اتىراۋ وبلىسىنىڭ جانگەلدين اۋىلىندا بولعان ءبىر وتباسىنىڭ ءتورت مۇشەسىنىڭ قازاسىنا قاتىستى رەزونانستى قىلمىستىق ءىس بويىنشا سوت وتىرىسى باستالدى. ءىس وبلىستىق مامانداندىرىلعان اۋدانارالىق قىلمىستىق سوتتىڭ قاراۋىنا بەرىلگەن, دەپ حابارلايدى Egemen.kz.
تەرگەۋ دەرەكتەرىنە سايكەس, ايىپتالۋشى سۇلتان سارسەماليەۆ ءوز ايەلىنىڭ تۋىستارىن – قايىن اتاسىن, قايىن ەنەسىن, سونداي-اق ايەلىنىڭ اعاسى مەن اپكەسىن ءولتىردى دەگەن كۇدىككە ىلىنگەن. العاشقى اشىق سوت وتىرىسى بۇگىن ساعات 11:00-گە بەلگىلەنىپ, ءىستى سۋديا زارەما حاميدۋللينا قارايدى.
قىلمىس قوعامدا ۇلكەن رەزونانس تۋدىرعان بولاتىن. بۇعان دەيىن, 2025 جىلدىڭ جەلتوقسانىندا مارقۇمداردىڭ تۋىسى پوليتسياعا جۇگىنىپ, قىزىلقوعا اۋدانىنداعى جانگەلدين اۋىلىندا تۇراتىن اعاسى مەن ونىڭ وتباسى حابارسىز كەتكەنىن ايتقان.
تەرگەۋ بارىسىندا ولاردىڭ قاراشا ايىندا ۇيدەن شىعىپ كەتكەننەن كەيىن قايتا ورالماعانى انىقتالدى. كەيىن ولاردىڭ تەلەفون سيگنالدارى قازاقستاننىڭ ءارتۇرلى وڭىرلەرىنەن, سوڭعى رەت شىمكەنت قالاسىنان تىركەلگەن.
2026 جىلدىڭ قاڭتارىندا ەرلى-زايىپتىلاردىڭ مايىتتەرى تابىلسا, كەيىنىرەك تاعى ەكى ادامنىڭ ءمايىتى اتىراۋ ماڭىنداعى گەولوگ ىقشاماۋدانىنان انىقتالعان.
تەرگەۋ مالىمەتىنشە, كۇدىكتى وتباسى مۇشەلەرىمەن بىرگە ءۇي جالداپ تۇرعان. وقيعاعا قاتىستى كۇدىكتى حالىقارالىق ىزدەۋ جاريالانىپ, ول كەيىن يندونەزيادا ۇستالعان.
پوليتسيا دەرەگىنە سايكەس, ءىس «ادام ءولتىرۋ» جانە «ۇرلىق» باپتارى بويىنشا تەرگەلىپ جاتىر. تەرگەۋ اياقتالىپ, ءىس سوتقا جولدانعان. كۇدىكتى ءوز كىناسىن مويىنداعان جانە قازىرگى ۋاقىتتا تەرگەۋ يزولياتورىندا وتىر.