«دەۆيس» كۋبوگى ەندى الەم چەمپيوناتى بولىپ وزگەرەدى

ەلىمىزدىڭ كوپتەگەن تەننيس ورتالىقتارىندا وسى سپورتقا اياق باسقان بۇلدىرشىندەرگە ارنالعان شەبەرلىك سىنىپتارى ءوتىپ, ولاردىڭ اتا-انالارىنا ارنالعان سىي-سىياپاتتار تابىستالدى. ەلىمىزدە تەننيس سپورتى قارقىندى دامىپ كەلە جاتقان الماتى, اقتوبە, شىمكەنت, ورال قالالارىندا ءتۇرلى مەرەكەلىك جيىندار ۇيىمداستىرىلدى. 2013 جىلى حالىقارالىق تەننيس فەدەراتسياسى بەكىتكەن مەرەكە بۇل جولى «تەننيس 10» باعدارلاماسىنىڭ اياسىندا اتاپ ءوتىلدى. ياعني, ۇلكەن تەننيسكە ەندى اياق باسقان, 10 جاسقا دەيىنگى بۇلدىرشىندەر اراسىندا ءتۇرلى سايىستار جاسالىندى. جۇزدەن استام جەتكىنشەككە تەننيس تاياقشالارى تابىستالىپ, كوپتەگەن سىيلىقتار تاراتىلدى. وسىنداي مەرەكەنىڭ ءبىرى ەلورداداعى «داۋلەت» ۇلتتىق تەننيس ورتالىعىندا دا بولدى. وندا ءبىز قازاقستان تەننيس فەدەراتسياسىنىڭ ۆيتسە-پرەزيدەنتى دياس دوسقاراەۆتى سوزگە تارتتىق.

- حالىقارالىق تەننيس كۇنى ءبىز ءۇشىن وتە ماڭىزدى. وسى سپورتتى دامىتۋدىڭ, ناسيحاتتاپ قالۋدىڭ تاعى ءبىر مۇمكىندىگى دەسەك ارتىق ەمەس. بۇگىن جاتتىعۋلار اشىق تۇردە ءجۇرىپ جاتىر. بالالارىنىڭ قالاي جاتتىعاتىنىن اتا-انالار دا كورىپ وتىر. تەننيسكە ەندى كەلىپ جاتقان ەلوردالىق بالالارعا كوپتەگەن سىيلىقتار جاسادىق. ولاردىڭ وسى سپورتقا دەگەن ماحابباتىن ودان ءارى اشا ءتۇسۋىمىز كەرەك.

- دياس باۋىرجان ۇلى, ەلىمىزدەگى تەننيستىڭ دامۋىنا بايلانىستى اتقارىلىپ جاتقان شارۋالار وتە كوپ. الايدا, جاڭادان اشىلاتىن تەننيس ورتالىقتارى قاشان بوي كوتەرمەك. ءبىر سۇقباتىڭىزدا استانا مەن پەتروپاۆلسك قالالارىندا تەننيس ورتالىعى اشىلادى دەپ ەدىڭىز؟

- نەگىزى سولتۇستىك قازاقستان وبلىسىنداعى ورتالىقتىڭ تەحنيكالىق اشىلۋى بولىپ قويعان. ورتالىق قازىر جۇمىس ىستەپ تۇر. تەك ءبىز ونى رەسمي تۇردە جازعا قاراي اشىپ, كەڭ قولدانىسقا قوسامىز. ال استانادا «جەرۇيىق-2» ساياباعىنىڭ ىشىنەن اشىلاتىن تەننيس ورتالىعىنىڭ قۇرىلىسى وسى جازدا باستالادى. سونىمەن قاتار, قازىر قۇرىلىسى ءجۇرىپ جاتقان شىمكەنتتەگى تەننيس ورتالىعىن دا ايتا كەتەيىن. ونداعى كەشەن جاقىن ارادا پايدالانۋعا بەرىلەدى. ورتالىقتا قوناقۇي, باسسەين, كوپتەگەن كورتتار بولادى. الماتىدا تاعى ءبىر ورتالىقتىڭ قۇرىلىسى اياقتالىپ, 9-اقپان كۇنى پايدالانۋعا بەرىلدى. قازىر وندا باپكەرلەر جۇمىسقا كىرىسىپ, تەننيسكە جازىلعان جەتكىنشەكتەردى قابىلداپ جاتىر. بارامىن, قاتىسامىن دەگەندەرگە ەسىك اشىق. مەكەن-جايى «مامىر» ىقشاماۋدانىندا. ەندىگى ماقسات – قاراعاندى, اقتاۋ, قوستاناي قالالارىندا ەكىنشى تەنننيس ورتالىقتارىن اشۋ. نەگىزى مەن اتاپ وتكەن قالالاردىڭ بارلىعىندا تەننيس ورتالىقتارى بار. بىراق, جاتتىققىسى كەلەتىن بالالاردىڭ سانى تىم كوپ بولعاندىقتان, ءبىز ولاردى ءبىر ورتالىققا سىيدىرا الماي جاتىرمىز. بۇگىندە 7 مىڭنان استام جەتكىنشەك تەننيسكە جازىلعان. ودان بولەك, اۋەسقويلاردىڭ ءوزى قانشاما؟!

- دياس مىرزا, جاقىن ارادا قازاقستان قۇراما كومانداسى حورۆاتياعا قوناققا بارادى. «دەۆيس» كۋبوگىندا تەگەۋرىندى قارسىلاسقا تاپ بولدىڭىزدار. بۇل قۇرامانى جەڭىپ, كەلەسى كەزەڭگە وتۋگە مۇمكىندىك بار ما؟

- بىزدە بۇل ويىنعا ۇلكەن جوسپار بار. بەس رەت شيرەك فينالعا شىقتىق. بىراق, تاريحىمىزدا ەشقاشان جارتىلاي فينالعا ءوتىپ كورمەدىك. سوندىقتان دا, وسى ويىندا بار كۇشىمىزدى كورسەتۋىمىز كەرەك. حورۆاتيا قۇراماسى مارين چيليچ, بورنا چوريچ سەكىلدى مىقتى تەنيسشىلەردەن جاساقتالعان. بەس تەننيسشىسىنىڭ بەسەۋى دە توپ-50 قاتارىنا كىرەدى. جۇپتاسىپ وينايتىن تەننيسشىلەرىنىڭ ءوزى مىقتى. بىزگە قيىن بولاتىنى انىق. 100 پايىز جەڭەمىز دەپ ايتۋدان اۋلاقپىن. ءبىر وزگەشەلىگى بۇل جولى ءبىز زاگرەبتىڭ قاسىنداعى پاراجدين قالاسىنداعى قۇمداۋىت توسەنىشتە ونەر كورسەتەمىز. حورۆاتيانىڭ ەڭ مىقتى تەننيسشىسى مارين چيليچ وسى جولى قۇراما ساپىندا وينايمىن دەپ ايتىپتى. قازاقستان قۇراماسى دەگەن كەزدە بارلىعى ەڭ مىقتى ويىنشىلارىن شاقىرتاتىن بولعان.

باستى ماقسات ەل ابىرويىن تومەن تۇسىرمەۋ. ونىڭ ۇستىنە حالىقارالىق تەننيس فەدەراتسياسى كەلەر جىلى ۇلكەن ءبىر جوبانى قولعا الماقشى. بۇل جارىستىڭ فورماتىن وزگەرتكەلى جاتىر. «دەۆيس» كۋبوگى ەندى الەم چەمپيوناتى سەكىلدى وتەدى. ءبىر اپتانىڭ ىشىندە 18 كوماندا توپ-توپقا ءبولىنىپ ونەر كورسەتەدى. ال سول كەزدە بىزگە توبىمىزدان شىعۋ قيىن بولادى. الەمدىك توپتا قالۋدىڭ ءوزى وڭايعا سوقپايىن دەپ تۇر. دەمەك, قازىردەن باستاپ الەمدىك رەيتينگىمىزدى جوعارىلاتا بەرگەنىمىز ءجون.

ەرمۇحامەد ماۋلەن,

«ەگەمەن قازاقستان»