ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ورتالىق كوممۋنيكاتسيالار قىزمەتىنىڭ قولداۋىمەن شەتەلدىك ستۋدەنتتەر فورۋمى ءوتتى. كەزدەسۋگە ۋنيۆەرسيتەتتە ءبىلىم الۋشى 500-دەن استام شەتەلدىك ستۋدەنت قاتىستى.
فورۋم «رۋحاني جاڭعىرۋ» باعدارلاماسىن ىسكە اسىرۋعا شەتەلدىك ستۋدەنتتەردىڭ قاتىسۋ جوبالارىن تالقىلاۋعا ارنالدى. قاتىسۋشىلار «رۋحاني جاڭعىرۋ» باعدارلاماسىنىڭ حالىقارالىق دەڭگەيدەگى اقپاراتتىق جانە مادەني كەڭىستىگىن كەڭەيتۋ باعىتتارى بويىنشا ءوز ۇسىنىستارىمەن ءبولىستى.
«بۇگىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جاستاردىڭ باستاماسىمەن ۇلكەن فورۋم وتۋدە. ونى ۇيىمداستىرىپ, ماقساتىن ايقىنداۋشى وسى جەردە ءبىلىم الىپ جاتقان شەتەلدىك ستۋدەنتتەر. بۇگىنگى تاڭدا بۇل ۋنيۆەرسيتەتتىڭ قابىرعاسىندا 500-گە جۋىق شەتەلدىك ستۋدەنت جانە 30 شاقتى ءارتۇرلى ەلدەن كەلگەن پروفەسسورلار قىزمەت اتقارادى.
مىنە, الدىمىزدا دەمالىس ايلارى باستالادى. وسى ۋاقىتتا شەتەلدىك ستۋدەنتتەر ءوز ەلدەرىنە قايتادى. سول كەزدە وزدەرىنىڭ قازاقستاننان العان اسەرىن ءوز ەلدەرىنە بارىپ ناسيحاتتاپ, تاراتاتىن نيەتتەرى بار. جالپى, ەلىمىزدىڭ جوعارى وقۋ ورىندارىندا 13 000-داي شەتەلدىك ستۋدەنت ءبىلىم الىپ جاتىر ەكەن. ولاردىڭ بارلىعى ەلدەرىنە قايتقاندا قازاقستان تۋرالى تەرەڭ ءبىلىپ, جەرلەستەرىنە جەتكىزە السا, وندا ەلىمىزدىڭ ءيميدجى كوتەرىلىپ, تانىمالدىلىعى ارتا تۇسەر ەدى», دەپ اتاپ ءوتتى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ.
فرانتسيا ستۋدەنتى جەرەمي كونۆەرت اعىمداعى جىلدىڭ اياعىنا دەيىن «رۋحاني جاڭعىرۋ» باعدارلاماسى بويىنشا بىرنەشە اكتسيالاردى قامتيتىن «1001 قادام» جاستار جوباسىنىڭ ىسكە قوسىلاتىنىن حابارلادى. بۇل جوبانىڭ اياسىندا ستۋدەنتتەر شەتەلدىك ۋنيۆەرسيتەتتەر مەن كىتاپحانالارعا قازاقستان تۋرالى كىتاپتار سىيلايدى, دوڭگەلەك ۇستەلدەر مەن كونفەرەتسيالارعا قاتىسادى, گازەت-جۋرنالداردا ماقالا جاريالايدى, ەلىمىزدىڭ جەتىستىكتەرىن الەۋمەتتىك جەلىلەردە كەڭىنەن تالقىلايدى. ەۇۋ ستۋدەنتتەرى قازاقستانداعى بارلىق شەتەلدىك ستۋدەنتتەر مەن شەتەلدەگى ءبىلىم الىپ جاتقان قازاقستاندىق ستۋدەنتتەردى وسى اكتسياعا قولداۋ بىلدىرۋگە شاقىردى.
سونىمەن بىرگە فورۋمدا ستۋدەنت جاستاردىڭ الەۋمەتتىك جەلىلەردەگى ء«بىز لاتىنشا جازامىز – لاتىندى قولدايمىز» جوباسىنىڭ ىسكە قوسىلۋىنا قولداۋ ءبىلدىردى.
فورۋم سوڭىندا ستۋدەنتتەر قاۋىمداستىعى وسىنداي حالىقارالىق مازمۇنداعى فورۋمدى جىل سايىن وتكىزۋ تۋرالى شەشىم قابىلدادى.
راۋان قايدار,
«ەگەمەن قازاقستان»