LRT ىسكە قوسىلعالى بەرى جولاۋشىلار سانى 180 مىڭ ادامعا جەتكەن. تەك كەشە عانا جەڭىل رەلستى كولىك قىزمەتىن 100 مىڭ ادام پايدالانعان, دەپ حابارلايدى Egemen.kz.
بۇل كورسەتكىش جوبادا قاراستىرىلعان وتكىزۋ مۇمكىندىگىنەن اسىپ تۇسكەن. CTS باسشىسى اسىلبەك دۇيسەباەۆ تۇرعىنداردى قاۋىپسىزدىك ەرەجەلەرىن ساقتاۋعا شاقىردى.
اتاپ ايتقاندا, توتەنشە جاعداي بولماسا پلاتفورمالار مەن ۆاگوندارداعى دابىل باتىرمالارىن باسپاۋ, پويىز ەسىكتەرىن وزدىگىنەن اشپاۋ جانە ولاردىڭ جابىلۋىنا كەدەرگى كەلتىرمەۋ قاجەتتىگى ەسكەرتىلدى. مۇنداي ارەكەتتەر قۇرامداردىڭ توقتاپ قالۋىنا سەبەپ بولادى.
CTS مالىمەتىنشە, LRT جۇيەسى تولىق اۆتوماتتاندىرىلعان ءارى جۇرگىزۋشىسىز جۇمىس ىستەيدى. سوندىقتان مۇنداي ارەكەتتەر قاۋىپسىزدىك جۇيەسى تاراپىنان جولاۋشىلارعا تونگەن قاۋىپ رەتىندە قابىلدانادى.
قازىرگى ۋاقىتتا جولاۋشىلار اعىنى ەكى ەسە ازايعان, قوزعالىس شتاتتىق رەجيمدە جۇزەگە اسىپ جاتىر, ايتارلىقتاي زاڭبۇزۋشىلىقتار تىركەلمەگەن.
ەسكە سالايىق, استانادا LRT 16 مامىر كۇنى ىسكە قوسىلدى. پرەزيدەنت قاسىم-جومارت توقاەۆ ەلورداداعى قوعامدىق كولىككە, سونىڭ ىشىندە LRT جۇيەسىنە مونيتورينگ جۇرگىزىپ, جۇمىسىن رەتتەيتىن بىرىڭعاي ديسپەتچەرلىك ورتالىقتىڭ قىزمەتىمەن تانىستى. مەملەكەت باسشىسىنا LRT جۇيەسىنىڭ 001 سەريالى جول ءجۇرۋ كارتاسى تابىستالدى.