جاقىندا ەكونوميستەر روبوتتاردىڭ قانشا ادامنىڭ ورنىن باساتىنىن قايتا ەسەپتەپ شىقتى. ولاردىڭ ايتۋىنشا, جاساندى ينتەللەكتىنىڭ دامۋى ادامداردىڭ جۇمىسپەن قامتىلۋىنا وسى كۇنگە دەيىن ايتىلىپ جۇرگەندەي اسا قاتتى اسەر ەتپەيدى ەكەن. بۇل تۋرالى ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) ەسەبىندە ايتىلعان.
وكسفورد ۋنيۆەرسيتەتى 2013 جىلى زەرتتەۋ جۇرگىزىپ, 20 جىلدىڭ ىشىندە اقش-تاعى جۇمىس ورىندارىنىڭ 47 پايىزىن, ۇلىبريتانياداعى جۇمىس ورىندارىنىڭ 35 پايىزىن روبوتتار الماستىرادى دەگەن بولجامىن جاريالاعان بولاتىن. بىراق ەىدۇ وكىلدەرى بۇل كورسەتكىش اقش-تا 10, ۇلىبريتانيادا 12 پايىزدان اسپايدى دەپ وتىر. بىراق اۆتوماتتاندىرۋ كوپتەگەن قىزمەتكەرلەردىڭ مىندەتتەرىن وزگەرتەدى, دەيدى ولار.
«بۇرىنعى زەرتتەۋلەردە اۆتوماتتاندىرۋعا قاتىستى ماماندىق اتاۋىن عانا ەسكەرىپ, ولاردىڭ ءار قىزمەتتە پايدالانىلۋ ەرەكشەلىكتەرىنە ءمان بەرمەگەن. جاڭا زەرتتەۋدە وسىنىڭ بارلىعى ەسكەرىلدى», دەيدى ەىدۇ ماماندارى. ولاردىڭ ايتۋىنشا, بولاشاقتا جاستارعا جۇمىس تابۋ قيىنعا سوعاتىن بولادى. سەبەبى جۇمىس تاجىريبەسىن ەندى باستايتىن ساتىداعى جۇمىس ورىندارىنىڭ كوبى اۆتوماتتاندىرىلادى. ۇيىم جۇرگىزگەن زەرتتەۋ ناتيجەسىندە بەلگىلى بولعانداي, 32 دامىعان مەملەكەتتەگى جۇمىس ورىندارىنىڭ 14 پايىزى جويىلادى. ناقتىلاپ ايتساق, 66 ملن جۇمىس ورنىنا روبوتتار كەلۋى مۇمكىن. سونىمەن قاتار جۇمىس ورىندارىنىڭ 32 پايىزى اۆتوماتتاندىرۋ اسەرىنەن تۇبەگەيلى وزگەرەتىن بولادى.
دايىنداعان
گۇلنۇر قۋانىشبەكقىزى,
«ەگەمەن قازاقستان»