ىشۋگە جارامدى جەراستى سۋلارىن انىقتاۋ بويىنشا اۋقىمدى گەولوگيالىق بارلاۋ جۇمىستارى قاراعاندى وبلىسىندا ءبىرازدان بەرى جۇرگىزىلىپ كەلەدى. ونىڭ ءبارى, البەتتە, وڭىردەگى ەلدى مەكەندەردى اۋىز سۋمەن تولىقتاي قامتاماسىز ەتۋ ءۇشىن قاجەت.
اۋىلدىق جەرلەردە جەراستى سۋلارىن بارلاۋ جۇمىستارى وڭىرلەردى دامىتۋدىڭ 2020 جىلعا دەيىنگى باعدارلاماسى شەڭبەرىندە جۇزەگە اسىرىلۋدا. بيىل وبلىستاعى 32 اۋىلدىق ەلدى مەكەندە گەولوگيالىق جۇمىستار اياقتالادى. جەراستى سۋلارىنىڭ قورى تۋرالى ەسەپ تە جىل سوڭىنا دەيىن دايىن بولۋى ءتيىس. سونىمەن قاتار, بيىل 45 اۋىلدىق ەلدى مەكەن مەن 23 كەن ورنىندا جۇمىستار قولعا الىندى. ولاردىڭ قورىتىندىسى تەك كەلەسى جىلدىڭ سوڭىنا تامان بەلگىلى بولماق. تاعى دا 44 اۋىل مەن 2 كەن ورنى بويىنشا جوبالىق-سمەتالىق قۇجاتتار ازىرلەنىپ جاتىر. جۇمىستار 2017 جىلدىڭ باسىنان قولعا الىنادى.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى قايرات بەگىموۆتىڭ ايتۋىنشا, سۋمەن قامتاماسىز ەتۋ بويىنشا 13 جوبانى جۇزەگە اسىرۋعا 3 ميلليارد تەڭگەدەن استام قاراجات بولىنگەن. ناتيجەسىندە, 5 جوبا تولىقتاي اياقتالىپ, 61 شاقىرىمنان ارتىق سۋ تورابىنىڭ كەي جەرى قايتا جاسالىپ, كەي تۇستارى جاڭادان سالىندى. بۇقار جىراۋ اۋدانىنداعى پەتروۆكا اۋىلى مەن ۇلىتاۋ اۋدانىنداعى العاباس اۋىلى ورتالىقتاندىرىلعان سۋ جۇيەسىنە قوسىلدى.
ستاتيستيكالىق مالىمەتتەرگە جۇگىنسەك, 2016 جىلدىڭ باسىندا قاراعاندى وبلىسىندا ورتالىقتاندىرىلعان سۋ جۇيەسىمەن قامتاماسىز ەتىلگەن 225 ەلدى مەكەن بولدى. مەملەكەتتىك باعدارلامانى جۇزەگە اسىرۋ جۇمىستارى بيىل دا جالعاسىن تاۋىپ, وسى ماقساتقا 1,6 ملرد تەڭگە قاراجات بولىنگەن.
– مەملەكەتتىك باعدارلامانىڭ كومەگى ارقاسىندا سۋ جۇيەسىندەگى اقاۋلار كوپ ازايدى, – دەيدى قايرات بەگىموۆ. – سۋ توراپتارىنداعى اپاتتار, الدىڭعى جىلدارمەن سالىستىرعاندا, بەس ەسەگە, كارىز توراپتارىنداعى بىتەلۋلەر ون ەسەگە دەيىن ازايدى.
قاراعاندى وبلىسىنداعى 195 اۋىلدىق ەلدى مەكەننىڭ تۇرعىندارى قۇدىقتار مەن ءتۇرلى ۇڭعىمالاردى پايدالانادى ەكەن. ولاردىڭ كوپشىلىگى شاعىن اۋىلدار. سولاردىڭ جيىرماسىندا عانا حالىق سانى 500 بەن 1 مىڭ ادام ارالىعىندا. سوعان وراي, ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى تىم كىشكەنتاي ەلدى مەكەندەردىڭ حالقىن «جۇمىسپەن قامتۋدىڭ جول كارتاسى-2020» باعدارلاماسىنىڭ ءۇشىنشى باعىتى بويىنشا ەكونوميكالىق الەۋەتى جوعارى ەلدى مەكەندەرگە كوشىرۋ ءمۇمكىندىكتەرىن قاراستىرۋدى ۇسىنىپ وتىر.
قايرات بەگىموۆتىڭ ايتۋىنشا, شەشىلمەگەن پروبلەمالار بارشىلىق. مىسالى, ساتباەۆ قالاسىنىڭ باتىس تۇرعىن اۋدانىندا سۋ قۇبىرلارى مەن كارىز جۇيەسىنىڭ قۇرىلىسى اياقتالماعان. ونىڭ باستى سەبەبى, ادەتتەگىدەي قارجى ماسەلەسى كورىنەدى. قالا اكىمدىگى مەردىگەر ۇيىمدى 2015 جىلى سوت ارقىلى جاۋاپكەرشىلىككە تارتقان بولاتىن. سوت اكىمدىكتى جاقتاپ شەشىم شىعارسا دا, مەردىگەر ۇيىم تيەسىلى قاراجاتتى ءالى كۇنگە قايتارماعان. ۇلىتاۋ اۋدانىنداعى ۇلىتاۋ مەن سالامات ەلدى مەكەندەرىندە سۋ قۇبىرلارىن تارتۋ جۇمىستارى اياقتالماعان. ونىڭ سەبەبى – جوبادا جۇمىس ىستەپ تۇرعان ۇڭعىمالاردى تازالاۋ جۇمىستارى الدىن الا قاراستىرىلماعان, ياعني ەسەپكە الىنباعان.
دەگەنمەن, بۇل ماسەلەلەردىڭ ءبارى ءبىرتىندەپ شەشىلۋدە. وڭىردە اۋىز سۋدان سونشالىقتى تارىعىپ وتىرعان ەلدى مەكەن جوق. ايتسە دە, ولار تۇتىنىپ وتىرعان سۋدىڭ ساپاسى ارتا تۇسسە, حالىقتىڭ دەنساۋلىعىنا ءبىرشاما قامقورلىق بولار ەدى. جاۋاپتى كاسىپورىنداردىڭ كوزدەگەنى دە سول.
قايرات ءابىلدينوۆ,
«ەگەمەن قازاقستان»
قاراعاندى