كەشە ۇلتتىق مۋزەي ۇجىمىنىڭ ۇيىمداستىرۋىمەن تۇڭعىش پرەزيدەنت كۇنىنە جانە ەل تاۋەلسىزدىگىنىڭ 25 جىلدىعىنا وراي «ەلباسى – ەل تىرەگى» اتتى مادەني-تانىمدىق كەش ءوتتى.
ۇلتتىق مۋزەيدىڭ «تاريحي تۇلعالار» اتتى اعارتۋشىلىق-تانىمدىق باعدارلاماسى اياسىندا ۇيىمداستىرىلىپ وتىرعان كەش بارىسىندا ەلباسىنىڭ ەل دامۋىنداعى ورنى, تاۋەلسىز قازاقستاننىڭ ءوسىپ-ءوركەندەۋىنە قوسقان ۇلەسى, مەملە-كەتتىڭ ىشكى-سىرتقى ساياساتىنداعى ۇستانىمدارى تۋرالى ءسوز قوزعالىپ, نۇرسۇلتان نازارباەۆتىڭ اتىمەن اتالعان شەتەلدەردەگى كوشەلەر, مەكەمەلەر مەن ەسكەرتكىشتەر تۋرالى بەينەسيۋجەت كورسەتىلدى. بەينەسيۋجەتتى ازىرلەۋگە قازاقستانداعى ءتۇركيا, ۋكراينا, يوردانيانىڭ حوشيميت كورولدىگى ەلشىلىكتەرى, تاتارستاننىڭ قازاقستانداعى وكىلدىگى, «ۆايناح» شەشەن-ينگۋش ەتنو-مادەني بىرلەستىگى كومەكتەسكەن. ايتا كەتۋ كەرەك, قازىرگى تاڭدا تۇركيانىڭ نەۆشەحير, قىرشەحير, گەبزە, ادان قالالارىندا, يوردانيانىڭ استاناسى امماندا, شەشەنستاننىڭ استاناسى گروزنىي قالاسىندا, ينگۋشەتيا استاناسى ماگاستا جانە تاتارستان استاناسى قازان قالاسىندا قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆتىڭ اتىمەن اتالعان كوشەلەر بار. سول سياقتى, الەمنىڭ بىرنەشە ەلىندە ەلباسىنا ارنالعان ەسكەرتكىشتەر اشىلعان. ەڭ العاشقى ەسكەرتكىشتىڭ ءبىرى مەملەكەت باسشىسى ءبىلىم العان ۋكراينانىڭ دنەپرودزەرجينسك قالاسىندا بوي كوتەرگەن. سونداي-اق, تۇركيا استاناسى انكارادا, قىرعىزستاننىڭ شولپان-اتا قالاسىندا, گاگاۋزيا استاناسى كومرات قالاسىندا قازاقستان پرەزيدەنتىنىڭ ەسكەرتكىش-ءبيۋستى بار.
«ءبىز وسى كۇندەرى رەسپۋبليكا بولىپ تاۋەلسىزدىكتىڭ 25 جىلدىعىن اتاپ وتۋگە دايىندىق ءۇستىندەمىز. بابالاردىڭ قانى مەن انالاردىڭ جاسىمەن جەتكەن ەركىندىكتى ەل بولىپ بىرىگىپ, جۇرت بولىپ جۇمىلىپ تويلاماساق ەلدىگىمىزگە سىن ەمەس پە؟ سوندىقتان دا وسى رەتتە ءبىرنەشە ءىس-شارالار جوسپارلانىپ وتىر. ەلباسىمىز ءبىر سۇحباتىندا «تاۋەلسىزدىكتىڭ ءۇش جەتىستىگى بار, ءبىرىنشىسى, ءبىز تاۋەلسىز مەملەكەت بولدىق, ەكىنشىسى, استانامىزدى سالدىق, ءۇشىنشىسى, كورشى, شەتەلدەرمەن ىنتىماقتاستىعىمىز ارتتى» دەگەن ەدى. شىنىن ايتقاندا, وسىنىڭ بارلىعىنىڭ اۆتورى ەلباسى نۇرسۇلتان نازارباەۆ دەۋگە تولىقتاي نەگىز بار. ەندىگى ماقسات – ماڭداي تەرمەن كەلگەن ەركىندىكتىڭ ەڭسەسىن تومەن ءتۇسىرمەۋ. تاتۋلىعىمىزدىڭ تامىرىن كەڭگە جايۋ», دەدى ۇلتتىق مۋزەي ديرەكتورى دارحان مىڭباي.
كەش بارىسىندا ۇلتتىق ونەر ۋنيۆەرسيتەتىنىڭ ستۋدەنتتەرى ەلباسىنىڭ سوزىنە جازىلعان ءاندەردى ورىنداپ, قوناقتاردىڭ ىستىق ىقىلاسىنا بولەندى.
راۋان قايدار,
«ەگەمەن قازاقستان»