مەملەكەت باسشىسى نۇرسۇلتان نازارباەۆ بيىلعى جولداۋىندا كەلەشەكتىڭ كىلتى بىلىمدە ەكەنىن باسا ايتتى. وسى ورايدا ءبىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ بولۋى ءتيىس.
ەلباسى بيىلعى جولداۋى ارقىلى ءتورتىنشى ونەركاسىپتىك رەۆوليۋتسيا الەمىنە بەيىمدەلۋ ماسەلەسىن قاراپ, تابىسقا جەتۋدىڭ كوزىن تابۋ ءۇشىن نە ىستەۋ قاجەتتىگىن ايقىنداپ بەردى. جولداۋدا ماڭىزدى ون ماسەلە قامتىلىپ, وزەكتى سۇراقتارعا جاۋاپ بەرىلدى.
جالپى, نۇرسۇلتان نازارباەۆتىڭ باستاماسىمەن قولعا الىنعان كەز كەلگەن مەملەكەتتىك باعدارلامانىڭ باستى ماقساتتارى ايقىن. بۇل – ەلىمىزدى جاڭا ساتىعا كوتەرۋ, يننوۆاتسيالىق مۇمكىندىكتەردى پايدالانۋ ارقىلى حالىقتىڭ جاعدايىن جاقسارتۋ, زامانعا لايىق ساپالى ءبىلىم بەرۋ, عىلىم مەن ەكونوميكانى, اگرارلىق ءوندىرىستى جاڭا زامان تالاپتارىنا بەيىمدەۋ, ادامي كاپيتالدى دامىتۋ سىندى ماڭىزدى ماسەلەلەردى قامتيدى.
جاڭا مۇمكىندىكتەرگە جول اشقان جولداۋدىڭ قازىرگى تاڭدا ماڭىزى زور. جولداۋدا ايتىلعان ماڭىزدى مىندەتتەردىڭ ءبىرى – ادامي كاپيتالدى دامىتۋ. ساپالى ءبىلىم بەرۋ, رۋحاني قۇندىلىقتاردى دارىپتەۋ – تۇلعا قالىپتاستىرۋدىڭ نەگىزى. سول سەبەپتى, جان-جاقتى ءبىلىمدى كادرلاردى دايىنداۋ ءۇشىن ەڭبەك ەتەمىز. ءبىلىمدى مامانى بار ەل عانا باسەكەگە قابىلەتتى بولا الادى.
ن.نازارباەۆ ءبىلىم بەرۋدىڭ جاڭا ساپاسىنا قول جەتكىزۋ كەرەكتىگىنە ۇلكەن ءمان بەرىپ, بالالاردىڭ جانە جاسوسپىرىمدەردىڭ ەرتە دامۋىنا ولاردى الەۋمەتتەندىرۋ باعدارلامالارىنىڭ بىرىڭعاي ستاندارتتارىن ەنگىزۋ قاجەتتىگى تۋرالى ورىندى ايتتى. سونىمەن بىرگە ورتا ءبىلىم بەرۋ سالاسىندا جاڭارتىلعان مازمۇنعا كوشۋدى قامتاماسىز ەتۋ ءۇشىن حالىقارالىق ستاندارتتارعا ساي كەلەتىن زاماناۋي, جاڭا وقۋ باعدارلامالارى, وقۋلىقتار, ستاندارتتار مەن كادرلاردىڭ كەرەكتىگىنە ارنايى توقتالعان.
پەداگوگتاردىڭ قوعامداعى ءرولىن كوتەرۋ مەن جاستاردى جاڭا تەحنولوگيالىق قالىپقا دايىنداۋدىڭ ماڭىزدىلىعىنا, تەحنيكالىق جانە كاسىپتىك ءبىلىم بەرۋ باعدارلامالارىن جاڭارتۋعا, «بارشاعا تەگىن كاسىپتىك-تەحنيكالىق ءبىلىم بەرۋ» جوباسىن جۇزەگە اسىرۋدى جالعاستىرۋ قاجەتتىگىنە جولداۋدا كوپ كوڭىل بولىنگەن. بارلىق نەگىزگى ماماندىقتار بويىنشا زاماناۋي ستاندارتتار ازىرلەنىپ, سولاردىڭ تالاپتارىنا سايكەستەندىرىلىپ, ءبىلىم بەرۋدىڭ جاڭا باعدارلامالارىن جاساۋ قاجەتتىلىگى دە ەسكەرىلگەن.
ەلباسى كاسىپتىك-تەحنيكالىق ءبىلىم بەرۋدىڭ مازمۇنىن جاڭالاۋدى تاپسىردى. وسى ورايدا مەن ديرەكتورلىق قىزمەت اتقاراتىن ي.ابدىكارىموۆ اتىنداعى قىزىلوردا اگرارلىق تەحنيكالىق جوعارى كوللەدجى ءبىلىم جانە عىلىم مينيسترلىگى جانىنداعى «كاسىپقور حولدينگى» كوممەرتسيالىق ەمەس اكتسيونەرلىك قوعامىمەن بىرلەسە وتىرىپ, شەتەلدىڭ وزىق تەحنولوگياسىنىڭ قازاقستاندىق ۇلگىسىندە جاڭا وقۋ باعدارلامالارىن جاسادى. ناتيجەسىندە, كوللەدجدىڭ 2 ماماندىعى – «ەلەكترمەن قامتاماسىز ەتۋ», «ەسەپتەگىش تەحنيكا جانە باعدارلامامەن قامتاماسىز ەتۋ» ينتەگراتسيالانعان جاڭا ۇلگىدەگى وقۋ باعدارلامالارى بويىنشا سىناق الاڭىنا ەنگىزىلدى.
زامان كوشىنەن قالىسپاي وبلىسىمىزدىڭ ەكونوميكالىق ەرەكشەلىكتەرىنە اۋىلشارۋاشىلىق ماماندارىنىڭ قاجەتتىلىگىن ەسكەرە وتىرىپ, «اگرونوميا» ماماندىعى دۋالدى وقىتۋدىڭ ەكسپەريمەنتالدى الاڭىنا ەنگىزىلدى. دۋالدى وقىتۋدىڭ نەگىزگى باعىتتارىنىڭ ءبىرى – الەۋمەتتىك سەرىكتەستىك. ي.ابدىكارىموۆ اتىنداعى قىزىلوردا اگرارلىق تەحنيكالىق جوعارى كوللەدجى وسى ماماندىق بويىنشا 5 مەكەمەمەن كەلىسىمشارتقا وتىرعان. سولاردىڭ ءبىرى – ى.جاقاەۆ اتىنداعى قازاق كۇرىش شارۋاشىلىعى عىلىمي-زەرتتەۋ ينستيتۋتى. ناتيجەسىندە, مەكەمەمەن جانە ءبىلىم باسقارماسىمەن بىرىگە وتىرىپ وقۋ باعدارلاماسى, وقۋ جوسپارلارى دايىندالدى. الەۋمەتتىك سەرىكتەستىك وبلىس كولەمىندە عانا ەمەس, رەسپۋبليكالىق دەڭگەيدە جاقسى جولعا قويىلعان. اتاپ ايتقاندا, الماتى قالاسىنداعى قازاق تاعامتانۋ اكادەمياسىنىڭ جانىنداعى «اميران اگرو» اۋىلشارۋاشىلىق كەشەنى, شىمكەنت قالاسىنداعى «ەۋروكريستالل» شىنى زاۋىتىمەن الەۋمەتتىك سەرىكتەستىك ورناتىپ, ستۋدەنتتەر تاجىريبەدەن وتۋدە.
كوللەدج 25 ماماندىق بويىنشا ماماندار دايارلايدى. وقۋ باعدارلامالارى جۇمىس بەرۋشىلەر مەن ستۋدەنتتەردىڭ پىكىرىن ەسكەرە وتىرىپ جاسالىندى. «كاسىپقور حولدينگى» شەتەلدىك كوللەدجدەردىڭ ۇزدىك تاجىريبەسىن ەسەپكە الا وتىرىپ, جاڭا ۇلگىدەگى وقۋ باعدارلامالارى بويىنشا كوللەدجدىڭ 6 ارنايى ءپان وقىتۋشىسى, 3 مەنەدجەرى بەلارۋس مەملەكەتىندە «دۋالدى وقىتۋدى ەنگىزۋدىڭ حالىقارالىق تاجىريبەسى», «وندىرىستىك وقىتۋدى ۇيىمداستىرۋ جانە ونىڭ ادىستەمەسى» تاقىرىپتارىندا بىلىكتىگىن ارتتىرىپ, تاجىريبە الماسىپ كەلدى. استانا قالاسىندا 1 اي كولەمىندە 6 ارنايى ءپان وقىتۋشىلارى «كاسىبي پەداگوگيكا جانە پسيحولوگيا نەگىزدەرى» تاقىرىبىنداعى كۋرسىندا بىلىكتىلىگىن ارتتىردى.
قازىرگى ۋاقىتقا دەيىن كوللەدج بويىنشا 140 ارنايى ءپان وقىتۋشىسى بىلىكتىلىكتى ارتتىرۋ كۋرستارىنان ءوتتى. ناتيجەسىندە, ماماندىق بويىنشا جاڭا ۇلگىدەگى مودۋلدىك قۇزىرەتتىلىك وقۋ باعدارلامالارى دايىندالىپ, وقۋ ۇدەرىسىنە ەنگىزىلدى. مودۋلدىك تەحنولوگيالاردىڭ ەرەكشەلىگى – ءبىلىمدى مەڭگەرتۋ عانا ەمەس, ستۋدەنتتىڭ تانىمدىق قابىلەتى مەن شىعارماشىلىق دەڭگەيىن ارتتىرۋ. بۇل ءبىرىنشى كەزەكتە وقىتۋشىدان جوعارى كاسىبي شەبەرلىكتى تالاپ ەتەدى. وقۋ ۇدەرىسىندە وسىنداي وزىق تەحنولوگيالاردى بەلسەندى پايدالانۋ ايتارلىقتاي وڭ تاجىريبە بەرىپ وتىر.
قازىرگى تاڭدا جاڭاشا فورماتتاعى وقىتۋشىنىڭ بويىندا كىرىكتىرىلگەن ءبىلىمنىڭ جوعارى دەڭگەيدە بولۋى, سونىمەن قاتار يننوۆاتسيالىق تەحنولوگيالاردى مەڭگەرۋى, كاسىپتىك پەداگوگيكالىق قاسيەتكە جاڭاشا كوزقاراسپەن قاراۋى, پەداگوگيكالىق مىندەتتەردى شەشۋدەگى كاسىپتىك, شىعارماشىلىق ىسكەرلىگى مەن شەبەرلىگى بولۋى باستى مىندەت. كوللەدجدە كەزەڭ-كەزەڭىمەن «كاسىپقور حولدينگى» قامتاماسىز ەتەتىن وقۋلىقتار نەگىزىندە «ينفورماتيكا» ءپانىن اعىلشىن تىلىندە مەڭگەرۋگە كوشۋدە كوللەدج بازاسىندا بولاشاق مامانداردىڭ IT قۇزىرلىعىن دامىتۋ باعىتىندا «ەسەپتەۋ تەحنيكاسى جانە باعدارلامالىق قامتاماسىزداندىرۋ» ماماندىعى بويىنشا اعىلشىن تىلىندە ارنايى پاندەر جۇرگىزىلەتىن بولادى.
كوللەدجدىڭ سان-سالالى كاسىپتىك تەحنيكالىق ماماندىقتار دايارلاۋدا ورنى ەرەكشە. اگروونەركاسىپتىك, ەلەكترمەن قامتاماسىز ەتۋ, مۇناي-گاز قۇبىرلارى مەن قويمالارىن سالۋ جانە پايدالانۋ, شىنى تالشىق جانە شىنىدان جاسالعان زاتتار ءوندىرىسى, ۆەتەريناريا, اگرونوميا, بالىق شارۋاشىلىعى, ورمان شارۋاشىلىعى, جۇمىسشى ماماندىقتارى جانە باسقا دا قازىرگى زامان تالابىنا قاجەتتى ماماندىقتار دايارلايدى. ەلەكترمەن دانەكەرلەۋشى دەگەن قاراپايىم ماماندىق يەلەرىنىڭ ءوزى اتقاراتىن جۇمىسىنىڭ كومپيۋتەرلىك باعدارلاما ارقىلى ىسكە اساتىنىن بىلگەنى ابزال. سوندىقتان جاستار قاجەتتى ماماندىقتاردى وقۋ ارقىلى يگەرۋگە ۇمتىلسا جاڭا زامان كوشىنە ىلەسەدى.
سۇلتانبەك تاۋىپباەۆ,
تەحنيكا عىلىمدارىنىڭ دوكتورى, پروفەسسور
قىزىلوردا