ماڭعىستاۋ وبلىسىنىڭ اكىمى ەرالى توعجانوۆ بەينەۋ اۋدانىنا قاراستى اۋىلداردى ارالادى. ايماق باسشىسى تۇرىش اۋىلىنداعى الەۋمەتتىك ماڭىزى بار بىرقاتار نىساننىڭ جۇمىسىمەن تانىسىپ, تۇرعىندارمەن كەزدەستى.
«تۇرىش مەكتەپ-بالاباقشا كەشەنى» 2013 جىلى قىركۇيەك ايىندا اشىلدى. 50 ورىندىق بالاباقشادا 6 پەداگوگ قىزمەت ەتەدى. ەكىنشى نىسان -«بەينەۋ ورتالىق اۋداندىق اۋرۋحاناسى» شجق مكك «تۇرىش» فەلدشەرلىك-اكۋشەرلىك پۋنكتى. ول 1965 جىلدان بەرى قىزمەت كورسەتەدى. 2005 جىلى ءساۋىر ايىندا جاڭا عيمارات اشىلىپ, پايدالانۋعا بەرىلدى. ماتەريالدىق-تەحنيكالىق بازاسىندا فەلدشەرلىك كابينەت, 2اكۋشەرلىك قاراۋ كابينەتى, 1 پور, شارۋاشىلىق جابدىقتار بولمەسى, ەگۋ كابينەتى بار.
تۇرىش اۋىلىنداعى «بەرەكەت» شارۋا قوجالىعى جىلىجاي سالۋ جۇمىستارىن قولعا الۋدا. وعان مەملەكەت تاراپىنان جىلىنا 2 رەت ءار گەكتارىنا 5 ملن تەڭگە سۋبسيديا بەرىلەدى. جىلىجايعا ساتىلىپ الىنعان تەحنيكا قۇنىنىڭ, سونداي-اق ونىڭ قۇرلىسىنا جۇمسالعان قاراجاتتىڭ 30 %-ى, سۋلاندىرۋ جۇيەسىنە كەتكەن شىعىننىڭ 50 %-ى, مالداردى اسىلداندىرۋ, بورداقىلاۋ جۇمىستارىنا كەتكەن شىعىننىڭ 50%-ى ۇكىمەت تاراپىنان قايتارىلادى. سونىمەن قاتار, اسىل تۇقىمدى قويلاردىڭ سەلەكتسيا جۇمىستارىنا ءار باسىنا 2 500 تەڭگە, اسىل تۇقىمدى انالىق قويلاردىڭ ءار باسىنا 8 مىڭ تەڭگە, اتالىقتىڭ ءار باسىنا 20 مىڭ تەڭگە, اسىل تۇقىمدى اتالىق جىلقىنىڭ جانە تۇيەنىڭ ءار باسىنا 100 مىڭ تەڭگە, انالىقتارىنا 40 مىڭ تەڭگەدەن بەرىلەدى.
تۇرىش اۋىلىنىڭ تۇرعىندارىمەن كەزدەسۋ بارىسىندا قۇدىق قازۋ جۇمىستارىنا قاتىستى بىرنەشە سۇراقتار كوتەرىلىپ, ارنايى تاپسىرمالار جۇكتەلدى.
-ەگەر تۇرعىندار ءوز تاراپىنان قۇدىق قازسا, مەملەكەت شىققان شىعىننىڭ 80 %-ىن قايتارىپ بەرەدى. مىسالى سىزدەر 100 مەتر قۇدىق قازساڭىز, ورتا ەسەپپەن 5 ملن. تەڭگە شىعىن كەتەدى. سونىڭ 4 ملن. تەڭگەسىن كەيىن قايتارىپ الساڭىز, ناتيجەسىندە ءسىز قۇدىقتى 1 ملن. تەڭگەگە قازاسىز. بىلتىر جۇزەگە اسىرىلعان 18 قۇدىقتىڭ 17-ءسىن تۇرعىندار ءوز كۇشتەرىمەن قازعان. بىزگە ەشقانداي ءوتىنىم كەلىپ تۇسپەدى. بۇگىنگى تاڭدا اۋىل شارۋاشىلىق ءبولىمىنىڭ باسشىسى حالىقتان وتىنىمدەر جيناۋدا, سول بويىنشا قۇدىق قازۋ جۇمىستارىنا سۋبسيديا بەرەمىز» دەدى بەينەۋ اۋدانىنىڭ اكىمى بەينەۋبەك ءابىلوۆ.
-شارۋاشىلىققا جاسالىپ وتىرعان مۇمكىندىكتەردى ءتيىمدى پايدالانا ءبىلۋىمىز كەرەك. بۇل – مال شارۋاشىلىعى مەن ەگىن شارۋاشىلىعىن دامىتۋ ءۇشىن ۇكىمەت تاراپىنان كورسەتىلىپ وتىرعان كومەك. سونى ءاربىر قازاقستاندىق جۇزەگە اسىرسا, اۋىل شارۋاشىلىعىنداعى تۇيتكىلدى ماسەلەنىڭ شەشىمى تابىلار ەدى. حالىقتى اقپاراتتاندىرىپ, تۇسىندىرمە جۇمىستارىن جۇرگىزۋ كەرەك. جاستاردى اۋىلشارۋاشىلىقتىڭ قىر-سىرىنا ۇيرەتەتىن وقۋ-ادىستەمەلىك كۋرستاردان وتكىزۋ كەرەك. سونداي-اق, ءاربىر قازىلعان قۇدىقتا سۋ بولا بەرمەيدى. وسى ماسەلەنىڭ توڭىرەگىندە كوپتەگەن سۇراق تۋىندادى. قۇدىق قازار الدىندا ول جەرگە ارنايى مامانداردى تارتۋ كەرەك. ارنايى مەكەمەلەر وسى جۇمىسقا تىكەلەي اتسالىسىپ, ءوز كۇشىمەن قۇدىق قازام دەگەن ازاماتتارعا قولداۋ كورسەتسىن» دەدى وبلىس اكىمى ەرالى توعجانوۆ.
تۇرعىندار تاراپىنان كوتەرىلگەن تاعى ءبىر ماسەلە – اۋىلعا تەمىرجول وتكەلىن سالۋ. وبلىس اكىمى تەمىر جول وتكەلىنىڭ جوبالىق سمەتالىق قۇجاتتارىن اعىمداعى جىلدىڭ ناۋرىز ايىنا دەيىن اياقتاپ, «قازاقستان تەمىر جولى» ۇلتتىق كومپانياسىنا ۇسىنۋدى تاپسىردى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى