قازاقستاننىڭ ىسكەر ايەلدەرى قاۋىمداستىعى پرەزيدەنت ن.نازارباەۆ ۇسىنعان, ناقتى مىندەتتەر بەلگىلەنگەن اۋقىمدى الەۋمەتتىك باعدارلامانى قۇرايتىن بەس باستامانى تولىق قولدايدى.
مەملەكەت باسشىسى «بۇل – ءبىزدىڭ قوعامنىڭ الەۋمەتتىك بىرلىگىن نىعايتۋ ءۇشىن جىگەرىمىزدى جانىپ, ناقتى ىسكە كىرىسەتىن ءسات. ءبىز ونى اۋقىمدى الەۋمەتتىك جوبالار ارقىلى جۇزەگە اسىرامىز», – دەي كەلە الەۋمەتتىك وركەندەۋدىڭ باعىت-باعدارىن ۇسىندى. باستامانىڭ ءاربىر باعىتى جالپى بۇقارانىڭ, ونىڭ ىشىندە جاستاردىڭ مۇددەسىنە ساي كەلەتىن ماسەلەلەردى قامتىعان.
وسى ارادا «7 – 20 – 25» الەۋمەتتىك يپوتەكالىق باستاماسىن ەرەكشە اتاپ وتكىم كەلەدى. اتالعان باعدارلاما 25 جىل مەرزىمگە 7 پايىزدىق وسىممەن بەرىلەتىن قولجەتىمدى يپوتەكا ارقىلى باسپانا الۋعا نەگىزدەلگەن. بۇل – جۇمىس ىستەيتىن جاستارعا ۇلكەن كومەك. سونداي-اق تۇرعىن ءۇي قۇرىلىسىنا سەرپىن بەرىپ, جاڭادان جۇمىس ورىندارىنىڭ اشىلۋىنا ىقپال ەتەدى.
ءبىز كاسىپكەر ايەلدەردىڭ مۇددەسىن قورعايتىن ۇيىمنىڭ وكىلى رەتىندە مىڭداعان ادامنىڭ, ونىڭ ىشىندە اۋىلدىقتاردىڭ ءوز ءىسىن اشۋىنا سەبەپشى بولىپ كەلگەن شاعىن نەسيە كولەمىنىڭ كوبەيتىلۋىنە دە ريزالىق بىلدىرەمىز.
سونداي-اق جوعارى ءبىلىمنىڭ ساپاسىن ارتتىرۋعا, ستۋدەنت جاستاردىڭ تۇرمىسىن تۇزەۋگە ەرەكشە كوڭىل بولىنگەندىگى دە قۋانتتى.
ەندى تاياۋ بولاشاقتا ەلباسى باستامالارىنىڭ تيىمدىلىگىن, ۇتىمدىلىعىن قازاقستاننىڭ ءاربىر ازاماتى سەزىنىپ جانە بارشا حالىقتىڭ ءال-اۋقاتى ارتقانىنا كۋا بولامىز دەپ ويلايمىن.
راۋشان سارسەمباەۆا,
قازاقستاننىڭ ىسكەر ايەلدەرى قاۋىمداستىعىنىڭ پرەزيدەنتى,
پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى