ەڭ الدىمەن «بايقوڭىر» عارىش ايلاعى مەن قورقىت اتا زيارات ەتۋ كەشەنى ەكسپو-2017 كورمەسىنىڭ ءبىر نىسانى رەتىندە كارتاعا ەنگەنىن ايتقانىمىز ابزال. بۇل دەگەنىڭىز, كورمەگە كەلگەن تۋريستەر عارىشتىڭ ادامعا قالاي باعىنعانىن كوزبەن كورىپ, ءتۇبى ءبىر تۇركىگە ورتاق تۇلعا – قورقىت اتانىڭ باسىنا زيارات ەتۋگە بىردەن-ءبىر مۇمكىندىك بولماق. وسى رەتتە قورقىت اتا كەشەنىنەن ەتنواۋىل بوي كوتەرىپ, ۇلتتىق قولونەر بۇيىمدارى كوپشىلىك نازارىنا ۇسىنىلادى. سونداي-اق, سپورتتىق-مادەني شارالار دا ۇيىمداستىرىلادى. تۋريستىك وپەراتورلاردىڭ مالىمەتىنشە, جەر كىندىگى بايقوڭىرعا گەرمانيا, ۇلىبريتانيا جانە قىتايدان كەلۋگە نيەتتى تۋريستەر كوپ. وسىعان وراي جۇلدىزدى قالاشىقتى كورمەككە كەلگەن ساياحاتشىلاردىڭ وتىنىشتەرىن قاراۋ مەرزىمى 45 كۇننەن 10 كۇنگە قىسقاردى. وبلىستىق كاسىپكەرلىك جانە تۋريزم باسقارماسىنىڭ باسشىسى نۇرجان ومىرسەرىك ۇلىنىڭ ايتۋىنشا, كورمەگە سىر ەلىنەن 75 مىڭ ادام قاتىسادى دەگەن بولجام بار. وبلىستان كورمەگە تەمىر جول كولىگىمەن 50 مىڭ ادام, اۋە كولىگىمەن 10 مىڭ ادام جانە اۆتوبۋسپەن 15 مىڭ ادام جەتكىزىلەتىن بولادى. كورمە كەزىندە قىزىلوردا-كوكشەتاۋ پويىزىنا قوسىمشا 36 ۆاگون جالعانادى. بۇل جولاۋشىلاردىڭ بارىس-كەلىسىن جاقسارتۋ ءۇشىن جاسالاتىن قادام. سونىمەن قاتار, شارا بارىسىندا قىزىلوردا قالاسىنان استانا باعىتىنا 3 جولاۋشى پويىزى ۇيىمداستىرىلعان. كۇندەلىكتى «قىزىلوردا – كوكشەتاۋ» پويىزى, جۇپ كۇندەرى «قىزىلوردا – پەتروپاۆل» جانە تاق كۇندەرى «قىزىلوردا – استانا» پويىزدارى جۇرەدى. ەكسپو-2017 كورمەسى كەزىندە قىزىلوردا وبلىسىنان بولىنگەن كۆوتا كۇنىنە 536 ورىندى قۇرايدى. سونداي-اق, تامىزدىڭ 10-14-ءى كۇندەرى استانادا قىزىلوردا وبلىسىنىڭ ونەرى جانە مادەنيەتى كۇندەرى وتۋدە. وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى جانات قۇرامىسوۆا وسى كۇندەرى ن.بەكەجانوۆ اتىنداعى قازاق مۋزىكالىق دراما تەاترى ۇجىمى ەلوردالىقتارعا يران عايىپتىڭ «قورقىت» سپەكتاكلى مەن وزگە دە قويىلىمدارىن ۇسىناتىنىن ايتادى. باعدارلاماعا سايكەس, ونەر ۇجىمدارىنىڭ كونتسەرتى, كولونەر بۇيىمدارىنىڭ كورمەسى دە وتەدى. ەكسپو-2017 رەسۋرستىق ورتالىعىنىڭ ديرەكتورى جاندوس تۇسماعامبەتوۆتىڭ ايتۋىنشا, قىزىلوردالىقتار كورمەدە 6 جوبانى تانىستىرادى. قىسقاسى, قىزىلوردالىقتار حالىقارالىق كورمەنىڭ ءمانى مەن ماڭىزىن ارتتىرۋعا جان-جاقتى دايىندىقپەن كەلىپ وتىر.
ەرجان بايتىلەس, «ەگەمەن قازاقستان»
قىزىلوردا وبلىسى