قازاقستاندىق بوكسشى گەننادي گولوۆكين مەن مەكسيكالىق ساۋل الۆارەس اراسىنداعى ەكىنشى كەزدەسۋ وتپەيتىن بولدى. بۇل تۋرالى Golden Boy Promotions پروموۋتەرلىك كومپانياسىنىڭ پرەزيدەنتى ەريك گومەس پەن بوكسشىنىڭ ءوزى لوس-اندجەلەستە وتكەن ءباسپاسوز ءماسليحاتىندا ايتتى.
«5 مامىرعا جوسپارلانعان ەكىنشى كەزدەسۋدەن باس تارتتىق. 18 ءساۋىر كۇنى كوميسسيا تىڭدالىمى ءوتىپ, رەسمي شەشىم شىعادى. وكىنىشكە قاراي ودان كەيىن 5 مامىرعا دەيىن جەكپە-جەكتى كەڭ كولەمدە جارنامالاۋعا ۋاقىت از», دەدى ەريك گومەس. ايقاستىڭ وتپەيتىنىنە نەگىزگى سەبەپ – مەكسيكالىق بوكسشىنىڭ دوپينگ داۋىنا ىلىككەنى بولىپ تۇر.
الۆارەستىڭ ءوزى كىناسىز ەكەنىن ايتىپ, ۇيىمداستىرۋشىلار مەن جانكۇيەرلەردەن كەشىرىم سۇرادى. «دوپينگ داۋى مەنى قاتتى تاڭعالدىردى. ماعان ەشكىمنىڭ كۇمان كەلتىرمەگەنىن قالايمىن. مەن بۇعان دەيىن دە, بۇدان كەيىن دە «تازا» سپورتشى بولىپ قالا بەرەمىن. سونداي-اق نۆو تەلەارناسىنان, Tecate, Hennessy جانە تاعى باسقا دەمەۋشىلەرىمنەن جانە دە ەڭ باستىسى جانكۇيەرلەرىمنەن كەشىرىم سۇرايمىن. مەن سپورتتى قۇرمەتتەيمىن. ءوز جانكۇيەرلەرىمە سىزدەردى جەرگە قاراتپاۋعا ۋادە بەرەمىن دەپ ايتقىم كەلەدى», دەيدى الۆارەس.
ساۋل الۆارەس 17 جانە 20 اقپان كۇندەرى كلەنبۋتەرولدى انىقتايتىن دوپينگ-تەست تاپسىرىپ, ول وڭ ناتيجەنى كورسەتكەندىگى ءۇشىن بوكستان ۋاقىتشا شەتتەتىلگەن-ءدى. وسىدان ەكى اپتا بۇرىن نەۆادا شتاتىنىڭ اتلەتيكالىق كوميسسيانىڭ اتقارۋشى ديرەكتورى بوب بەننەتت الۆارەس داۋىنا بايلانىستى كوميسسيا وتىرىسى 18 ساۋىردە وتەتىنىن ايتقان ەدى. ەگەر اتلەتيكالىق كوميسسيا مەكسيكالىق بوكسشىنى ايىپتى دەپ تاپسا, بوكستان ءبىر جىلعا الاستاتىلۋى مۇمكىن. ال الۆارەس ءوزىنىڭ دوپينگ قولدانعانىن مويىندايتىن بولسا, جازا مەرزىمى التى ايعا دەيىن شەگەرىلمەك.
ءالي بيتورە,
«ەگەمەن قازاقستان»