شىعىس قازاقستاندا ەت جانە ەت ونىمدەرىن وڭدەۋ بويىنشا ەكى كومبينات سالىنادى.
وبلىس اكىمىنىڭ ءباسپاسوز قىزمەتىنىڭ بەرگەن مالىمەتتەرىنە سۇيەنسەك, وتكەن جىلدىڭ قورىتىندىسى بويىنشا ايماقتا 105%-دىق وسىممەن 270 مىڭ توننا ەت وندىرىلگەن, بۇل - رەسپۋبليكالىق ۇلەستىڭ 15%-ى. ناتيجەسىندە شىعىس قازاقستان ەلىمىز بويىنشا ەكىنشى ورىندا كەلەدى. «ەڭ باستىسى, باسەكەلەستىككە باستار مۇمكىندىكتەردى پايدالانا وتىرىپ, ارتىقشىلىقتاردى ءتيىمدى قولدانۋ, – دەدى شقو اكىمى دانيال احمەتوۆ تۇرعىندار الدىنداعى ەسەبىندە. – سوندىقتان جوعارى ساپالى دايىن ونىمدەر نارىعىنا شىعۋ ءۇشىن «ەۆرازيا اگروحولدينگ» جشس اۆستراليالىق كومپانياسىمەن تىزە قوسىپ, اياگوز اۋدانىندا ەت وڭدەيتىن كومبينات سالۋ جۇمىستارى جۇرگىزىلۋدە. بۇدان بولەك ءبىزدىڭ تاراپتان نىسانعا 468 ملن. تەڭگەگە بارلىق قاجەتتى ينفراقۇرىلىمى جۇرگىزىلىپ, جوبالىق-سمەتالىق قۇجاتتاماسى ازىرلەنىپ جاتىر.
سونداي-اق, «اگروپورتال» جشس يراندىق كومپانيانىڭ قاتىسۋىمەن سەمەيدە ەت وڭدەۋ كومبيناتىنىڭ قۇرىلىسى بويىنشا ءىرى ينۆەستيتسيالىق جوبا جۇزەگە اسىرىلۋعا دايىن. وسى رەتتە وتكەن جىلدىڭ سوڭىندا قر يدم ينۆەستيتسيالار كوميتەتى مەن «اگروپورتال» جشس اراسىندا ينۆەستيتسيالىق كەلىسىمشارتقا قول قويىلعاندىعىن اتاپ وتكەن ءجون.
سونىمەن قاتار شىعىس قازاقستاندا حالىقارالىق ستاندارتتار بويىنشا اۋىل شارۋاشىلىعى ونىمدەرىن سۇرىپتاۋدىڭ بۇكىل جيىنتىعىن جۇزەگە اسىراتىن زەرتحانا اشىلادى. ايماق باسشىسىنىڭ ايتۋىنشا, «قىتايلىق ستاندارتتار بويىنشا سەرتيفيكاتتاۋ – اسپان استى ەلىنىڭ نارىعىنا اپاراتىن توتە جول».
ء«بىز ءۇشىن قىتاي نارىعى ماڭىزدى. قازىرگى كۇنى وبلىستا قازاقستاندىق ونىمدەردى قىتايلىق ستاندارت بويىنشا سەرتيفيكاتتاۋ زەرتحاناسىن قۇرۋ جۇمىستارى جۇرگىزىلۋدە. وسى ماسەلە بويىنشا بيىل قاڭتاردا قىتاي حالىق رەسپۋبليكاسىنان ءبىر توپ ماماندار ءبىزدىڭ وبلىسقا كەلىپ قايتتى. زەرتحانانى ورنالاستىراتىن عيمارات دايىندالۋدا. قۇنى ميللياردتان استام تەڭگە بولاتىن قوندىرعىنى جەتكىزۋ جۇمىسىن قازان ايىندا باستايمىز», – دەدى ايماق باسشىسى.
ايتا كەتۋ كەرەك, بۇل زەرتحانا ەلدەگى بىرەگەي ورتالىق بولماق.
ازامات قاسىم,
«ەگەمەن قازاقستان»
شىعىس قازاقستان وبلىسى