كاسىپقوي بوكستان WBA, IBF, WBC جانە IBO تۇجىرىمدارى بويىنشا الەم چەمپيونى گەننادي گولوۆكين (37-0-1, 33 كو) «قاراعاندى وبلىسىنىڭ قۇرمەتتى ازاماتى» اتاعىنا يە بولدى.
ءتيىستى توسبەلگى مەن كۋالىكتى بوكسشىعا تاپسىرىپ تۇرىپ ءوڭىر باسشىسى ەرلان قوشانوۆ: «گەننادي قاراعاندى وبلىسىنىڭ عانا ەمەس, بۇكىل قازاقستاننىڭ ماقتانىشى. قازاقتىڭ ناعىز باتىرى!», دەدى.
بىلعارى قولعاپ شەبەرىنە بۇل اتاق وتكەن جىلدىڭ جەلتوقسان ايىندا وتكەن وبلىستىق ءماسليحاتتىڭ XIII سەسسياسىندا بەرىلگەن بولاتىن.
الىستاعى امەريكادان تۋعان جەرىنە ارنايى ات باسىن تىرەگەن گەننادي گولوۆكين وزىنە كورسەتىلگەن قۇرمەتكە شىن تەبىرەندى. سالتاناتتى شارادا بوكسشى جەرلەستەرىنە ريزاشىلىق سەزىمىن ءبىلدىرىپ, ولاردى الداعى ۋاقىتتا دا جەڭىستەرىمەن قۋانتا بەرەتىنىنە سەندىردى.
– قازاقستان رەسپۋبليكاسىنىڭ ازاماتى رەتىندە بۇل ماعان كورسەتىلگەن زور قۇرمەت. ەڭ الدىمەن مەملەكەتىمىزدىڭ باسشىسى نۇرسۇلتان ءابىش ۇلى نازارباەۆقا سپورتقا قامقورلىق تانىتىپ, ونى دامىتىپ جۇرگەنى ءۇشىن العىس ايتقىم كەلەدى. مەنى قاراعاندى وبلىسىنىڭ قۇرمەتتى ازاماتى رەتىندە تانىعان دەپۋتاتتارعا دا العىس سەزىمىن جەتكىزەمىن, – دەدى گەننادي گولوۆكين.
قاراعاندىنىڭ ماڭىنداعى ەلدى مەكەن مايقۇدىقتا تۋعان گەننادي گولوۆكين كاسىپقوي رينگتە عانا ەمەس, اۋەسقوي بوكستا دا تالاي بيىكتى باعىندىرعان ساڭلاق سپورتشى. ول ازيا ويىندارى (2002) مەن ازيا بىرىنشىلىگىنىڭ (2004) چەمپيونى, الەم چەمپيوناتىنىڭ (2003) جەڭىمپازى, افينى-2004 وليمپياداسىنىڭ كۇمىس جۇلدەگەرى.
قايرات ءابىلدا,
«ەگەمەن قازاقستان»
قاراعاندى وبلىسى