوپەتەگي شاكىرتتەرى «G» توبىندا ءسوزسىز كوش باستادى. ىرىكتەۋ كەزەڭى الدىندا ماماندار يسپانياعا وسى توپتا ەكىنشى ورىندا قالعان يتاليا قۇراماسى قارسىلىق كورسەتەدى دەگەن بولجام جاساعان-دى. الايدا پيرينەي تۇبەگىنىڭ فۋتبولشىلارى فۋتبول ماماندارى ساۋەگەيلىكتەرىنىڭ بىت-شىتىن شىعاردى. ون كەزدەسۋدىڭ توعىزىندا جەڭىسكە جەتكەن يسپاندار تەك تۇزدە عانا يتاليالىقتارمەن تەڭ وينادى.
بۇگىندە يسپانيا قۇراماسىنىڭ اسىعى الشىسىنان ءتۇسىپ تۇر. سەبەبى كوماندادا الەمدىك دەڭگەيدە ونەر كورسەتە الاتىن ينەستا, راموس, سيلۆا, پيكە سەكىلدى ارداگەر ويىنشىلار بار. بۇلاردىڭ كەز كەلگەنى ءوز شەبەرلىكتەرىنىڭ ارقاسىندا ويىن تاعدىرىن شەشە الادى. بۇعان دالەل 2008 جانە 2012 جىلى ەۋروپا چەمپيوناتىندا, 2010 جىلى الەم چەمپيوناتىندا جەڭىسكە جەتكەندە ناق وسى جىگىتتەر كومانداسىن العا جەتەلەدى. ال بۇلاردىڭ قاتارىنا يسكو, كوستا, ۆاسكەس, قاقپاشى دە حەانىڭ قوسىلعانىن ەسكەرسەك, قۇراما دەيگەيى اناعۇرلىم جوعارى ەكەنىن اڭعارۋ قيىن ەمەس. ونىڭ ۇستىنە بيىلعى جىلعى ناۋرىزدىڭ 27-سىندە يسپانيا ارگەنتينا فۋتبولشىلارىن 6:1 ەسەبىمەن ويسىراتا جەڭىپ, الەم چەمپيوناتىنا تەك التىن ءۇشىن باراتىندىقتارىن اڭعارتقانداي بولدى.
يسپانيا الەم چەمپيوناتىنىڭ توپتىق كەزەڭىندە تاجىريبەلى پورتۋگاليا, تىسقاققان يران جانە ماروككو قۇرامالارىمەن ءوزارا مىقتىنى انىقتايدى. «چەلسي» كومانداسىنىڭ باس باپكەرى جوزە موۋرينيۋنىڭ پىكىرىنشە, يسپانيا مەن پورتۋگاليا تەك «ۆ» توبىندا عانا ەمەس, جالپى الەم چەمپيوناتىندا باستى فاۆوريتتەردىڭ ءبىرى. الايدا يسپانيانىڭ باس جاتتىقتىرۋشىسى لوپەتەگي مۇنداي پىكىرمەن كەلىسپەيتىنىن ايتتى. ء«بىزدىڭ توپتاعى كوماندالاردىڭ وسالى جوق. پورتۋگاليا ەۋرو-2016 چەمپيونى, ماروككو افريكا قۇرلىعىنداعى ۇزدىك كوماندالارىنىڭ ءبىرى. يران بولسا, ازياداعى مىقتى ءارى ىرىكتەۋ كەزەڭىندە ەڭ از گول جىبەرگەن قۇراما. بۇل توپتا كۇتپەگەن ەسەپ تىركەلۋى ابدەن مۇمكىن».
ارينە بۇل جەردە لوپەتەگي باپكەر «ارىق سويلەپ, سەمىز شىققىسى» كەلەتىن سياقتى. ايتپەسە كەزىندە ويىنشى رەتىندە «رەال» مەن «بارسەلونانىڭ» جەيدەسىن كيگەن بۇل باپكەر 2011, 2012 جىلدارى 19 جاسقا دەيىنگى يسپانيا قۇراماسىمەن ەۋروپا چەمپيوناتىندا ەكى مارتە, 2013 جىلى يسپانيا جاستار كومانداسىمەن دە كارى قۇرلىقتىڭ باستى دوداسىندا جەڭىسكە جەتپەس ەدى عوي. ءالىپتىڭ ارتىن باعايىق.
سونداي-اق 21 مامىردا باس باپكەر الەم چەمپيوناتىندا دوپ تەبەتىن 23 نەگىزگى فۋتبولشىنىڭ ءتىزىمىن جاريالادى. كوپتەگەن بەلدى باسىلىمعا قۇراماعا شاقىرتىلعان 23 فۋتبولشى ەمەس, وعان ەنبەي قالعانداردىڭ ءتىزىمى قىزىق بولدى. سەبەبى ءاچ-2018 بارمايتىن يسپاندىق اياقدوپ شەبەرلەرىن تىزبەكتەپ شىقساڭىز, «اھ» ۇراسىز. كاسيلياس, فابرەگاس, ماتا, توررەس, ۆيليا... جالعاسىپ كەتە بەرەدى. وسى فۋتبولشىلاردىڭ ءوزى بىرىنشىلىكتە ونەر كورسەتەتىن كوپتەگەن قۇراما ويىنشىلارىنىڭ دەڭگەيىنەن اسىپ تۇسەرى انىق. ايتكەنمەن, چەمپيوندىقتان دامەلى كوماندانىڭ قوسالقى قۇرامى دا ۇزىن-سونار بولاتىنى بەلگىلى. سولاي بولۋ كەرەك تە.
ءار فۋتبولشىعا – 800 مىڭ ەۋرودان
ءسوز رەتى كەلگەندە وسىمەن ون بەسىنشى مارتە الەمدىك دودادا سىنعا تۇسەتىن يسپانيانىڭ ىشكى چەمپيوناتى – لا ليگانى دا ايتا كەتسەك. الەمدەگى ەڭ مىقتى چەمپيوناتتىڭ ءبىرى لا ليگادا كەزىندە تالاي تانىمال فۋتبولشىلار – رونالدو, ريۆالدو, زيدان, كانناۆارو, فيگۋ دوپ تەپكەنى بەلگىلى. بۇگىندە فيفا-نىڭ «ەڭ ۇزدىك فۋتبولشىسى» اتاعىن ون جىل بويى ءوزارا ءبولىسىپ كەلە جاتقان كريشتانۋ رونالدۋ مەن ليونەل مەسسي دە وسى ەلدە ونەر كورسەتەتىنى بەلگىلى.
بيىل چەمپيوندار ليگاسىندا «رەال», ەۋروپا ليگاسىندا «اتلەتيكو» كوماندالارى جەڭىمپاز بولعاننان كەيىن, يسپانيا كورولدىك فۋتبول فەدەراتسياسى «حەت-تريك» جاساۋدان ءۇمىتتى ەكەنىن اڭعارتتى. ياعني الەم چەمپيوناتىندا جەڭىسكە جەتكىسى كەلەدى. ول ءۇشىن فەدەراتسيا فۋتبولشىلارعا قوماقتى سىياقى تاعايىنداعان.
«Marca» باسىلىمىنىڭ جازۋىنشا, ەگەر دە يسپانيا ويىنشىلارى ءساتتى ونەر كورسەتىپ, الەم چەمپيوناتىنىڭ كۋبوگىن باسىنا كوتەرسە, وندا ءاربىر ويىنشى 800 مىڭ ەۋرو سىياقى الادى.
يسپانيا العاشقى ويىنىن 15 ماۋسىمدا پورتۋگالياعا قارسى وتكىزەدى. ەگەر دە جەڭىسكە جەتىپ جاتسا, وندا چەمپيوناتتىڭ 1/8 فينالىنا ءبىر تابان جاقىنداي تۇسەدى. ال ولاردى «ا» توبىنىڭ ۇزدىكتەرى كۇتىپ الادى.
يسپانيا قۇراماسىنىڭ ءتىزىمى:
قاقپاشىلار: داۆيد دە حەا (مانچەستەر يۋنايتەد, انگليا), كەپا ارريسابالاگا (اتلەتيك), پەپە رەينا (ناپولي, يتاليا);
قورعاۋشىلار: جوردي البا (بارسەلونا), سەسار اسپيليكۋەتا (چەلسي, انگليا), دانيەل كارۆاحال (رەال), ناچو مونرەال (ارسەنال, انگليا), فەرناندەس يگلەسياس ناچو (رەال), الۆارو ودريوسولا (رەال سوسەداد), جەرار پيكە (بارسەلونا), سەرحيو راموس (رەال);
جارتىلاي قورعاۋشىلار: يسكو (رەال), تياگۋ الكانتارا (باۆاريا, گەرمانيا), سەرحيو بۋسكەتس (بارسەلونا), داۆيد سيلۆا (مانچەستەر سيتي, انگليا), اندرەس ينەستا (بارسەلونا), نيگەس ساۋل (اتلەتيكو), كوكە (اتلەتيكو);
شابۋىلشىلار: اسەنسيو (رەال), ياگو اسپاس (سەلتا), ديەگۋ كوستا (اتلەتيكو), مورەنو رودريگو (ۆالەنسيا), لۋكاس ۆاسكەس (رەال).
الماس ماناپ, «ەگەمەن قازاقستان»