جىل سايىن كەڭىنەن اتالىپ وتەتىن 1 مامىر – قازاقستان حالقىنىڭ بىرلىگى كۇنىنە وراي تاراز قالاسىندا جەڭىلاتلەتيكالىق جۇگىرىس جانە جارتىلاي مارافونعا ارنالعان «جامبىل مارافون» سپورتتىق بۇقارالىق ءىس-شاراسى ءوتتى.
اتالعان مارافونعا رەسەي, قىرعىزستان مەملەكەتتەرىنەن جانە ەلىمىزدىڭ استانا, الماتى, كوكشەتاۋ, شىمكەنت, اقتوبە قالالارى مەن جامبىل وبلىسىنىڭ تۇرعىندارىنان 2500-گە جۋىق ادام قاتىستى.
جەڭىلاتلەتيكالىق جۇگىرىس باعىتى 2.4 جانە 4.8 شاقىرىم قاشىقتىقتا ورتالىق «دوستىق» الاڭىنان باستالىپ, جەلتوقسان, سۇلەيمەنوۆ كوشەلەرى ارقىلى اباي داڭعىلى بويىمەن جالعاستى. ال 10 شاقىرىم جارتىلاي مارافونىنىڭ باعىتى تاراز قالاسىنداعى اۆتوكولىك بازارىنان باستالىپ, تولە بي داڭعىلى ارقىلى ماحامبەت, نيەتقاليەۆ, ءال-فارابي كوشەلەرى ارقىلى ورتالىق «دوستىق» الاڭىنا دەيىن جالعاسىن تاپتى. سونىمەن قاتار, دەنە مۇمكىندىگى شەكتەۋلى ازاماتتار اراسىندا دا جەڭىلاتلەتيكالىق جۇگىرىس ۇيىمداستىرىلدى. مارافون جۇمىسىن ء«ماندى ءومىر» قوعامدىق قورى جامبىل وبلىسىنىڭ اكىمدىگى مەن جامبىل وبلىسىنىڭ جەڭىل اتلەتيكا فەدەراتسياسىمەن بىرلەسە جۇزەگە اسىردى. اتالعان مارافون قازاقستان حالقىنىڭ بىرلىگى كۇنى اياسىندا ءوڭىر تۇرعىندارى اراسىندا سالاۋاتتى ءومىر سالتىن ناسيحاتتاۋ, بارلىق جاس ەرەكشەلىكتەگى ازاماتتاردى دەنە شىنىقتىرۋ جانە سپورتپەن جۇيەلى تۇردە اينالىسۋعا تارتۋ, سونداي-اق وبلىستاعى تسەرەبرالدى پاراليچ اۋرۋىمەن اۋىراتىن بالالارعا قايىرىمدىلىق كورسەتۋ ماقساتىندا ۇيىمداستىرىلدى.
حاميت ەسامان, «ەگەمەن قازاقستان»
جامبىل وبلىسى