وتكەن جىلعى فۋتول ماۋسىمىندا «اقتوبە» سپورت كلۋبى ايتا قالارلىقتاي ويىن ورنەگىن كورسەتە الماعانى جانكۇيەرلەرگە جاقسى ءمالىم. وكىنىشكە وراي باس جاتتىقتىرۋشى بولىپ ۆلاديمير مۋحانوۆتىڭ كەلۋىنە بايلانىستى ارتىلعان سەنىم مەن ءۇمىت تە اقتالا قويماعان سەكىلدى.
ەندى مىنە وسى جىلدىڭ باسىندا «اقتوبە» فۋتبول كلۋبىنىڭ باس ديرەكتورى بولىپ ەسىمى ەلگە تانىمال, قازاقستان ۇلتتىق قۇراماسى ساپىندا ءبىراز جىلدار تەر توككەن كانىگى فۋتبولشى سامات سماقوۆ تاعايىندالدى.
ول وتكەن ماۋسىمدا كوپتەگەن جاعدايلاردا «شاڭ قاۋىپ» قالا بەرگەن كوماندانى العا شىعارا الا ما؟ الدىمەن ايتارىمىز, س.سماقوۆ اقتوبەلىكتەر ءۇشىن «اياعى اسپاننان سالبىراپ تۇسە قالعان» بەيتانىس ادام ەمەس, ويتكەنى 39 جاستاعى فۋتبول مەنەدجەرىنىڭ بۇعان دەيىنگى جارقىن, جەمىستى دە جەڭىستى جىلدارى وسىندا وتكەنى بەلگىلى. وسى كەزدە اقتوبە فۋتبولىندا ونىڭ ايشىقتى ءىزى مەن ىلكىمدى ءىسى قالعانىنا دا ەشكىم تالاس تۋعىزا المايدى. بەينەلى تۇردە ايتقاندا سوڭعى كەزدە اقتوبە فۋتبول كلۋبى بەينە ءبىر داعدارىستى كۇيگە تاپ بولدى دەسەك, س.سماقوۆ پەن باس جاتتىقتىرۋشى ۆ.مۋحانوۆ بۇدان شىعۋدىڭ ءىس-جوسپارىن جاساپ, ونى ويداعىداي ورىنداپ شىعا السا, جوعارىدا قويىلعان ساۋالعا وڭ جاۋاپ تابىلارى انىق.
بۇل تۇرعىدا جاڭا قىزمەتىنە كىرىسكەن باس ديرەكتور گازەت تىلشىسىنە كلۋبتىڭ قىزمەتىن جاڭا ساپالىق دەڭگەيگە, ءتىپتى ەلىمىزدەگى كوش باستاۋشى فۋتبول كوماندالارىنىڭ قاتارىنا دەيىن كوتەرۋ ءۇشىن بارلىق مۇمكىندىكتى جۇمىلدىرۋعا ءازىر ەكەنىن مالىمدەدى. بۇدان ءارى ول كوماندا قۇرامىن باس جاتتىقتىرۋشى ۆلاديمير مۋحانوۆپەن ءوزارا كەڭەسە وتىرىپ, جاساقتايتىنىن جەتكىزدى. ال جاتتىعۋ ۇدەرىستەرىنە كەلگەندە كلۋب باسشىسى باس جاتتىقتىرۋشىنىڭ ءتول ىسىنە قول سۇقپاق ەمەس. ءبىر ايقىن ماسەلە سامات سماقوۆ «اقتوبە» فۋتبول كلۋبىنىڭ باس ديرەكتورى رەتىندە ونىڭ قۇرامىنا جەرگىلىكتى سپورتشىلار مەن ءوز تۇلەكتەرىن قابىلداۋعا باسىمدىق بەرمەك. بۇل ءۇشىن ول اقتوبە قالاسى مەن وبلىس اۋداندارىنان سپورتتاعى دارىندى جاستاردى ىزدەستىرۋدى ويلاستىرىپ وتىر.
تەمىر قۇسايىن, «ەگەمەن قازاقستان»