قازاقستاندا بۇگىندە 286 مۋزەي جۇمىس ىستەيدى. ولاردىڭ قورىندا 4,5 ميلليوننان استام بىرەگەي جادىگەر ساقتالعان. جىل سايىن ەل مۋزەيلەرىنە 6,5 ميلليوننان اسا ادام كەلەدى. بۇل تۇرعىنداردىڭ تاريحقا, مادەنيەتكە جانە ۇلتتىق مۇراعا قىزىعۋشىلىعى ارتىپ كەلە جاتقانىن كورسەتەدى, دەپ جازادى Egemen.kz.
مادەنيەت جانە اقپارات مينيسترلىگىنىڭ مالىمەتىنشە, مۋزەيلەر ەندى تەك تاريحي مۇرانى ساقتايتىن ورىن عانا ەمەس, اعارتۋشىلىق, تاربيە جانە ۇلتتىق بىرەگەيلىكتى نىعايتاتىن زاماناۋي مادەني ورتالىققا اينالىپ كەلەدى.
سونىمەن قاتار سالادا اۋقىمدى تسيفرلاندىرۋ ۇدەرىسى ءجۇرىپ جاتىر. ەلدەگى مۋزەيلەر مەن قورىق-مۋزەيلەردە زاماناۋي ەلەكتروندى كىرۋ جۇيەلەرى ەنگىزىلىپ, بىرىڭعاي E-museum پلاتفورماسى ءىس جۇزىندە بۇكىل قازاقستاندى قامتىعان.
قازىر بۇل جۇيەگە ەلىمىزدىڭ 20 وڭىرىندەگى 284 مۋزەي قوسىلعان. تسيفرلىق كاتالوگقا مۋزەي قورىنىڭ 66 مىڭنان استام جادىگەرى ەنگىزىلىپ, 750 ۇشولشەمدى مودەل جاسالعان. سونداي-اق كەلۋشىلەرگە 15 ۆيرتۋالدى تۋر قولجەتىمدى. بۇل جوبالار تاريحي مۇرانى جاڭا تەحنولوگيالىق فورماتتا تانىستىرۋعا مۇمكىندىك بەرەدى.
پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ ايتۋىنشا, مۋزەيلەر بىرتىندەپ زاماناۋي عىلىمي-زەرتتەۋ جانە ءبىلىم بەرۋ ورتالىقتارىنا اينالىپ جاتىر.
وتكەن جىلى عانا رەسپۋبليكالىق مۋزەيلەردە 1,5 مىڭنان استام ءىس-شارا ۇيىمداستىرىلعان. ونىڭ ىشىندە 187 كورمەنى شامامەن 800 مىڭ ادام تاماشالاعان.
سوڭعى جىلدارداعى ماڭىزدى جوبالاردىڭ ءبىرى قازاقستان رەسپۋبليكاسىنىڭ ۇلتتىق مۋزەيىندە «التىن وردا» زالىنىڭ اشىلۋى جانە «تاۋەلسىز قازاقستان» زالى ەكسپوزيتسياسىنىڭ جاڭارتىلۋى بولدى. مينيسترلىك مۇنداي باستامالار ەل تاريحىنىڭ ماڭىزدى كەزەڭدەرىن جاڭا قىرىنان تانىتۋعا مۇمكىندىك بەرەدى دەپ ەسەپتەيدى.
بۇگىن, 18 مامىر كۇنى, ەلىمىزدىڭ بارلىق وڭىرىندە ءداستۇرلى «مۋزەي ءتۇنى» اكتسياسى وتەدى. بۇل كەشتە مۋزەيلەر مەن قورىق-مۋزەيلەر كەلۋشىلەرگە ەرەكشە فورماتتاعى باعدارلامالار ۇسىنادى.
مۋزەي ءتۇنى – ۇلت تاريحىن ۇرپاق جۇرەگىنە جاقىنداتاتىن جوبا
قوناقتاردى كەشكى ەكسكۋرسيالار, ينتەراكتيۆتى كورمەلەر, شىعارماشىلىق كەزدەسۋلەر, تاريحي كۆەستەر, تەاترلاندىرىلعان قويىلىمدار, مۋلتيمەديالىق جوبالار, جارىق جانە دىبىس شوۋلارى, سونداي-اق جاساندى ينتەللەكت ەلەمەنتتەرى قولدانىلعان باعدارلامالار كۇتەدى.
بۇدان بولەك, كەلۋشىلەر قولونەرشىلەردىڭ تۋىندىلارىمەن تانىسىپ, ۇلتتىق ويىندارعا قاتىسىپ, ءداستۇرلى تاعامداردان ءدام تاتا الادى. ەتنواۋىلداردا رۋحاني كەزدەسۋلەر مەن كيىز ۇيدەگى تۇنگى شاي داستارحانى ۇيىمداستىرىلادى. ۇيىمداستىرۋشىلاردىڭ ايتۋىنشا, بيىلعى «مۋزەي ءتۇنى» دە تاريح پەن مادەنيەتكە قىزىعاتىن مىڭداعان ادامدى بىرىكتىرمەك.