ورتالىق كوممۋنيكاتسيالار قىزمەتىندە ينۆەستيتسيالار جانە دامۋ ءمينيسترى جەڭىس قاسىمبەك مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋى اياسىندا ونەركاسىپ, كولىك جانە لوگيستيكالىق ينفراقۇرىلىمدى تسيفرلاندىرۋ, قۇرىلىس پەن كوممۋنالدىق سەكتورعا زاماناۋي تەحنولوگيالاردى ەنگىزۋ, تۇرعىن ۇيگە قولجەتىمدىلىكتى قامتاماسىز ەتۋ مەن جەرگىلىكتى جولدار جەلىسىن دامىتۋ بويىنشا ءجۇرىپ جاتقان جۇمىستارعا بايلانىستى ءباسپاسوز ءماسليحاتىن وتكىزدى.
ج.قاسىمبەكتىڭ ايتۋىنشا, باعدارلامانى ويداعىداي ىسكە اسىرۋدىڭ ناتيجەسىندە 2017 جىلى وڭدەۋ ونەركاسىبىنىڭ ءوسىمى 5,1 پايىزعا جەتكەن. «يندۋستريالاندىرۋ كارتاسى اياسىندا 2017 جىلى 1,5 ترلن تەڭگە قارجىعا 120 جوبا ىسكە قوسىلىپ, 10 مىڭ تۇراقتى جۇمىس ورنى اشىلدى. بيىل جىل سوڭىنا دەيىن 1 ترلن تەڭگە قارجىعا 150 جاڭا جوبانى ىسكە قوسۋ جوسپارلانىپ وتىر. وندا شامامەن 15 مىڭ تۇراقتى جۇمىس ورنى اشىلادى», دەدى ج.قاسىمبەك.
ەلىمىزدىڭ كوپتەگەن ازاماتتارى ءۇشىن تۇرعىن ءۇي وزەكتى ماسەلە رەتىندە كۇن تارتىبىنەن تۇسپەيدى. ءمينيستردىڭ سوزىنشە, بىلتىر «نۇرلى جەر» باعدارلاماسىن ىسكە اسىرۋدىڭ ناتيجەسىندە 100 مىڭنان استام وتباسى جاڭا باسپاناعا قول جەتكىزگەن. 2017 جىلدىڭ قورىتىندىسى بويىنشا قازاقستاندا پايدالانۋعا بەرىلگەن تۇرعىن ءۇي كولەمى 11 ملن شارشى مەتردەن اسقان. ول 2016 جىلعا قاراعاندا 6,2 پايىزعا جوعارى.
«مەملەكەت باسشىسى بيىلعى جولداۋىندا 2030 جىلى حالىقتى جان باسىنا شاققاندا 30 شارشى مەتردەن كەلەتىندەي تۇرعىن ۇيمەن قامتاماسىز ەتۋدى تاپسىردى. سوندىقتان «نۇرلى جەر» باعدارلاماسىن ودان ءارى ىسكە اسىرۋ مەحانيزمدەرىن قايتا قاراپ جاتىرمىز. تۇرعىن ۇيگە قولجەتىمدىلىكتى قامتاماسىز ەتۋ ماقساتىندا ارزان قۇرىلىس پەن يپوتەكالىق كرەديت بەرۋ ماسەلەلەرى بويىنشا جۇمىس جۇرگىزەمىز. 2030 جىلعا قاراي تۇرعىن ءۇي كورسەتكىشىن ءبىر تۇرعىنعا شاققاندا 30 شارشى مەترگە دەيىن جەتكىزۋ جوسپارلانۋدا. سونداي-اق مەملەكەت باسشىسى جاريالاعان بەس الەۋمەتتىك باستامانى ىسكە اسىرۋ اياسىندا وسى ايدا جاڭا «7 – 20 – 25» يپوتەكالىق باعدارلاماسىنىڭ نورمالارىن ەسەپكە الا وتىرىپ, «نۇرلى جەر» باعدارلاماسىنا ەنگىزىلەتىن وزگەرىستەردى ۇكىمەتكە تانىستىرامىز. قىسقاشا ايتقاندا, جاڭا باعدارلامادا نەسيەنىڭ پايىزدىق ۇستەمەسى جىلىنا 7 پايىزعا دەيىن تومەندەتىلەدى. ال باستاپقى جارنا 20 پايىزدان اسپايدى. اي سايىنعى تولەم جۇكتەمەسىن ازايتۋ ءۇشىن نەسيە مەرزىمى 25 جىلعا دەيىن ۇزارتىلادى. وسى مەحانيزم ارقىلى ءاربىر جۇمىس ىستەيتىن ادام نەسيەگە پاتەر ساتىپ الا الادى», دەدى ول.
سونىمەن قاتار ينۆەستيتسيالار جانە دامۋ ءمينيسترى اۋىلدىق ەلدى مەكەندەردى ورتالىقتاندىرىلعان اۋىزسۋمەن جابدىقتاۋدى 59 پايىزعا, ال قالالاردا 94 پايىزعا جەتكىزۋ جوسپارلانىپ جاتقانىن جەتكىزدى.
مەملەكەت باسشىسى جولداۋىندا كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋ ماسەلەسىنە ەرەكشە نازار اۋدارعانى بەلگىلى.
«سوندىقتان «نۇرلى جول» ينفراقۇرىلىمدى دامىتۋ مەملەكەتتىك باعدارلاماسى ايرىقشا باقىلاۋدا. وتكەن جىلى بىرنەشە ءىرى جوبا جۇزەگە استى. ولاردىڭ ىشىندە الماتى-شۋ ۋچاسكەسىندەگى ەكىنشى جولدىڭ قۇرىلىسى, قۇرىق پورتىندا اۆتوموبيل-پارومدىق كەشەنىنىڭ ءبىرىنشى كەزەڭى اياقتالدى. استانا قالاسىنىڭ «نۇرسۇلتان نازارباەۆ» اتىنداعى اۋەجايىندا جاڭا جولاۋشىلار تەرمينالى, «نۇرلى جول» جاڭا تەمىر جول ۆوكزالى پايدالانۋعا بەرىلدى. رەسپۋبليكالىق ماڭىزداعى 4,4 مىڭ شاقىرىم اۆتوجولعا قۇرىلىس جۇمىستارى جۇرگىزىلدى. وڭىرىشىلىك موبيلدىلىكتى ارتتىرۋ ماقساتىندا مەملەكەت باسشىسى جەرگىلىكتى جول جەلىسىن جوندەپ, قايتا جاڭارتۋ ءۇشىن قارجىلاندىرۋ كولەمىن ۇلعايتۋدى تاپسىردى. بيىل قارجىلاندىرۋ كولەمى 85 ملرد تەڭگەنى قۇرادى. 2018 جىلعى بيۋدجەتتى ناقتىلاۋ كەزىندە مينيسترلىك قوسىمشا 30 ملرد تەڭگە ءبولدى. وبلىس اكىمدىكتەرى دە جەرگىلىكتى بيۋدجەتتەن قارجى قاراستىردى. الداعى جىلدارى قارجىلاندىرۋ سوماسى 150 ملرد تەڭگەگە دەيىن جەتكىزىلەدى. ول قارجىعا جىل سايىن شامامەن 5 مىڭ شاقىرىم جول جوندەلەدى. بيىل «نۇرلى جول» باعدارلاماسىن جۇزەگە اسىرۋ اياسىندا 4,2 مىڭ شاقىرىم رەسپۋبليكالىق ماڭىزى بار اۆتوجولدار جانە 3 مىڭ شاقىرىم جەرگىلىكتى جەلىلەر رەكونسترۋكتسيالانادى. قابىلدانعان شارالار الداعى جەتى جىلدا جەرگىلىكتى جولداردىڭ 85 پايىزىن جاقسارتۋعا مۇمكىندىك بەرەدى. ءبىز اۆتوجولداردى سالۋعا بولىنگەن قاراجاتتىڭ تيىمدىلىگى مەن اشىقتىعىن باقىلاۋدى كۇشەيتەمىز. مەملەكەت باسشىسىنىڭ جولداۋىندا جۇكتەلگەن بارلىق تاپسىرما ايرىقشا باقىلاۋدا بولادى جانە دەر كەزىندە ورىندالادى», دەدى ج.قاسىمبەك.
راۋان قايدار,
«ەگەمەن قازاقستان»