قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ امەريكا قۇراما شتاتتارىنا رەسمي ساپارىن ءساتتى دەپ ايتۋعا بولادى. قازاقستان مەن امەريكا پرەزيدەنتتەرىنىڭ جەكە كەزدەسۋى ەكى ەل اراسىنداعى ءوزارا قارىم-قاتىناس تاريحىنىڭ جاڭا پاراعىن اشىپ, بىرقاتار ناقتى ناتيجەلەرگە قول جەتكىزىلدى.
بىرىنشىدەن, كەڭەيتىلگەن ستراتەگيالىق ارىپتەستىكتى ورناتۋ تۋرالى ورتاق ساياسي شەشىمدەر قابىلداندى. بۇل بيىلعى جىلى 26 جىل تولاتىن ەكى ەل اراسىنداعى جەمىستى ارىپتەستىك ودان ءارى تەرەڭدەي تۇسەتىنىن بىلدىرەدى.
استانا ءۇشىن ۆاشينگتون سىرتقى ساياساتتاعى نەگىزگى ارىپتەس ءارى ەكونوميكاداعى ماڭىزدى ينۆەستور بولىپ تابىلادى. ءوز كەزەگىندە, دونالد ترامپ اتاپ وتكەندەي, امەريكا قۋاتتى, دەربەس جانە تاۋەلسىز قازاقستاندى اقش-تىڭ ورتالىق ازياداعى سەنىمدى دوسى ءارى ستراتەگيالىق ارىپتەسى رەتىندە قاراستىرادى.
بۇل جەردە ەكونوميكالىق ماسەلەنى دە اتاپ ءوتۋ قاجەت. كەلىسسوز قورىتىندىسى بويىنشا وتكەن بريفينگ بارىسىندا مەملەكەت باسشىسى جالپى سوماسى 7,5 ملرد دوللاردان اساتىن 20 كەلىسىمشارتقا قول قويۋ كوزدەلگەنىن اتاپ ءوتتى. استانانىڭ اقش-پەن جوعارى تەحنولوگيالار مەن يننوۆاتسيالىق وندىرىستەر ترانسفەرتى بويىنشا بايلانىستى دامىتۋعا مۇقتاج ەكەنى جاسىرىن ەمەس. بۇل تۇرعىدان العاندا, جاڭا كەلىسىمدەر قازاقستانعا ەكونوميكاداعى «تسيفرلاندىرۋ» ماسەلەسىن جۇزەگە اسىرۋعا مۇمكىندىك بەرەدى دەپ سەنىممەن ايتۋعا بولادى.
ەكىنشىدەن, د.ترامپ پەن ن.نازارباەۆ اقش پەن قازاقستاننىڭ حالىقارالىق جانە ايماقتىق قاۋىپسىزدىكتى كۇشەيتۋ بويىنشا ورتاقتاسا ارەكەت ەتەتىنىن راستادى.
بۇل قازاقستان مەن اقش كۇشتەرىن اۋعانستان بويىنشا بىرىكتىرۋدى بىلدىرەدى. سونىمەن بىرگە قازاقستان تەرروريزمگە قارسى كۇرەستەگى اقش-تىڭ تاباندىلىعىن قولدايتىنىن مالىمدەدى. ەكى ەل باسشىلارى سولتۇستىك كورەياداعى يادرولىق ماسەلە بويىنشا ورتاقتاسا جۇمىس ىستەيتىندەرىن دە اتاپ ءوتتى.
ۇشىنشىدەن, قازاقستان مەن اقش «س5+1» ايماقتىق ۇنقاتىسۋ الاڭى اياسىنداعى ارىپتەستىكتى دامىتۋ تۋرالى كەلىسىمگە كەلدى. بۇل تۇرعىدان العاندا, اتالعان الاڭ جۇمىسىنان جاڭا باستامالار كۇتۋگە بولادى.
جاڭا اكىمشىلىك ءوز جۇمىسىن باستاپ, د.ترامپ «الدىمەن امەريكا» دەگەن ۇران تاستاعان سوڭ ورتالىق ازيادا ۆاشينگتوننىڭ ايماققا دەگەن قىزىعۋشىلىعىنىڭ تومەندەۋى تۋرالى كوپ ايتىلدى.
الايدا, ن.نازارباەۆتىڭ ساپارى مەن ونىڭ د. ترامپپەن كەزدەسۋى ايماقتىڭ ۆاشينگتون ءۇشىن جوعارى دەڭگەيدە تۇرعانىن كورۋگە بولادى.
جۇمابەك سارابەكوۆ,
قازاقستان رەسپۋبليكاسى تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ (اەسي) جەتەكشى
ساراپشىسى