ۇلتتىق مۋزەيدە بەلگىلى جازۋشى, حالىقارالىق «الاش» ادەبي سىيلىعىنىڭ لاۋرەاتى, «پاراسات» وردەنىنىڭ يەگەرى قۋانىش جيەنبايدىڭ «جەر ۇستىندە دە جۇماق بار» اتتى كىتابىنىڭ تۇساۋكەسەرى ءوتتى.
ءار قالامگەردىڭ جان دۇنيەسىنە جاقىن ءوز تاقىرىبى, ءوزىنىڭ ايقىن قولتاڭباسى, ادام پسيحولوگياسىنداعى استاڭ-كەستەڭ ارپالىستى سەزىمدەردى مايدان قىل سۋىرعانداي اسا دالدىكپەن سۋرەتتەيتىن شەبەرلىگى بولادى دەسەك, قۋانىش جيەنباي وسى پىكىرىمىزگە تولىقتاي دالەل بولا الاتىن پروزاشى. بۇگىنگە دەيىن وننان استام كىتاپتارى جارىق كورىپ, وقىرمان قاۋىمنان ءوز باعاسىن الىپ ۇلگەرگەن قالامگەر.
«جەر ۇستىندە دە جۇماق بار» رومانىندا بايقوڭىر عارىش ايلاعى مەن قورقىت بابا كەسەنەسى اراسىنداعى «قۇدايدىڭ نازارى تۇسكەن» قاسيەتتى توپىراقتىڭ بۇگىنى مەن كەلەشەگى, ونىڭ اسپان دۇنيەسىمەن بايلانىستى, بولاشاقتا الەمدىك دەڭگەيدە تىڭعىلىقتى زەرتتەۋدى قاجەت ەتەتىن كيەلى مەكەن بولاتىندىعى جان-جاقتى سۋرەتتەلگەن. كەيىپكەرلەرى دارا. شىعارما كوتەرگەن ماسەلەنىڭ اۋقىمدىلىعىمەن دە, تىلسىم-قۇپيالىعىمەن دە قىزىقتى.
ال, جيناققا ەنگەن اڭگىمەلەرىنىڭ دەنى سوڭعى كەزدەرى جازىلعان. جازۋشى زامانداستارىنىڭ الۋان ءتۇرلى مىنەز قايشىلىقتارىن كوركەم تىلمەن اشىپ بەرگەن. جانە سول زامانداستارىنىڭ بەينەلەرى ارقىلى جالپى قوعام پسيحولوگياسى مەن زامان بەينەسىن شەبەر بەينەلەيدى.
«جەر ۇستىندە دە جۇماق بار» بايقوڭىر ءوڭىرى تۋرالى, سول ايماقتاعى ادامداردىڭ تاعدىرى تۋرالى شىعارما. قالامگەر بۇل رومانىندا ءوزى ءومىر سۇرەتىن ورتانى جاقسى سۋرەتتەپ قانا قويماي, ماتەريالدى تولىق يگەرگەن دەپ ايتار ەدىك. تورەتام, بايقوڭىر ءوڭىرىنىڭ ەكولوگيالىق جاعدايى مەن ادامداردىڭ رۋحاني ەكولوگيالىق ماسەلەسىن قاتار الىپ سۋرەتتەيدى. ء«ان سالۋعا ءالى ەرتە» دەگەن بۇرىن جازعان رومانىندا دا ارال, قازالى جەرىنىڭ قاسىرەتى مەن قاسيەتى تۋرالى وسىلاي شەبەر سۋرەتتەگەن بولاتىن. شىعارما شىن مانىندە ءوز قىزمەتىن تولىق اتقاراتىن دارەجەگە جەتكەن», دەدى جازۋشى قاجىعالي مۇقامبەتقالي.
تۇساۋكەسەر ءراسىمىن ساتيريك كوپەن امىربەك جۇرگىزدى. تۇساۋكەسەرگە مەملەكەتتىك سىيلىقتىڭ لاۋرەاتتارى, جازۋشىلار انەس ساراي مەن قاجىعالي مۇقامبەتقالي سونداي-اق قالامداس-ارىپتەستەرى ەرجۇمان سمايىل, قايسار ءالىم, سۇلەيمەن مامەت, جارىلقاپ بەيسەنباي ۇلى, باۋىرجان وماروۆ, سىنشى امانگەلدى كەڭشىلىك ۇلى, ۇلتتىق مۋزەي ديرەكتورىنىڭ ورىنباسارى جاكەن تايماعامبەتوۆ جانە وقىرمان قاۋىم قاتىستى.
باعاشار تۇرسىنباي ۇلى, «ەگەمەن قازاقستان»