قوس بوكسشىنىڭ اراسىنداعى جەكپە-جەك وتەتىنى رەسمي تۇردە حابارلانعان سوڭ اسىرەسە, مەكسيكالىقتار مەن اقش-تىڭ وزگە قالالارىنان كەلەتىن امەريكالىقتار جەرگىلىكتى قوناقۇيلەرگە الدىن الا برون جاساۋدى قازىردەن باستاپ قولعا الدى. بۇل كەزدەسۋدى ارەنادا وتىرىپ كورگىسى كەلەتىن قازاقستاندىق جانكۇيەرلەردىڭ جوق ەمەستىگى بەلگىلى. وسىعان وراي, قازاقستان تۋريستىك فيرمالارىنان گولوۆكين-الۆارەس جەكپە-جەگىنە قازاقستاندىق جانكۇيەرلەردىڭ قانشا قارجى جۇمسايتىنىن سۇراپ ءبىلىپ ەدىك.
OASIS-1 تۋريستىك فيرماسى ەكى كۇنگە ارەنا قاسىنداعى ءۇشجۇلدىزدى قوناق ءۇيدى جانە بوكس كەشىنىڭ ەڭ ارزان بيلەتىن قاراستىرعان. جالپى قۇنى 2500 دوللاردى قۇرايدى.
ال Atlas Travel Agency قىزمەتى وزگەلەرىنە قاراعاندا قىمباتىراق – 4000 دوللار. بىراق ءبىر ەرەكشەلەگى تۋريستەر لاس-ۆەگاستان بولەك ىستانبۇل, چيكاگو قالالارىن ارالاپ شىعۋىنا مۇمكىندىك جاسايدى.
Travel Express تۋريستىك فيرماسىنىڭ بارىپ-كەلۋ بيلەتىنىڭ ەڭ ارزان قۇنى 1713 دوللاردى قۇرايدى. بىراق وعان جەكپە-جەك بيلەتىنىڭ باعاسى كىرمەيدى. بۇل جەردەگى قارجىنىڭ باسىم بولىگى ۇشاق بيلەتىنە كەتەدى. تىكەلەي رەيس بولمايتىنى بەلگىلى. سوندىقتان, فرانكفۋرت نەمەسە سان-فرانتسيسكو ارقىلى عانا قاتىنايدى.
كليەنتتەر اقش-تا 14-19 قىركۇيەك كۇندەرى عانا بولا الادى. «ەكونوم» پاكەتى – 1713 دوللار, ونىڭ ىشىنە ۇشاق بيلەتى, ارەنانىڭ قاسىنداعى ەڭ ارزان وتەلدەردىڭ ءبىرى, ۆيزا جانە ساقتاندىرۋ كۋالىگى كىرەدى. «ستاندارت» پاكەتى ازداپ قىمباتتاۋ – 1985 دوللار. وعان New York Hotel & Casino جانە Monte Carlo Resort and Casino سەكىلدى بەلگىلى وتەلدەر قاراستىرىلعان. عيماراتتار بوكس كەشى وتەتىن ارەنادان 600 مەتر قاشىقتىقتا ورنالاسقان.
اقش-قا جەكپە-جەك كورۋ ماقساتىمەن باراتىندار ۋاقىت جوعالتپاي, قازىردەن باستاپ كىرىسكەنى ءجون. سەبەبى, ۆيزاعا ءوتىنىش بەرۋ 20 ماۋسىمدا اياقتالادى.
گولوۆكين-الۆارەس ايقاسى 16 قىركۇيەك كۇنى لاس-ۆەگاس قالاسىنىڭ T-Mobile ارەناسىندا وتەدى. جەكپە-جەكتى HBO تەلەارناسى اقش-تا اقىلى ترانسلياتسيا جۇيەسى بويىنشا كورسەتەدى. بۇل كەزدەسۋگە GGG ءوزىنىڭ WBC, WBA (Super), IBF جانە IBO بەلبەۋلەرىن قويسا, مەكسيكالىق بوكسشى The Ring جۋرنالىنىڭ بەلدىگىن ساراپقا سالماق. Hoylosangeles.com مالىمەتى بويىنشا ارەنانىڭ ىشىندەگى بيلەتتىڭ ەڭ ارزان قۇنى 100-200 دوللاردى قۇراسا, ەڭ قىمباتى – 1500 دوللار.
ايتا كەتەيىك, گەننادي گولوۆكيننىڭ امەريكالىق دەنيەل دجەيكوبسپەن وتكىزگەن سوڭعى ايقاسىن قازاقستاندىق جانكۇيەرلەر Madison Square Garden ارەناسىنان كورۋ ءۇشىن 1380 اقش دوللارىن جۇمساعان. وعان ۇشاق بيلەتى, ۆيزا, جەكپە-جەك بيلەتى جانە ساقتاندىرۋ كۋالىگى كىرگەن بولاتىن.
دايىنداعان: ايان ءابدۋالي, "ەگەمەن قازاقستان"