The Mice Times of Asia پورتالى 16 قاڭتار كۇنى قازاقستان پرەزيدەنتى نۇرسۇلتان نازارباەۆتىڭ دونالد ترامپپەن كەزدەسەتىنى تۋرالى ايتىپ, قازاقستان تۋرالى كولەمدى ماقالا جاريالادى. نازارلارىڭىزعا ماقالانىڭ ىقشامدالعان مازمۇنىن ۇسىنامىز.
2017 جىلى قازاقستان 86 ملن توننا كومىرسۋتەك ءوندىرىپ, مەملەكەت تاريحىنداعى رەكوردتىق كورسەتكىشكە قول جەتكىزدى.
2014-2016 جىلدار ارالىعىندا اقتوبە, قىزىلوردا وبلىستارىنداعى مۇناي كەن ورىندارى سارقىلا باستادى دا, قازاقستاندا مۇناي ءوندىرىسى تومەندەدى. دەگەنمەن قاشاعان كەن ورنىنىڭ قالپىنا كەلتىرىلۋى جاعدايدى وزگەرتۋگە مۇمكىندىك بەردى.
قازاقستان وپەك+ كەلىسىمىنە قاتىسادى. وعان سايكەس مۇناي ەكسپورتتاۋشى مەملەكەتتەر اتالعان شيكىزات ءوندىرىسىن قىسقارتۋى كەرەك بولاتىن. قازاقستاننىڭ ەنەرگەتيكا مينيسترلىگى مەملەكەت بۇل مىندەتتەردى تولىعىمەن ورىندايتىنىن ايتقان ەدى.
Bloomberg بىلتىر قازاقستان وپەك+ كەلىسىمى بويىنشا ءوز مىندەتتەرىن تولىق ورىندامادى دەپ جازدى. ايماقتىق پروبلەمالار ينستيتۋتىنىڭ باس ديرەكتورى دميتري جۋراۆلەۆ قازاقستاننىڭ ساياسي ءرولىنىڭ ماڭىزدى ەكەنىن ايتىپ, بۇل پىكىر الاڭداۋشىلىق تۋعىزاتىن دۇنيە ەمەس ەكەنىن ايتتى. "قازاقستان ءۇشىن مۇناي نەگىزگى شيكىزات سانالادى دەپ ويلاساق, مۇلدەم قاتەلەسەمىز. قازاقستان ۋران وندىرۋدەن كوش باستاپ تۇر. سونىمەن قاتار قازاقستاننىڭ مۇناي ەكسپورتى الەمدىك كورسەتكىشتىڭ از عانا بولىگىن قامتيدى", دەدى ول. ساراپشىنىڭ ايتۋىنشا, ءىرى مەملەكەتتەردىڭ كوبى قازاقستانمەن جاقسى قارىم-قاتىناستا بولعىسى كەلەدى. "بۇل قازاقستاننىڭ بۇۇ قك توراعاسى بولىپ سايلانعانىنا بايلانىستى دەپ ويلاساڭىز, قاتەلەسەسىز. سەبەبى قازاقستان رەسەي, قىتايمەن قارىم-قاتىناسىنان بولەك باتىس ەلدەرىمەن دە ەكونوميكالىق بايلانىستاردى ارتتىرىپ كەلەدى. اسىرەسە, ەۋروپا ەلدەرىمەن ەكونوميكالىق سەرىكتەستىك جاقسى دەڭگەيگە جەتكەن. مىسالى, گەرمانيا قازاقستاننىڭ تاسىمال جۇيەسىنە كوپ ينۆەستيتسيا سالادى", دەيدى ينستيتۋت ديرەكتورى.