1 ماۋسىم - حالىقارالىق بالالار قورعاۋ كۇنى مەرەكەسىندە اقتوبە قالاسىنداعى انالار ۇيىندەگى ايلين ەسىمدى كىشكەنتاي ءبۇلدىرشىننىڭ تۇساۋى كەسىلدى.
«انالار ءۇيىنىڭ» قىزمەتكەرلەرى ءبىر جاسقا تولعان بالانىڭ تۇساۋىن ءداستۇرىمىز بويىنشا ەلگە سىيلى, بەلگىلى ازاماتتارعا كەستىرەدى. بۇل جولى ءتاي-ءتاي باسۋعا ۇمتىلعان كىشكەنتاي ءسابيدىڭ تۇساۋىن اقتوبە وبلىسى «اتامەكەن» كاسىپكەرلەر پالاتاسىنىڭ ديرەكتورى نۇرلىبەك مۇقانوۆ كەستى. شاشۋ شاشىلىپ, بارلىق كادەلەر جاسالدى.
«بالانىڭ ءار جەتىستىگىن كورۋ زور قۋانىش. تۇساۋكەسەر دە وسىنداي ۇلتىمىزدىڭ ۇلاعاتتى سالتىنىڭ ءبىرى. سابيلەرىمىز سۇرىنبەسىن, ارقاشان جولدارى بولسىن! بارلىق ءسابي باقىتتى بولسىن!» -دەپ نۇرلىبەك مۇقانوۆ باتا بەردى.
انالار ۇيىنە ءتۇرلى قيىن جاعدايلارعا دۋشار بولىپ, بالاسىن جالعىز تاربيەلەۋگە ءماجبۇر بولىپ وتىرعان كەلىنشەكتەر قابىلدانادى. بۇگىنگى كۇنى مۇندا 11 انا مەن 11 ءبۇلدىرشىن تاربيەلەنۋدە. بۇل جەردە ايەلدەرگە مورالدىك, پسيحولوگيالىق كومەك بەرىلىپ, ولاردىڭ ومىردەن ءوز جولىن تابۋىنا ىقپال ەتۋ ماقساتىندا ماسساج, شاشتاراز, اسپاز, تىگىنشى سەكىلدى ماماندىقتار بويىنشا ءارتۇرلى كۋرستار وتكىزىلەدى.
ء«بىز ءاربىر بالاعا سالت-داستۇرىمىزگە ساي جورالعىلاردى جاساۋعا تىرىسامىز. وسىندا شىلدەحانا, بەسىك توي, تۇساۋ كەسەر وتكىزىلەدى. ءبىزدىڭ نەگىزگى قىزمەتىمىز – بالالاردىڭ جەتىم قالۋىن بولدىرماۋ. سابيلەردىڭ انالارىنىڭ قاسىندا بولۋى ءۇشىن بارلىق جاعدايدى جاسايمىز»,-دەيدى انالار ءۇيىنىڭ ۇيلەستىرۋشىسى تاڭسۇلۋ لاقوۆا.
اقتوبەدەگى انالار ءۇيىنىڭ دەمەۋشىسى-وڭىرىمىزدەن شىققان بەلگىلى مەتسەنات, «التىن قىران» كومپانياسىنىڭ پرەزيدەنتى يسلامبەك سالجانوۆ. ول وسى ورتالىقتىڭ بارلىق تولەمى مەن شىعىندارىن وتەپ, انالارعا قاجەتتى جابدىقتارمەن تولىق قامتاماسىز ەتەدى. تاڭسۇلۋ لاقوۆانىڭ ايتۋىنشا, ودان بولەك وبلىستىڭ كاسىپكەرلەرى دە قولدارىنان كەلگەنشە كومەك بەرىپ تۇرادى ەكەن. ايتالىق, بۇگىن «باتىس دامۋ جول» جشس قىزمەتكەلەرى قامقورسىز قالعان انالار مەن بالالارعا قاجەتتى ازىق-ت ۇلىك, جورگەكتەر مەن ويىنشىقتاردى سىيعا تارتتى. ءوز كەزەگىندە «اتامەكەن» كاسىپكەرلەر پالاتاسىنىڭ قىزمەتكەرلەرى ورتالىقتاعى انالارعا كاسىپكەرلىك نەگىزدەرىن ۇيرەتىپ, ولاردىڭ كاسىپكەرلىكپەن اينالىسۋىنا قولداۋ ءبىلدىرىپ وتىرادى.
تەمىر قۇسايىن,
«ەگەمەن قازاقستان»
اقتوبە