ەكسپو-2017 حالىقارالىق كورمەسىندە ورتاق پاۆيلون اشادى
چيلي سىرتقى ىستەر مينيسترلىگى تىنىق مۇحيتى اليانسىنىڭ ەكسپو-2017 حالىقارالىق مامانداندىرىلعان كورمەسىنە قاتىساتىنىن رەسمي تۇردە راستادى. چيلي, پەرۋ, كولۋمبيا جانە مەكسيكا ورتاق پاۆيلون اشاتىن بولادى. وسىمەن, بۇگىنگى تاڭدا, 111 ەل ەكسپو-2017 حالىقارالىق مامانداندىرىلعان كورمەسىنە قاتىساتىنىن رەسمي تۇردە راستاپ وتىر.
كورمەنىڭ «بولاشاقتىڭ ەنەرگياسى» تاقىرىبى تىنىق مۇحيتى اليانسى ەلدەرىنە وزەكتى, ويتكەنى, بۇل ەلدەر جاڭارتىلاتىن ەنەرگيا كوزدەرىن كەڭ قولدانۋ مۇمكىندىگىن بەلسەندى تۇردە زەرتتەۋدە. ماسەلەن, چيليدە كۇن ەنەرگياسى تاۋ-كەن ونەركاسىبىنە قاراعاندا ءجيى قولدانىلادى. ەڭ ءىرى فوتوەلەكترلىك كۇن ساۋلەلىك ەلەكتر ستانساسى – «Catama Solar» جىلىنا 2,62 گۆت ەنەرگيا وندىرەدى.
مەكسيكادا 2018 جىلعا جەل جانە بۋ ستانسالارىنا 5 ملرد دوللار ينۆەستيتسيا سالۋ جوسپارلانىپ وتىر. 2018 جىلدىڭ اياعىندا ەلدىڭ فوتوەلەكتر سالاسىندا بەلگىلەنگەن 67 مۆت قۋاتى 1300 مۆت قۋاتقا دەيىن ۇلعايادى, ءسويتىپ, ساراپشىلاردىڭ باعالاۋىنشا, ەنەرگەتيكا سالاسىنىڭ لاتىن امەريكاسى نارىعىندا بەدەلى وسەدى.
بۇگىنگى تاڭدا پەرۋدىڭ ەلەكتر ەنەرگەتيكالىق قۋاتىنىڭ 54 پايىزى جاڭارتىلاتىن ەنەرگيا كوزدەرى, اتاپ ايتقاندا, سۋ ەلەكتر ستانسالارى قۇرايدى. جاقىن ۋاقىتتا بۇل كورسەتكىش 60 پايىزعا ۇلعايادى دەپ كۇتىلۋدە.
كولۋمبيادا 400 مۆت قۋات وندىرەتىن «El Quimbo» سۋ ەلەكتر ستانساسى ىسكە قوسىلعان. سونىمەن بىرگە, كولۋمبيا بۇگىندە مەدەلين قالاسىنداعى ۋنيۆەرسيتەتتىڭ پروفەسسورلارى مەن ستۋدەنتتەرى جاساعان كۇن ەنەرگياسى ارقىلى جۇرەتىن تۇڭعىش اۆتوموبيلىمەن تانىمال بولا باستادى.
بۇعان دەيىن قازاقستان رەسپۋبليكاسى ءسىم-ءى ەكسپو-2017 حاتشىلىعى مەن قازاقستاننىڭ جانە برازيلياداعى ەلشىلىگىنىڭ وكىلدەرى چيلي تاراپىنىڭ شاقىرۋىمەن اليانستىڭ بىرقاتار ورتاق ءىس-شارالارىنا قاتىسقان بولاتىن. اتاپ ايتقاندا, ۇستىمىزدەگى جىلدىڭ 14 قازانىندا چيلي استاناسى – سانتياگودا ورىن العان تىنىق مۇحيتى اليانسىنا مۇشە مەملەكەتتەر سىرتقى ىستەر مينيسترلەرىنىڭ ورىنباسارلارى دەڭگەيىندەگى جيىننىڭ شەڭبەرىڭدە قازاقستاندىق ديپلوماتتار كورمە تۋرالى تۇساۋكەسەر وتكىزىپ, ونىڭ تاقىرىبىنىڭ وزەكتىلىگىن اتاپ وتكەن ەدى, سونداي-اق, وبەكتىلەردىڭ سالىنۋ بارىسى, ولاردى تاپسىرۋ ۋاقىتى, ەلدەردىڭ قاتىسۋ مۇمكىندىكتەرى مەن شارتتارى تۋرالى ايتىپ بەرگەن بولاتىن.
تىنىق مۇحيتى اليانسى 2012 جىلدىڭ 6 ماۋسىمىندا ءچيليدىڭ انتوفاگاستا قالاسىندا قاتىسۋشىلاردىڭ نەگىزدەمەلىك كەلىسىمگە قول قويۋلارى ارقىلى ءتورت لاتىن امەريكاسى ەلدەرى – چيلي, پەرۋ, كولۋمبيا جانە مەكسيكا اراسىندا قۇرىلعان بولاتىن. اتالعان ەكونوميكالىق وداققا قاتىسۋشى مەملەكەتتەر قازاقستان رەسپۋبليكاسىنداعى ەلشىلىكتەرىنەن بولەك, ەلىمىزدە ورتاق ديپلوماتيالىق جانە ساۋدا وكىلدىكتەرىن اشۋدى كوزدەيدى, دەپ حابارلادى ەكسپو-2017-ءنىڭ ءباسپاسوز قىزمەتى.