جىلدىڭ ۇزدىكتەرى

فۋتبول

2017 جىلدىڭ ۇزدىك كومان­دالىق ۇجىمى – ەلور­دانىڭ «استانا» فۋتبول كلۋبى. ويتكەنى «استانا» قازاق فۋت­بولىنىڭ 104 جىل­دىق تاريحىنا وزگەرىس جاساپ, تۇڭعىش رەت ۋەفا ەۋروپا ليگاسىنىڭ پلەي-وفف كەزە­ڭىنە شىقتى. بيىلعا دەيىن قازاق فۋت­بولى­نىڭ جانكۇيەرلەرى «استانانىڭ» چەم­پيون­دار ليگاسى مەن ەۋروپا ليگاسىنىڭ توپتىق كەزەڭىنە شىققانىن ماقتانىش ەتەتىن. ەندىگى ماقتانىش دەڭگەيى وز­گەردى. دۇرىسى, «استانا» دەڭ­گەيىن ءبىر ساتى جوعارىلاتتى. 

بۇعان دەيىنگى «استانانىڭ» ەۋروكۋبوك دودالارىندا تاپقان تابىسىن ەسەپكە الماعاندا, ەلوردا ۇجىمى 2017/2018 جىلعى ماۋ­سىمدا قازىرگە دەيىن 8 ميلليون 180 مىڭ ەۋرو كولەمىندە تابىس تاپتى. بۇل كورسەتكىش پلەي-وفف كەزەڭىنەن كەيىن تاعى دا وسەتىنى انىق. بۇعان كلۋبتىڭ جارناما مەن تەلەكورسەتىلىم بويىنشا تاباتىن تابىسىن قوسىپ قويىڭىز.

سونداي-اق «استانا» فۋتبول كلۋبى ەۋروكۋبوك ويىندارىنداعى ناتيجەسىندە رەكورد جاڭارتتى. ەلوردا ۇجىمى ۋەفا-نىڭ كلۋبتار رەيتينگىندە ءۇش ماۋسىم ىشىندە 400 ورىنعا جوعارىلاعان. ءدال قازىرگى ۋاقىتتا «استانا» اتالعان رەيتينگتە 67-ورىندا تۇر. 

ساداق اتۋ

جىلدىڭ ۇزدىك قۇراماسىنا – مامىر ايىندا قىتايدا ساداق اتۋدان وتكەن الەم كۋبوگىنىڭ ءبىرىنشى كەزەڭىندە التىن مەدال جەڭىپ العان ساداقشىلار قۇراماسى لايىق. سەبەبى اتقان جەبەلەرى جەلمەن جارىسىپ, نىسانانىڭ وندىعىنا ءدال تيگەن دەنيس گانكين, ويرات سايديەۆ جانە سانجار مۇساەۆ ۇشتىگى فينالدا ريو وليمپياداسىنىڭ چەمپيوندارى, ساداق اتۋدان الەمدىك دەرجاۆا سانالاتىن وڭتۇستىك كورەيا قۇراماسىن 5:4 ەسەبىمەن جەڭدى. بۇل – قازاقستاننىڭ ساداق اتۋدان الەم كۋبوگى تاريحىندا العان تۇڭعىش مەدالى. 

تەننيس

جىلدىڭ ۇز­دىك سپورتشىسى – زارينا دياس. 24 جاستاعى تەننيسشى بيىل قازاق تەننيسشىلەرى اراسىندا WTA تۇجىرىمىنا ەنە­تىن Japan Open ءتۋرنيرىنىڭ تۇڭعىش رەت جەڭىمپازى اتاندى. ول 2015 جىلى WTA رەيتينگىندە ۇزدىك 50 تەننيسشىنىڭ قاتارىنا ەنىپ, 2016 جىلعى وليمپيا ويىندارىنا باراتىن ءساتى تۋىپ تۇر ەدى. الايدا سپورتشى جاراقات دەگەن ەكىنشى «قارسىلاسقا» «ەسە جىبەرىپ», وليمپياداعا بارار جىلى رەيتينگتە قۇلدىراپ, اقىر سوڭى 148-ورىنعا ءبىر-اق سىرعى­دى. ماماندار بۇل جاراقات­تان سوڭ زارينانىڭ ەكى جىل بۇرىنعى بيىگىنە كوتەرىلەتىنىنە سەنىمسىزدىكپەن قاراعان ەدى. دەگەن­مەن دياس ەرىك-جىگەر تانىتىپ, بيىل ءار جارىسىندا مەيى­لىنشە ۇپاي جيناپ, رەيتينگتە ساتى-ساتى بويىنشا كوتەرىلە باستادى. ونىڭ بيىلعى جەڭىسكە دەگەن ىنتاسى, تالابى مەن تالانتى تەننيستەن حالىقارالىق ايەلدەر رەيتينگىندە 66-ورىنعا دەيىن كوتەردى. 

بياتلون

تاياۋدا عانا شۆەتسيانىڭ ەستەرسۋند قالاسىندا وتكەن بياتلوننان الەم كۋبوگىنىڭ العاشقى كەزەڭىندە ارالاس ەستافەتادان قازاقستاننىڭ تۇڭعىش قولا مەدالىن جەڭىپ العان گالينا ۆيشنەۆسكايا مەن ماكسيم براۋن دۋەتى جىلدىڭ ۇزدىك سپورتتىق جۇبىنا ابدەن لايىق. ويتكەنى بياتلونشىلارىمىز جوعارىدا ايتىپ وتكەن ساداقشىلار سەكىلدى تاريحتا تۇڭعىش رەت جۇلدەگە قول جەتكىزدى. 

كاسىپقوي بوكس

بيىل ەلىمىزدىڭ بىلعارى قولعاپ شەبەرلەرى دە حالىقارا­لىق جارىستاردا تولايىم تابىسقا جەتىپ, ەل مەرەيىن اسقاقتاتتى. كاسىپقوي بوكسشىلارىمىز دا قازاقستاننىڭ يميدجىنە وڭ اسەر ەتەتىن بىرقاتار جەكپە-جەكتەر وتكىزدى. سونىڭ ءبىرى جانە بىرەگەيى – گەننادي گولوۆكين. كاسىپقوي بوكستىڭ ورتا سالماعىندا بوكس­تاساتىن وتانداسىمىز تاۋىق جىلىندا مەكسيكالىق «سارى بالا» – ساۋل الۆارەسپەن جۇدىرىقتاسىپ, تورەشىلەردىڭ شەشىمى بويىنشا تەڭ ءتۇستى. دەگەنمەن كاسىپقوي بوكستىڭ جىلىگىن شاعىپ, مايىن ىشكەن بوكس ساراپشىلارى مەن ماماندارى بۇل ايقاستا گولوۆكيننىڭ ءباسى بيىك بولعانىن ايتادى. سونداي-اق ماماندار گەننادي گولوۆكين مەن ساۋل الۆارەستىڭ كەزدەسۋىن جىل جەكپە-جەگىنە سانادى. 

گرەك-ريم كۇرەسى

2017 جىلدان باستاپ گرەك-ريم كۇرەسى بالۋاندارىن باپتاعان نۇرىم دۇيسەنوۆ از ۋاقىتتىڭ ىشىندە اۋىز تولتىرىپ ايتاتىن تولايىم جەتىستىكتەرگە جەتىپ, جىل باپكەرىنە لايىق ەكەندىگىن دالەلدەدى. تامىز ايىندا فرانتسيانىڭ پاريج قالاسىن­دا وتكەن الەم چەمپيوناتىندا دەمەۋ جادىراەۆ پەن مەيرامبەك ايناعۇلوۆ كۇمىس جۇلدە الىپ, التى جىل بۇرىنعى جەتىستىكتى قايتالادى. سونداي-اق اشعابادتا وتكەن جابىق عيماراتتاعى جانە جاۋىنگەرلىك ونەر بويىنشا V ازيا ويىندارىندا دانيار قالەنوۆ (66 كگ) بارلىق قارسىلاستارىنان باسىم ءتۇسىپ, چەمپيون اتاندى. ارينە بۇل جەتىستىككە باس جاتتىقتىرۋشى نۇرىم دۇيسەنوۆتىڭ ەڭبەگى وراسان ەكەنى بەلگىلى.

شاحمات

جاقىندا ءال-ايندە ء(باا) ازيا شاحمات فەدەرا­تسياسىنىڭ (اشف) ۇيىمداستىرۋىمەن ازيالىق شاحمات ءسامميتى ءوتتى. ەڭ ءىرى فورۋمعا فيدە دەلەگاتتارى, اشف باسشىلارى, ازيا جانە مۇحيت ەلدەرى پرەزيدەنتتەرى مەن شاحمات فەدەراتسيا­سى وكىلدەرى جينالعان بولاتىن. سامميتكە قازاقستان شاحمات فەدەراتسياسىنىڭ (كشف) ۆيتسە-پرەزيدەنتى بەرىك بالعاباەۆ قاتىستى.

ءىس-شارانىڭ قورىتىندى كۇنىندە «4th Annual Asian Chess Excellence Awards» ازيالىق سىيلىقاقىسىنىڭ لاۋرەاتتارىن ماراپاتتاۋ ءراسىمى ءوتتى. اتاپ وتەتىن جايت, قازاقستاندىق گروسسمەيستەر دينارا سادۋاقاسوۆا «ەڭ ۇزدىك ويىنشى قىز-2017» بولىپ جاريالاندى.

سونىمەن قاتار سول كۇنى ازيا شاحمات فەدەراتسياسى قازاقستاندىق شاحمات فەدەرا­تسيا­سىن ارنايى سەرتيفيكاتپەن ماراپاتتادى. 

2017 جىلى قازاقستاندىق ايەلدەر قۇرا­ماسى تاريحتا ءبىرىنشى رەت ازيا شاحمات ويىندارىندا (اشعاباد ق. تۇرىكمەنستان) 1-ورىنعا يە بولدى. 23 جاسقا دەيىن جىلدام شاحمات بويىنشا كوماندالىق چەمپيونات فينالىندا گروسسمەيستەر دينارا سادۋاقاسوۆا مەن جانسايا ابدىمالىك وكىلەتتىلىگىمەن ءبىزدىڭ قۇراما قىتاي قۇراماسىن باسىپ وزدى. دينارا, سونىمەن قاتار, اشعابادتا كلاسسيكادان «قولا» جەڭىپ, تاشكەنت (وزبەكستان) قالاسىندا وتكەن ورتالىق ازيا ايماقتىق چەمپيوناتىندا ۇزدىك بولىپ تانىلدى. 

حالىقارالىق گروسسمەيستەر دينارا سادۋاقاسوۆا (2460) – قىزدار اراسىندا ءتورت مارتە الەم چەمپيونى, بىرنەشە دۇركىن قازاقستان چەمپيونى. دينارا «شاحماتتاعى ءبىرىنشى قادام» كىتابىنىڭ اۆتورى. بيىل «يۋنيسەف قازاقستان» ۇلتتىق ەركىن ەلشىسى بولىپ تاعايىندالدى. 

ءالي بيتورە, «ەگەمەن قازاقستان»