جامبىل وبلىسىنىڭ اكىمى كارىم كوكىرەكباەۆ قىتاي حالىق رەسپۋبليكاسىنا جۇمىس ساپارى بارىسىندا سۋچجوۋ قالاسىندا ورنالاسقان «Higer Quazar» وندىرىستىك كەشەنىندە بولىپ, اتالعان كەشەننىڭ جۇمىسىمەن تانىستى.
ايماق اكىمدىگىنەن حابارلاعانداي, كارىم كوكىرەكباەۆ اتالعان كومپانيانىڭ اتقارۋشى ديرەكتورى حۋان شۋن كين جانە «Higer Quazar» وندىرىستىك كەشەنىنىڭ وكىلدەرىمەن كەزدەسىپ, «جاسىل ەكونوميكا» باعدارلاماسى اياسىندا ەكولوگيالىق تۇرعىدان زيان كەلتىرمەيتىن قوعامدىق كولىكتىڭ تيىمدىلىگىن تالقىلادى.
سونداي-اق, قالا ارالىق جانە قالا ىشىلىك قوعامدىق كولىكتەردى ساتىپ الۋ, «Quazar» اتتى ەلەكترلىك اۆتوبۋستار قۇراستىراتىن زاۋىت قۇرىلىسىن تاراز قالاسىندا باستاۋ جايلارى دا قارالدى.
ەسكە سالا كەتسەك, قوس تاراپ جىلىنا 300 ەلەكترلىك اۆتوبۋس شىعاراتىن زاۋىتتىڭ قۇرىلىسىن «تاراز» يندۋستريالدى پاركى» اۋماعىندا سوعۋ تۋرالى مەموراندۋمعا قول قويعان بولاتىن. جوبانىڭ قۇنى 3 ملرد. تەڭگەنى قۇرايدى. تاراپتار اراسىنداعى ىنتىماقتاستىقتىڭ ماقساتى - ينۆەستيتسيالىق جوبانى ىسكە اسىرۋ بولىپ تابىلادى. جامبىلدىق دەلەگاتسيا قوس قالا اراسىندا كولىك مەنەدجمەنتى بويىنشا تاجىريبە الماسۋدى تۇراقتى ورناتۋعا قىزىعۋشىلىق تانىتتى.
سونىمەن قاتار, ەكونوميكالىق سالاداعى ىنتىماقتاستىقتى كەڭەيتۋگە باعىتتالعان باسقا دا بىرقاتار باعىتتار بويىنشا پىكىرلەر تىڭدالدى.
ايتا كەتەرلىگى, بيىلعى جىلدىڭ باسىندا الماتى قالاسىندا «Higer Quazar» ەكولوگيالىق تازا ەلەكتر اۆتوبۋستارىن شىعاراتىن زاۋىت پايدالانۋعا بەرىلگەن بولاتىن. «Higer Quazar» كومپانياسى ەكى ءتۇرلى ەلەكترلى اۆتوبۋستاردى قۇراستىرادى.
ال, استانادا «ەكسپو-2017» حالىقارالىق مامانداندىرىلعان كورمەسى كەزىندە «Higer Quazar» قازاقستاندىق ەلەكتروبۋس العاش رەت قالا كوشەلەرىمەن جۇرگەن بولاتىن.
ەسكە سالا كەتسەك, تارازدا ەكولوگيالىق تازا قوعامدىق كولىكتى ىسكە قوسۋ, سونداي-اق قازاقستاندىق قوندىرعىلاردىڭ ەلەكتروموبيلدەرىنە ارنالعان اككۋمۋلياتورلىق باتارەيالار ءوندىرىسىن اشۋ جوسپارلانىپ وتىر.