«مەرەيلى وتباسى-2018» بايقاۋى وتكەن ە.ومىرزاقوۆ اتىنداعى وبلىستىق فيلارمونيانىڭ كونتسەرت زالى لىق تولى. بالالارىن, ءبىرىن-ءبىرى جەتەكتەپ, ءۇبىرلى-ءشۇبىرلى بولىپ ساحناعا كوتەرىلگەن وتباسىلاردان زالعا قاراي ءبىر مەيىرلى شۋاق شاشىلعانداي, ال كورەرمەن دە وسى شۋاققا ىنتىعىپ كەلگەندەي ەدى.
بەرەكەلى وتباسى – مىقتى مەملەكەتتىڭ ىرگەتاسى ەكەنىن دە وسى زالعا جينالعان جۇرت بىلەدى, سوعان ۇمتىلادى. «مەرەيلى وتباسى-2018» بايقاۋىنا قاتىسۋشىلار مەن جينالعانداردى وبلىس اكىمى ارحيمەد مۇحامبەتوۆ قۇتتىقتادى.
– ۇرپاقتان ۇرپاققا بەرىلىپ وتىراتىن ادامگەرشىلىك, ەڭبەكقورلىق, تولەرانتتىق, ۇلكەنگە قۇرمەت, كىشىگە ىزەت سەكىلدى ىزگى قاسيەتتەردىڭ بارلىعى دا وتباسىندا قالىپتاسادى. ءبىزدىڭ ەلىمىزدە وتباسىعا جان-جاقتى قامقورلىق كورسەتىلەدى. ەلباسى نۇرسۇلتان نازارباەۆتىڭ «پرەزيدەنتتىڭ بەس باستاماسى» اتتى ۇندەۋىندە قولجەتىمدى تۇرعىن ءۇي, بالالاردىڭ جاتاقحاناسى مەن ءبىلىم گرانتى, سالىق جەڭىلدىگى سياقتى ماسەلەلەردىڭ بارلىعى دا الدىمەن وتباسىنا قامقورلىق نيەتىنەن تۋعان. مىسالى, بيىل وبلىستا 300 مىڭ شارشى مەتر تۇرعىن ءۇي پايدالانۋعا بەرىلەدى. بۇل وتكەن جىلدان 10 پايىزعا كوپ. قانشاما وتباسى قونىس تويىن تويلايدى, تۇرمىسىن تۇزەيدى. وسى بايقاۋ نۇرىن تاسىتقان مەرەيلى وتباسىلاردىڭ بارلىعى دا ەلىمىزدىڭ, ۇلتىمىزدىڭ بايلىعى, – دەدى وبلىس باسشىسى.
ۇلتتىق بايقاۋ داستۇرگە ەنگەن بەس جىلدان بەرى وعان وبلىستان 500 وتباسى قاتىسقان ەكەن. ال بيىل بايقاۋدىڭ اۋداندىق جانە قالالىق ساتىسىنا 92 وتباسى قاتىستى, وبلىستىق دەڭگەيگە 36 وتباسى شىقتى. ونىڭ سالتاناتتى ماراپاتتاۋ شاراسىنا 20 وتباسى كەلدى. جىل سايىن بايقاۋ ءۇش اتالىممەن وتەدى. بيىل «ونەگەلى وتباسى» اتالىمى بويىنشا ساحناعا شىققان وتباسىلارىنىڭ ارقايسىسى ءوز داستۇرىمەن قىزىقتى, باقىتتى. دەگەنمەن بايقاۋدىڭ اتى – بايقاۋ, جەڭىمپازدىڭ اتى اتالۋ كەرەك. قوستاناي قالاسىنان قارجاۋوۆتار «ونەگەلى وتباسىنىڭ» جەڭىمپازى اتاندى. قادىر مەن مايرا – وبلىسقا بەلگىلى انشىلەر. ولار تاربيەلەگەن ۇل مەن قىز دا اتا-انانىڭ ءىزىن قۋدى. ەندى بۇل وتباسىندا ءۇشىنشى ۇرپاق, ياعني قادىر مەن مايرانىڭ بەس نەمەرەسى دە ساحنادان كورىنە باستادى. ونەگەلى وتباسىنا ديپلوم مەن 150 مىڭ تەڭگەنىڭ سەرتيفيكاتى تاپسىرىلدى.
«پاراساتتى وتباسى» اتالىمى بويىنشا تاران اۋدانىنان كەلگەن الەكساندر مەن ليۋبوۆ سەمگيندەر وتباسى جەڭىمپاز دەپ تانىلدى. وتاعاسى تەمىرجولشى بولىپ ەڭبەك ەتەدى. ۇلدارى سەرگەي مەن ەۆگەني اكە جولىن قۋىپ, تەمىرجولشى ماماندىعىن تاڭدادى. تەمىرجولشىلار اۋلەتى اتالاتىن وتباسى سپورتتان دا قۇرالاقان ەمەس. ولارعا ديپلوم مەن 150 مىڭ تەڭگەنىڭ سەرتيفيكاتى تابىس ەتىلدى.
«مەرەيلى وتباسى» اتالىمىنىڭ باس جۇلدەسى ءبىراۋىزدان ارقالىق قالاسىنان كەلگەن الماتوۆتار وتباسىنا لايىقتالدى. جاسى سەكسەننىڭ سەڭگىرىنە كەتكەن ورەكەن اعاي مەن گۇلجيان اپاي 8 بالا تاربيەلەپ ءوسىردى, ولاردىڭ بارلىعى دا جوعارى ءبىلىم العان مامان. بالالارىنان 16 نەمەرە, 5 شوبەرە ءسۇيىپ وتىر.
– ۇلتتىق تاربيەنىڭ ارقاسىندا گۇلجيان ەكەۋمىز 58 جىل باقىتتى, بەرەكەلى ءومىر سۇردىك. اللانىڭ بەرگەن بالالارىن وسىردىك. گۇلجيان 80-گە كەلگەن انامدى, 90-عا كەلگەن اكەمدى باعىپ-قاعىپ, جونەلتتى. وتباسىنداعى بەرەكەنىڭ باستى قۇرالى – سىيلاستىق, اعايىن-تۋىستى قادىرلەۋ, دوس-جاراندى باعالاۋ بولدى. مەنىڭ ايتار وسيەتىم, قازاقستانداعى ءار وتباسىندا 5-6 بالا بولۋى كەرەك. باستى بايلىق, ەلدىڭ قۇتى, مەملەكەتتىڭ مىقتىلىعى وسىندا, – دەدى «مەرەيلى وتباسى-2018» وبلىستىق بايقاۋىنىڭ جەڭىمپازى بولعان وتباسىنىڭ اتاسى ورەكەن اعاي.
مەرەيلى وتباسىنا وبلىس اكىمى ديپلوم مەن 300 مىڭ تەڭگەنىڭ سەرتيفيكاتىن تابىس ەتتى.
ەندى الماتوۆتار وتباسى رەسپۋبليكالىق «مەرەيلى وتباسى-2018» بايقاۋىنا قوستاناي وبلىسىنىڭ اتىنان قاتىساتىن بولادى.
ءنازيرا جارىمبەت, «ەگەمەن قازاقستان»
قوستاناي وبلىسى