سوڭعى كەزدە كىتاپ وقيتىندار ازايىپ كەتتى دەگەن پىكىر ءجيى ايتىلادى. وقىرمان ازايعان جوق. سەبەبى بۇگىنگى وقىرمان ساندىق كورسەتكىشتەن گورى, ناقتى ساپالىق دەڭگەيگە ءوتىپ جاتىر. ونى كىتاپحانالار مەن كىتاپ دۇكەندەرىنە دەگەن سۇرانىستىڭ ارتۋىنان بايقاۋعا بولادى.
قازىر استانا قالاسىندا 18 مەملەكەتتىك كىتاپحانا بار ەكەن. ونىڭ 7-ەۋى بالالار مەن جاسوسپىرىمدەرگە, 1-ەۋى زاعيپ جاندارعا, قالعانى كوپشىلىك وقىرمانعا ارنالعان. كىتاپحانا 10:00-دەن 19:00-گە دەيىن جۇمىس ىستەيدى. ال قالاداعى ەڭ ءىرى كىتاپ دۇكەندەرىنىڭ ءبىرى – «مەلومان». بۇل ساۋدا جەلىسىندەگى كىتاپ دۇكەندەرى قالانىڭ ءۇش بىردەي ساۋدا جانە ويىن-ساۋىق ورتالىعىنان اشىلعان. ونىڭ وقىرماندارمەن جۇمىس ۋاقىتى 10:00-دەن 22:00-گە دەيىنگى ارالىقتى قامتيدى. بۇدان تىس كىتاپ دۇكەنىندە وقىرمان ءۇشىن قالاعان كىتاپتى الاڭسىز وقۋعا بارلىق جاعداي جاسالعان. سوندىقتان بولار كىتاپحانالار مەن باسقا كىتاپ دۇكەندەرىنەن گورى كەشكى ۋاقىتتا «مەلومانعا» كەلۋشىلەر سانى وتە كوپ.
ەلوردادا «يگىلىك» قوعامدىق قورىنىڭ قولداۋىمەن اشىلىپ ساعات 22:00-گە دەيىن جۇمىس ىستەيتىن «Books and coffee» اتتى كىتاپحانا مەن كوفەحانا قىزمەتتەرىن ۇيلەستىرگەن وزگەشەلەۋ ورتالىق بار. ونى 2009 جىلى ا.ل.كيم ەسىمدى كورەي ۇلتىنىڭ ازاماتى اشقان. كىتاپحاناعا 10 مىڭنان اسا كىتاپ قويىلعان. ونىڭ 95 پايىزى – اعىلشىن تىلىندە. كىتاپحاناعا جازىلۋ قۇنى – جىلىنا 4 مىڭ تەڭگە. سونداي-اق مۇندا اعىلشىن ءتىلىن ۇيرەتۋ مەن دامىتۋعا باعىتتالعان كلۋب بار. «Books and coffee» كىتاپحاناسىنا كەلۋشىلەردىڭ كوبى ستۋدەنتتەر مەن اعىلشىن ءتىلىن ۇيرەنۋشى ماگيسترانتتار. سونداعى تۇراقتى وقىرمانداردىڭ ءبىرى ايىم مۇقاش قالادا تۇنگى ۋاقىتتا جۇمىس ىستەيتىن كىتاپحانا بولماعاندىقتان جانە ءوزىنىڭ اعىلشىن ءتىلىن يگەرۋىن دامىتۋ ماقساتىندا جۇمىستان كەيىن اتالعان ورتالىققا ءجيى كەلەتىنىن ايتادى. بۇل مەملەكەتتىك كىتاپحانالاردىڭ وقىرمان سۇرانىسىن تولىق قاناعاتتاندىرىپ وتىرماعانىن كورسەتەدى. ارينە, بەلگىلى جۇمىس كەستەسىنە سايكەس مەمەلەكەتتىك كىتاپحانالاردىڭ باسىم بولىگى تاڭعى 10:00-دەن كەشكى 19:00 دەيىن عانا اشىق تۇرادى. ال قالا تۇرعىندارىنىڭ بەلسەندى بولىگى كۇندىزگى ۋاقىتتا جۇمىستا بولاتىنى بەلگىلى. ءتىپتى قالاداعى 40-قا جۋىق جوعارى وقۋ ورىندارىنىڭ وزىندە ستۋدەنتتەر كۇندىزگى بولىمدە وقيدى. دەمەك, كىتاپحانانىڭ جۇمىس ءتارتىبىن ۇزارتۋ جانە بىرتىندەپ تاۋلىكتىك رەجىمگە كوشۋ وقىرمان ءۇشىن اۋاداي قاجەت. بۇل تۋرالى استانا قالاسىنداعى «قازبىلىم» ورتالىعىنىڭ ديرەكتورى اياتجان احمەتجان بىلاي دەيدى: «قالا – كۇيبەڭ تىرشىلىكتىڭ ورتاسى. سوندىقتان ءبىر ۋاق ارقانى كەڭگە سالىپ, كىتاپ وقيتىن رۋحاني ورتانىڭ بولعانى وتە ماڭىزدى. سول ءۇشىن تاۋلىكتىك كىتاپحانانىڭ بولۋى قاجەت دەپ ويلايمىن. ويتكەنى كىتاپحانا – كەمەل رۋحانياتتىڭ باستاۋى. ال بىزدەگى كىتاپحانالار كىتاپ وقيتىن ورتا ەمەس, مۇراجايعا اينالىپ بارادى».
وركەنيەتتى ەلدەردە بۇل جۇيە جولعا قويىلعان. ماسەلەن, ەۋروپا ەلدەرىندە ستۋدەنتتەرگە ارنالعان 24 ساعاتتىق كىتاپحانالار وتە كوپ. اقش-تىڭ ماسساچۋسەتس شتاتىنداعى ماكانۋستەل ۋنيۆەرسيتەتىنىڭ وزىندە تۇنگى ۋاقىتتا ءۇش بىردەي, اتاپ ايتقاندا, Barker, Dewey جانە Hayden كىتاپحانالارى قىزمەت كورسەتەدى. وندا وقىرمان ءۇشىن بارلىق جاعداي جاسالعان. تۇنگى كىتاپحانادا سكانەر, كسەروكس, Athena كومپيۋتەرلەرى جانە Athen پرينتەرى, ۆاننا بولمەلەرى مەن ىستىق جانە سۋىق سۋ ديسپەنسەرى, ساۋدا اۆتوماتتارىندا تۇنگى تاعامدار, بۇدان تىس وقىرماندار دەمالۋعا ارنالعان ارنايى بولمەلەر دە بار.
سوندىقتان وتاندىق كىتاپحانالار جۇيەسىن وقىرماندارعا قولايلى ەتىپ قايتا قۇرۋ ماسەلەسى وتە وزەكتى. بۇل «بۇگىنگى بۋىن كىتاپ وقىمايدى» دەگەن جالاڭ ايىپتاۋعا قاراعاندا, ناقتى ءىس-ارەكەتتىڭ كورىنىسى بولار ەدى.
ايجامال كوپەەۆا