قازاقستاندا 14-17 جاس ارالىعىنداعى قىزدارعا ادام پاپيللوماسى ۆيرۋسىنا (اپۆ) قارسى قوسىمشا ۆاكتسينا ەگۋ باستالادى. بۇل تۋرالى باس مەملەكەتتىك سانيتاريالىق دارىگەردىڭ بيىلعى 13 مامىرداعى قاۋلىسىندا ايتىلعان, دەپ حابارلايدى Egemen.kz.
قۇجاتقا سايكەس, ۆاكتسينالاۋ 14 جاستان 17 جاس 11 اي 29 كۇنگە دەيىنگى قىزدارعا ەرىكتى تۇردە جۇرگىزىلەدى. ەكپە اتا-اناسىنىڭ نەمەسە زاڭدى وكىلىنىڭ اقپاراتتاندىرىلعان كەلىسىمىنەن كەيىن سالىنادى.
قوسىمشا يممۋنداۋ 4 ۆالەنتتى «گارداسيل» ۆاكتسيناسىمەن جۇرگىزىلەدى. ۆاكتسينا اپۆ-نىڭ 6, 11, 16 جانە 18 تيپتەرىنەن قورعايدى. ەكپە ءۇش كەزەڭ بويىنشا سالىنادى:
ءبىرىنشى دوزا – كەز كەلگەن كۇنى; ەكىنشى دوزا – العاشقى ەگۋدەن كەيىن 2 اي وتكەن سوڭ; ءۇشىنشى دوزا – العاشقى ەگۋدەن كەيىن 6 اي وتكەن سوڭ.ۆاكتسينالاۋ ءبىلىم بەرۋ ۇيىمدارىنىڭ مەديتسينالىق كابينەتتەرىندە جانە ەمحانالارداعى ەگۋ بولمەلەرىندە وتكىزىلەدى.
پاپيللوما ۆيرۋسىنا قارسى ۆاكتسينا قىزدارعا دا, ەر بالالارعا دا قاجەت
قاۋلىدا يممۋنداۋ كەزىندە ساقتالۋعا ءتيىس تالاپتار دا كورسەتىلگەن. اتاپ ايتقاندا, ەگۋ بولمەلەرىندە فيزيكالىق اراقاشىقتىق ساقتالىپ, ءبىر مەزەتتە ءۇش قىزدان ارتىق شاقىرىلمايدى. ءبىر ەگۋ بريگاداسىنا كۇنىنە 40 بالادان ارتىق ۆاكتسينا سالماۋ ۇسىنىلعان.
سونداي-اق ەكپە العاندار ۆاكتسينادان كەيىن 30 مينۋت دارىگەر باقىلاۋىندا بولادى. مەكتەپ پسيحولوگتارى مەن الەۋمەتتىك پەداگوگتەر ءتۇسىندىرۋ جۇمىسىنا تارتىلىپ, بالالاردىڭ پسيحوەموتسيالىق كۇيىنە نازار اۋدارىلادى.
مەديتسينا قىزمەتكەرلەرى ءاربىر اتا-انا مەن جاسوسپىرىمگە ۆاكتسينا تۋرالى تولىق اقپارات بەرۋگە مىندەتتى. ولارعا ەكپەنىڭ اسەرى, ىقتيمال جاناما بەلگىلەرى جانە ۆاكتسينادان باس تارتۋدىڭ سالدارى تۇسىندىرىلەدى.
قۇجاتتا ۆاكتسينادان كەيىنگى ىقتيمال رەاكتسيالار دا كورسەتىلگەن. العاشقى ءۇش كۇندە دەنە قىزۋى كوتەرىلۋى, السىزدىك, باس اۋرۋى, قالتىراۋ, ەكپە سالىنعان جەردىڭ قىزارۋى مەن اۋىرسىنۋى بايقالۋى مۇمكىن. سيرەك جاعدايدا اللەرگيالىق رەاكتسيالار مەن جۇيكە جۇيەسىنە قاتىستى بەلگىلەر تىركەلۋى ىقتيمال.
دەگەنمەن, ماماندار بۇل بەلگىلەردىڭ كوبىنە ۋاقىتشا ەكەنىن جانە 3 كۇن ىشىندە باسىلاتىنىن اتاپ ءوتتى.
قاۋلى 14 مامىردان باستاپ كۇشىنە ەندى.
بۇعان دەيىن دەنساۋلىق ساقتاۋ مينيسترلىگى 1 مامىرداعى جاعداي بويىنشا ەلىمىزدە 11-13 جاستاعى قىزدارعا اپۆ-عا قارسى 398 مىڭنان استام ەكپە سالىنعانىن حابارلاعان ەدى. ونىڭ ىشىندە 248 مىڭ قىز ءبىرىنشى دوزانى, 150 مىڭ قىز ەكىنشى دوزانى العان. رەسمي مالىمەتكە سايكەس, ۆاكتسينادان كەيىن اسقىنۋ جاعدايلارى تىركەلمەگەن.
ادام پاپيللوما ۆيرۋسى قانداي اۋرۋ