الماتىلىق 14 جاستاعى ەتەل تۋمىش اقش-تاعى شارشى الاڭداردا تالاي جەڭىسكە جەتىپ, 30 مەدال مەن 10 كۋبوكقا يەلەنگەن. جەكپە-جەكتە تالاي قارسىلاسىن تىزە بۇكتىرگەن ەتەل كەلەشەكتە وليمپيادا ويىندارىنا قاتىسىپ, قازاق ەلىنىڭ نامىسىن قورعاۋدى ارماندايدى. بۇل تۋرالى حابار 24 حابارلادى.
اقش-تاعى العاشقى وندىققا كىرەتىن نيۋ-يوركتىڭ كۋينس اۋدانىنداعى Kai Leung's Shotojuku (كاي لۋنگ'س شوتودزيۋكۋ) كاراتە مەكتەبى قازاقستاننان كەلگەن جاس قىزدىڭ ونەرىنە بىردەن كوڭىل اۋدارعان. ويتكەنى ەتەل تۋمىش الماتىدا 8 جاسىنان باستاپ كاراتەنىڭ «شيتو-ريۋ» ادىسىمەن اينالىسقان. بىرنەشە جىل جاتتىعۋدان سوڭ ول ءتىپتى الماتىدا 2-ورىنعا يە بولادى. ال ەلىمىزدىڭ سىرتقى ساياساتى قىزمەتىندەگى اكەسى نيۋ-يورككە جۇمىسقا اۋىسقاندا, ەتەل دە اكە-شەشەسىمەن بىرگە قۇراما شتاتتارعا قونىس اۋدارادى. جاڭا مەكتەپتە ەتەل كاراتەنىڭ «شوتوكان» دەپ اتالاتىن ءتۇرىن ۇيرەنىپ, «كاتا» - «كولەڭكەمەن كۇرەس» قوزعالىسىن ۇشتايدى. ءسويتىپ تاباندىلىق پەن تىنىمسىز جاتتىعۋدىڭ ارقاسىندا ول امەريكاداعى بەدەلدى جارىستاردا وزىق شىعادى.
ءار ادامنىڭ جەتىستىگىنە ءار ءتۇرلى نارسە سەبەپ بولىپ جاتادى. ەتەلدىڭ كاراتەگە كەلۋ سەبەبى دە قىزىق ەكەن. ول تۋرالى ءوزى بىلاي دەيدى:
- 1-سىنىپتا وقىعاندا, مەنى ميراس ەسىمدى بالا رەنجىتىپ, ءجابىر كورسەتۋشى ەدى. بىردە ودان ءوز قىلىعى ءۇشىن كەشىرىم سۇراۋىن تالاپ ەتكەندە, ول ماعان تارپا باس سالعانى ەسىمدە. سول كەزدە ەشنارسە ىستەي الماي, كوپ جىلاپ, قاتتى قامىقتىم. سودان شەشەمە كەلىپ, ميراستىڭ رەنجىتكەنىن ايتتىم. سوندا شەشەم ء«وزىڭدى قورعاپ ۇيرەنۋ كەرەك», - دەپ, كاراتەگە اپارعان. مىنە ەندى سول بالاعا راقمەت ايتقىم كەلەدى. ەگەر ول رەنجىتپەسە, مەن جەتىستىككە جەتپەس ەدىم,- دەيدى كاراتەدەن چەمپيون ەتەل تۋمىش.
ەتەلدىڭ باستى جەڭىسى - وڭتۇستىك كارولينادا وتكەن اقش چەمپيوناتىندا «كوبۋدو» قارۋىمەن سايىستا ءبىرىنشى ورىندى يەلەنۋى. وتانداسىمىز پيتتسبۋرگتە وتكەن جارىستا «كۋميتە» بويىنشا ەكىنشى, «كاتە» بويىنشا ءۇشىنشى, ال «كولەڭكەمەن ۇرىس» ءادىسى بويىنشا قولا مەدال ەنشىلەيدى. 2016 جىلى ول فيلادەلفياداعى اشىق بىرىنشىلىكتە ابسوليۋتتىك چەمپيون اتاعىن جەڭىپ الادى. ەتەل بەدەلدى سانالاتىن نيۋ-يورك شتاتىنداعى ءداستۇرلى شوتوكان-كاراتە چەمپيوناتىندا دا جەڭىسكە قول جەتكىزگەن.
- ءبىر رەت «ساي» دەپ اتالاتىن ءادىس بويىنشا تەمىر قارۋمەن ونەر كورسەتىپ جاتقاندا, بولماشى قاتەلىك ءۇشىن جارىستان شىعارىپ تاستاي جازدادى, -دەيدى ەتەل تۋمىش. «ويتكەنى مەنىڭ باسىمدا شاشىمدى جيناستىرعان ءۇش رەزەڭكە بولعان. ال ءتارتىپ بويىنشا ول ەكەۋدەن اسپاۋى ءتيىس. بىراق مەنىڭ جارىستى ارى قاراي جالعاستىرۋىما رۇقسات بەرىپ, التىن مەدال يەلەندىم».
ەتەلدى كاراتەدەن اتاقتى چەمپيون كاي لۋنگ دايىندايدى. حالىقارالىق شوتوكاي فەدەراتسياسىنىڭ نەگىزىن قالاۋشىلاردىڭ ءبىرى گونكونگتەن اقش-قا 1970 جىلى كەلگەن. 80 جىلدارى الەمدەگى 10 كۇشتى كاراتەشىنى شىڭدادى. ونىڭ كەن لۋنگ ەسىمدى شاكىرتى الەمگە ايگىلى كينوجۇلدىز دجەكي چانمەن بىرنەشە فيلمگە تۇسسە, تاعى ءبىر تالىمگەرى دەۆي سانتوس ەسىمدى اكتەرمەن بىرگە جەتەكشى رولدە ويناعان. ءسويتىپ كاي ۇستاز - اقش-تا كوپ چەمپيوندار دايىنداعان شەبەر.
كاي لۋنگتىڭ ايتۋىنشا, ەتەل مۇندا ارالاس شىعىس جەكپە-جەگىن ۇيرەنۋ ءۇشىن كەلگەن. «كاراتەنى جاقسى كورەدى. كوپ تەر توگىپ, اقش چەمپيونى بولدى. مەن ونى ماقتان تۇتامىن. قازاقستاندا قازىر جاقسى كاراتەشىلەر بار. ەتەل جاتتىعۋىن قازاقستاندا جالعاستىراتىن بولادى», -دەيدى جاتتىقتىرۋشى.
ەتەل تۋمىشتىڭ ەندىگى ارمانى قازاقستان اتىنان وليمپياداعا قاتىسىپ, كاراتەدەن التىن جۇلدە ەنشىلەپ قازاقتىڭ ابىرويىن اسقاقتاتۋ.