وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى وسى كەزگە دەيىن ەكى رەت جەمقورلىق سىبايلاستىققا جول بەرگەن مەكتەپ ديرەكتورىنىڭ قىزمەتكە زاڭسىز ورنالاسقانىن اشكەرەلەدى.
اسقار حامزين وسىدان ون جىل بۇرىن اققايىڭ اۋدانىنا قاراستى № 3 سميرنوۆ مەكتەبىنباسقارىپ تۇرعاندا وقۋشىلارعا اۋلاسىنىڭ قارىن كۇرەتىپ, باقشاسىنىڭ ءارامشوبىن جۇلعىزىپ, وتىنىن جارعىزعان. پروكۋراتۋرا تەكسەرۋ بارىسىندا سونداي-اق بالالاردىڭ تاماعىنا زاڭسىز اقشا جيناتقىزعانىن دا انىقتاعان. زاڭعا قيعاش وسىنداي ارەكەتتەرى ءۇشىن جۇمىستان الاستاتىلعان.
الايدا, ونىڭ بۇدان كەيىن شال اقىن اۋدانى افاناسەۆكا اۋىلدىق وكرۋگىنىڭ اكىمى بولىپ تاعايىندالعانى, ارنايى تەكسەرۋدەن قالاي وتكەنى تۇسىنىكسىز. جاڭا قىزمەتتە قولاستىنداعىلاردى وتىن كەسۋگە كۇشتەپ جىبەرىپ,قىزمەتكەرلەردىڭ ءبىرىن ارا شاعىپ, وقيعا ورنىندا كوز جۇمعان. ەكس-اكىم بولسا تارتىپتىك كەڭەستىڭ قىزمەتتەن بوساتۋ تۋرالى شەشىمىمەن كەلىسپەي سوتقا جۇگىنگەن. بىراق جەڭىلىس تاپقان.
سۋعا سالسا باتپايتىن, وتقا سالسا كۇيمەيتىن «باتىرىڭ» بىلتىر ايىرتاۋ اۋدانىنداعى تومەنگى بۇرلىق مەكتەبىنە مۇعالىم بولىپ ورنالاسىپ, ىلە-شالا ءمۇيىزى قاراعايداي ديرەكتور بولىپ شىعا كەلگەن. ونىڭ باسشىلىق قىزمەت اتقارۋعا ەش قۇقى جوعىن بىلە تۇرا اۋداندىق وقۋ ءبولىمى جولسىزدىققا كوز جۇما قاراعان. ادەپ كەڭەسىنىڭ جۋىردا وتكەن وتىرىسىندا مەكتەپ ديرەكتورىن قىزمەتتەن بوساتۋعا شەشىم الىنىپ, اۋداندىق وقۋ ءبولىمىنىڭ جەتەكشىسى اكىمشىلىك جاۋاپكەرشىلىككە تارتىلاتىن بولدى.
ءومىر ەسقالي.
«ەگەمەن قازاقستان».
سولتۇستىك قازاقستان وبلىسى.