بۇگىن ۇكىمەت وتىرىسىندا قر پرەمەر-ءمينيسترى باقىتجان ساعىنتاەۆ ەلباسى جاريالاعان بەس الەۋمەتتىك باستاما بويىنشا مەملەكەتتىك ورگاندارعا ءتيىستى تاپسىرمالار بەردى, دەپ حابارلايدى primeminister.kz.
«مەملەكەت باسشىسىنىڭ ءوز باستامالارىن ارنايى ۇندەۋ ارقىلى جاريالاپ, وندا قازاقستاندىقتارعا شىنايى العىسىن ءبىلدىرۋى ونىڭ ماڭىزدىلىعىن ارتتىرا تۇسەدى. بۇل – ەلباسىنىڭ حالقىنا ۇسىنعان پرەزيدەنتتىك ءارى پەرزەنتتىك سىيى. ول باستامالاردىڭ ارقايسىسى بۇگىنگى تاڭدا حالىقتىڭ كوكەيىندە جۇرگەن ەڭ ماڭىزدى ماسەلەلەردى قامتيدى», — دەدى ب. ساعىنتاەۆ.
پرەزيدەنت حالىقتى قولجەتىمدى باسپانامەن قامتۋ, سالىق جۇكتەمەسىن ازايتۋ, جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ, شاعىن نەسيە بەرۋدى كوبەيتۋ جانە ەلدى گازبەن قامتاماسىز ەتۋدى ۇسىندى. اتاپ ايتقاندا, ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ ماقساتىندا ۇلتتىق بانك ارنايى ۇيىم قۇرۋ ارقىلى جاڭا يپوتەكالىق «7-20-25 باعدارلاماسىن» دايىندايتىن بولادى. ونىڭ نەگىزگى شارتى نەسيە ءوسىمىنىڭ مولشەرلەمەسى جىلىنا 7 پروتسەنتتەن, باستاپقى جارناسى 20 پروتسەنتتەن اسپايتىن بولادى. نەسيە مەرزىمى – 25 جىلعا دەيىن.
ال جالاقىسى تومەن جۇمىسشىلاردىڭ سالىق جۇكتەمەسىن ازايتۋ ءۇشىن ۇلتتىق ەكونوميكا مينيسترلىگىنە 2019 جىلدىڭ 1 قاڭتارىنان باستاپ, اي سايىن ەڭ تومەنگى ەسەپتىك كورسەتكىشتىڭ 25 ەسەلەنگەن كولەمىنەن از جالاقى الاتىن جۇمىسكەرلەرگە سالىناتىن جەكە تابىس سالىعىنىڭ مولشەرىن 1 پروتسەنت ەتۋ تاپسىرىلدى. بۇل رەتتە, سالىقتى ازايتۋدان شىعاتىن قارجىنىڭ ولاردىڭ جالاقىسىن كوبەيتۋگە باعىتتالۋى ءتيىس.
جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ ماسەلەسى دە ەلباسى نازارىندا وسى ورايدا, ءبىلىم جانە عىلىمي مينيسترلىگىنە جاڭا ەكونوميكادا سۇرانىسقا يە مامانداردىڭ قاجەتتىلىگىن تالداۋ نەگىزىندە 2018-2021 وقۋ جىلدارىنا ارنالعان جوعارى جانە جوعارى بىلىمنەن كەيىنگى كادرلاردى دايارلاۋعا مەملەكەتتىك ءبىلىم بەرۋ تاپسىرىسىن بەكىتۋ تۋرالى قاۋلى جوباسىن دايىنداۋ جۇكتەلدى. سونىمەن قاتار جوعارى ءبىلىم سالاسىنا قوسىمشا 20 مىڭ گرانت ءبولىپ, 2020 جىلدىڭ سوڭىنا دەيىن ەڭ كەمى 75 مىڭ ورىندىق ستۋدەنتتەرگە جاتاقحانا سالۋ كوزدەلىپ وتىر.
سونداي-اق ەلباسى شاعىن جانە ورتا بيزنەس ءۇشىن نەسيە كولەمىن 20 ميلليارد تەڭگەگە ارتتىرۋ باستاماسىن كوتەردى.
«وسى رەتتە ەڭبەك جانە حالىقتى الەۋمەتتىك قورعاۋ, ۇلتتىق ەكونوميكا, اۋىل شارۋاشىلىعى, قارجى مينيسترلىكتەرىنە جانە «اتامەكەن» ۇلتتىق كاسىپكەرلەر پالاتاسىنا: ءبىرىنشى, اعىمداعى جىلعا رەسپۋبليكالىق بيۋدجەتتى ناقتىلاۋ كەزىندە قوسىمشا 20 ميلليارد تەڭگە ءبولۋدى ەسكەرۋدى; ەكىنشى, اسىرەسە, اۋىلدىق جەرلەردە شاعىن نەسيە بەرۋ ءۇشىن قاراجاتتى ودان ءارى ءبولۋ بويىنشا ۇسىنىستار ەنگىزۋ تاپسىرامىن», — دەدى ب. ساعىنتاەۆ.
پرەزيدەنتتىڭ بەسىنشى, «ەلدى گازبەن قامتاماسىز ەتۋدى جالعاستىرۋ» باستاماسى بويىنشا باقىتجان ساعىنتاەۆ ەنەرگەتيكا, قارجى, ۇلتتىق ەكونوميكا, ينۆەستيتسيالار جانە دامۋ مينيسترلىكتەرىنە, ءتيىستى ءوڭىر اكىمدىكتەرىنە «سامۇرىق قازىنا» قورىمەن جانە «بايتەرەك» حولدينگىمەن بىرلەسىپ ءبىر اپتا ىشىندە جۇمىس توبىن قۇرۋ مىندەتىن قويدى.
«قىزىلوردا –جەزقازعان – قاراعاندى – تەمىرتاۋ – استانا» باعىتى بويىنشا «سارىارقا» گاز قۇبىرىن قارجىلاندىرۋ ماسەلەسىن, ونىڭ ىشىندە حالىقارالىق قارجى ينستيتۋتتارىنان قاجەتتى قارجىنى تارتۋ ارقىلى پىسىقتاۋدى تاپسىرامىن», — دەدى ول.
حالىقتىڭ الەۋمەتتىك ومىرىنە تۇبەگەيلى وزگەرىستەر الىپ كەلەتىن بارلىق قادامدار بويىنشا بىرىڭعاي جول كارتاسى ازىرلەنەتىن بولادى.
«قاشان دا حالقىنىڭ جان-دۇنيەسىنە تەرەڭ بويلاپ, ەلىنىڭ جۇرەگىندەگى ارمانىن تامىرىن تاپقانداي ءدوپ باساتىن ەلباسىنىڭ باستامالارىن مۇلتىكسىز جۇزەگە اسىرىپ, تياناقتى ورىنداۋ – بارىمىزگە سىن! سوندىقتان, ءبىز بارلىق كۇش-جىگەرىمىزدى جۇمىلدىرىپ, ەلباسى جۇكتەگەن, ەل كۇتكەن ۇدەدەن شىعا بىلۋگە ءتيىسپىز», — دەدى ناقتىلادى قر پرەمەر-ءمينيسترى باقىتجان ساعىنتاەۆ.