ەلىمىزدىڭ ءار وڭىرىنەن كومەيىنەن جىر ساۋلاعان سۋىرىپسالما اقىنداردىڭ قاتىسۋىمەن «اسقاق رۋحتى اتىراۋ» اتتى ايتىس ءوتتى. ەل تاۋەلسىزدىگىنىڭ 25 جىلدىق مەرەيتويىنا ارنالعان ايتىستىڭ وتۋىنە وبلىستىق اكىمدىك ۇيىتقى بولدى.
ايتىسقا قاتىسقان الاش اقىندارىنىڭ اراسىندا وسالى جوق. ءبارى دە تاۋەلسىزدىك جىلدارىنداعى ەلدىڭ جەتىستىگى مەن جەمىسىن, سونىڭ ىشىندە, اتىراۋدىڭ دا وركەندەۋ ءورىسىن جىرىنا قوستى. اسىرەسە, سەرىكزات دۇيسەنعازين, مەيىرحان سۇلتانحان سىندى اقىندار وزىندىك ماقامىمەن, ورەلى ويىمەن كورەرمەندى ءبىر جەلپىنتىپ تاستادى. ءار ءسوزىن استارلى ءازىلگە قۇراي بىلەتىن ماقسات اقانوۆ پەن جانسايا مۋسينا حالىقتىڭ ىستىق ىقىلاسىنا بولەندى.
البەتتە, جىر سايىسىن جۇرگىزگەن اقىن ءجۇرسىن ەرماننىڭ پىكىرىنشە, ايتىستىڭ دا, وعان قاتىساتىن اقىنداردىڭ دا دەڭگەيى وسە تۇسكەن. ەلىمىزدىڭ بارلىق وڭىرىندە اقىندار مەكتەبىنەن ءتالىم العان جاس اقىندار ايتىستاردا توپ جارا باستاپتى. اقىنداردىڭ ءوزارا ءسوز سايىسىن كسرو حالىق ءارتىسى, مەملەكەتتىك سىيلىقتىڭ يەگەرى اسانالى ءاشىموۆ توراعالىق ەتكەن قازىلار باعالادى.
ايتىستىڭ باس جۇلدەسى – 2 ميلليون تەڭگە قاراعاندىلىق ماقسات اقانوۆقا بەرىلدى. وعان باس جۇلدەنى تاپسىرعان وبلىس اكىمى نۇرلان نوعاەۆ: «اقىندار كوتەرگەن ماسەلەنىڭ ءبارى دە وزەكتى, ءبىز الداعى ۋاقىتتا دا اقىنداردى قارسى الۋعا دايىنبىز» دەدى. 1 ميلليون تەڭگەلىك سياپاتى بار ءبىرىنشى ورىندى جانسايا مۋسينا جەڭىپ الدى. ارقايسىسى 800 000 تەڭگەنى قۇرايتىن ەكىنشى ورىننىڭ ەكى جۇلدەسى مەيىربەك سۇلتانxان مەن باۋىرجان شيرمەدەن ۇلىنا بەرىلدى. سەرىكزات دۇيسەنعازين, يرانعايىپ كۇزەمباەۆ جانە جانىبەك سادىروۆ ارقايسىسى 750 000 تەڭگەنىڭ ءۇشىنشى جۇلدەسىنە يە بولدى.
بۇل ايتىس اقىنداردىڭ ەلدىك, ۇلتتىق مۇددەنى جىرىنا ارقاۋ ەتىپ, ەلدى بىرلىككە ۇندەۋىمەن كوپشىلىكتىڭ ەسىندە قالدى.
جولداسبەك شوپەعۇل,
«ەگەمەن قازاقستان»
اتىراۋ