اقش يران بيلىگىنە بەيبىت كەلىسسوزدەردى قايتا باستاۋ ءۇشىن ورىنداۋى ءتيىس بەس تالاپتان تۇراتىن ءتىزىم ۇسىندى. الايدا قوس تاراپ ۇسىنعان تالاپتار ءبىر-بىرىنە قاراما-قايشى كەلىپ وتىر, دەپ حابارلايدى Egemen.kz.
«فارس» اگەنتتىگىنىڭ مالىمەتىنشە, ۆاشينگتون يراننان اقش-قا قاتىستى وتەماقى تالاپتارىنان تولىق باس تارتۋدى سۇراعان. سونىمەن قاتار امەريكالىق تاراپ شامامەن 400 كەلى بايىتىلعان ۋراندى اقش-قا بەرۋدى جانە ەلدەگى يادرولىق نىسانداردىڭ تەك ءبىر كەشەنىنىڭ عانا جۇمىس ىستەۋىن تالاپ ەتىپ وتىر.
بۇدان بولەك, اقش يران اكتيۆتەرىنىڭ ءبىر بولىگىن بولسا دا بۇعاتتان شىعارۋعا قارسى ەكەنىن بىلدىرگەن. ۆاشينگتون اسكەري ارەكەتتەردى توقتاتۋدى كەلىسسوزدەردىڭ ءارى قارايعى بارىسىمەن بايلانىستىرعان.
بۇعان دەيىن يران دا كەلىسسوزدەرگە قايتا ورالۋ ءۇشىن ءوز شارتتارىن جاريالاعان بولاتىن. تەگەران بارلىق باعىتتاعى سوعىستى توقتاتۋدى, سانكتسيالاردى الىپ تاستاۋدى, اكتيۆتەردى بۇعاتتان شىعارۋدى, كەلتىرىلگەن شىعىن ءۇشىن وتەماقى تولەۋدى جانە ورمۇز بۇعازىنداعى يران ۇستەمدىگىن مويىنداۋدى تالاپ ەتكەن.
يران بيلىگى اتالعان تالاپتار ءىس جۇزىندە ورىندالمايىنشا جاڭا كەلىسسوزدەردىڭ باستالمايتىنىن مالىمدەدى.
ال دونالد ترامپ يراننىڭ ۇسىنىستارىن «قابىلداۋعا كەلمەيتىن تالاپتار» دەپ اتادى.
ءساۋىر ايىندا قول قويىلعان ۋاقىتشا بىتىمگە قاراماستان, مامىردا تاراپتار قايتادان ءوزارا سوققى جاساپ, كەلىسسوزدەردىڭ قايتا جاندانۋ مۇمكىندىگىن شيەلەنىستىرىپ جىبەرگەن ەدى.
ال جۋىردا تەگەران ورمۇز بۇعازى ارقىلى قىتاي كەمەلەرىنىڭ وتۋىنە رۇقسات بەرگەن بولاتىن.